ନାବାଳିକାକୁ ପ୍ରେମ କରି ହରଡ଼ାଘଣାରେ ଯୁବକ, ଛତିଶଗଡ଼ରୁ ଆସି ବଲାଙ୍ଗୀରରେ ବାନ୍ଧିଲା ପୋଲିସ

ବିହାଘର ହେବ, ପିଲାଛୁଆ ହେବେ । ହସଖୁସିରେ ପରିବାର ପୂରି ଉଠିବ.. ଏପରି କେତେ ଯେ ସ୍ୱପ୍ନ ତାଙ୍କୁ ଶୁଆଇ ଦେଉନଥିଲା । ସବୁ କିଛି ଠିକ୍‌ ଥିଲା.. କିନ୍ତୁ ନାବାଳିକାକୁ ପ୍ରେମ କରି ଏବେ ହରଡଘଣାରେ ଯୁବକ । ଛତିଶଗଡ଼ରେ ପ୍ରେମ କରିଥିବା ଯୁବକ ବଲାଙ୍ଗିରରେ ଗିରଫ ହୋଇଛନ୍ତି ।

ନଜର ପକାଇବା ପୁରା ଘଟଣା ଉପରେ

ନୂଆପଡା ଜିଲ୍ଲା ମାଗୁରପାନୀ ଗାଁର ଯୁବକ ଉମାଶଙ୍କର ମାଝୀ ଛତିଶଗଡ଼ ରାଜ୍ୟରେ କାମ କରୁଥିଲେ । ସେହି ସମୟରେ ଛରା ଥାନା ପେଲମା ଗାଁର ଜଣେ ନାବାଳିକାଙ୍କ ପ୍ରେମରେ ପଡିଯାଇଥିଲେ । ହେଲେ ଉଭୟଙ୍କ ସମ୍ପର୍କକୁ ଗ୍ରହଣ କରି ନଥିଲେ ଘରଲୋକ । ଉଭୟଙ୍କୁ ମିଳାମିଶା କରିବା ପାଇଁ ବାରଣ କରିଥିଲେ । ଶେଷରେ ବାହା ପାଇଁ ପରିବାର ଲୋକେ ବାଧା ଦେବାରୁ ସାତ ଦିନ ତଳେ ଫେରାର ମାରିଥିଲେ ପ୍ରେମୀ ଯୁଗଳ ।

ଦୁଇଜଣ ଯାକ ଲୁକିଛପି ସାତ ଦିନ ହେଲା ବଲାଙ୍ଗିର ସହର ଉପକଣ୍ଠ ଛୁଇଁବନ୍ଧ ଠାରେ ଥିବା ଏକ ସିମେଣ୍ଟ ଇଟା କାରଖାନାରେ କାମ କରୁଥିଲେ । ସେପଟେ ନାବାଳିକାଙ୍କ ପରିବାର ଲୋକେ ଛତିଶଗଡ଼ ଛରା ଥାନାରେ ନିଖୋଜ ନେଇ ଲିଖିତ ଅଭିଯୋଗ କରିଥିଲେ । ପୋଲିସ ତଦନ୍ତ କରି ଫେରାର ପ୍ରେମୀ ଯୁଗଳ ବଲାଙ୍ଗିର ସହର ଭିତରେ ଥିବା ଜାଣିବାକୁ ପାଇଥିଲା ।

ତିନିଦିନ ହେଲା ଛତିଶଗଡ଼ ପୋଲିସ ବଲାଙ୍ଗିର ସହର ଭିତରେ ଡେରା ବାନ୍ଧିଥିଲା । ଆଜି ଉଭୟଙ୍କୁ ଛତିଶଗଡ଼ ପୋଲିସ କାବୁ କରିଥିଲା । ନାବାଳିକାକୁ ଉଦ୍ଧାର କରିବା ସହିତ ଯୁବକ ଉମାଶଙ୍କରକୁ ଗିରଫ କରିଛି । ଏନେଇ କେହି କୌଣସି ପ୍ରକାର ମତାମତ ଦେଇନାହାନ୍ତି ।