ମହିଳା ASIଙ୍କୁ ଯୌନ ନିର୍ଯାତନା ! ‘ପ୍ରଥମେ ଶାରିରୀକ ସଂପର୍କ ରଖ, ତା’ପରେ ନିୟମିତ କରାଯିବ ଛୁଟି’

ପ୍ରଥମେ ଶାରିରୀକ ସଂପର୍କ ରଖ, ତା’ପରେ ନିୟମିତ କରାଯିବ ଛୁଟି । ଏଭଳି କହି ଜଣେ ହୋମଗାର୍ଡ ତାଙ୍କୁ ଯୌନ ନିର୍ଯାତନା ଦେଇଥିବା ଅଭିଯୋଗ କରିଛନ୍ତି ସୋନପୁରରେ କାର୍ଯ୍ୟରତ ଜଣେ ମହିଳା ASI । ଏହି ଘଟଣା ପରଠୁ ଲାଗିରହିଛି ହଇଚଇ । ହୋମଗାର୍ଡ ରାଜକୁମାର ପ୍ରଧାନଙ୍କ ବିରୋଧରେ ଏଭଳି ଅଭିଯୋଗ ହୋଇଛି । ଏ ସଂପର୍କରେ ଏସପିଙ୍କ ନିକଟରେ ଅଭିଯୋଗ ସତ୍ତ୍ୱେ, କୌଣସି ପଦକ୍ଷେପ ନିଆନଯିବାରୁ ଆଇଜିଙ୍କ ଦ୍ୱାରସ୍ଥ ହୋଇଥିଲେ ମହିଳା ASI ।

ଆଇଜିଙ୍କ ନିର୍ଦ୍ଦେଶରେ ଅତିରିକ୍ତ ଏସପି ପାହ୍ୟାର ଜଣେ ଅଧିକାରୀ ତଦନ୍ତ ଜାରି ରଖିଛନ୍ତି । ସଂପୃକ୍ତ ମହିଳା ASIଙ୍କ ଅଭିଯୋଗ, ଗତ ଅଗଷ୍ଟରେ ନିଜ ଛୁଟିକୁ ନିୟମିତ କରିବା ପାଇଁ ସୋନପୁର ହେଡକ୍ୱାର୍ଟରର ହୋମଗାର୍ଡ ରାଜକୁମାର ପଧାନଙ୍କୁ ଯୋଗାଯୋଗ କରିଥିଲେ । କିନ୍ତୁ ଶାରୀରିକ ସଂପର୍କ ରଖିଲେ ହିଁ କରେଇଦେବେ ବୋଲି କହିଥିଲେ । ତେବେ ହୋମଗାର୍ଡ ରାଜକୁମାର ପଧାନ ସୋନପୁର ଏସ୍.ପିଙ୍କ ଅତି ଅନ୍ତରଙ୍ଗ ଥିବାରୁ ମହିଳା ASI ତାଙ୍କ ସହିତ କଥାବାର୍ତ୍ତା କରିଥିଲେ ବୋଲି କହିଛନ୍ତି ।

ଏ ସଂପର୍କରେ ସୋନପୁର ଏସ୍.ପି.ଙ୍କୁ ମହିଳା ASI ଜଣକ ଲିଖିତ ଅଭିଯୋଗ କରିଥିଲେ । କିନ୍ତୁ କୌଣସି କାର୍ଯ୍ୟାନୁଷ୍ଠାନ ନହେବାରୁ ଉତ୍ତରାଞ୍ଚଳ ଆଇଜିଙ୍କ ନିକଟରେ ଅଭିଯୋଗ ଦାଖଲ କରିଛନ୍ତି । ଯାହାର ତଦନ୍ତ ଜାରି ରହିଛି । କିନ୍ତୁ, ଅଭିଯୋଗ ପରେ ମହିଳା ASIଙ୍କ ଉପରେ ରାଗ ରଖି, ତାର ଦୁଇ ଦିନ ପରେ ଗଞ୍ଜେଇ ମାମଲାରେ ଫସେଇବାକୁ ହୋମଗାର୍ଡ ଓ ଅନ୍ୟ ବରିଷ୍ଠ ପୋଲିସ ଅଧିକାରୀ ଉଦ୍ୟମ କରୁଥିବା ଅଭିଯୋଗ କରିଛନ୍ତି ମହିଳା ASI ଜଣକ । ତାଙ୍କ ସ୍କୁଟିରୁ ଗଞ୍ଜେଇ ଜବତ କରିଥିବା ଦର୍ଶାଇ ତାଙ୍କୁ ଫସାଇବାକୁ ଉଦ୍ୟମ କରୁଥିବା ଅଭିଯୋଗ କରିଛନ୍ତି ମହିଳା ASI ।

ତେବେ ଘଟଣା ସଂପର୍କରେ ଆଡିସନାଲ ଏସ୍.ପି.ପାହ୍ୟାର ଅଧିକାରୀ ନାରାୟଣ ନାଏକ ତଦନ୍ତ କରୁଛନ୍ତି । ଏନେଇ ହୋମଗାର୍ଡ ରାଜକୁମାର ପଧାନଙ୍କ ପ୍ରତିକ୍ରିୟା ମିଳିନାହିଁ । ସେହିପରି ସୋନପୁର ଏସ୍.ପି ମଧ୍ୟ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି ।