ଭାଇଜାଗରୁ ଉଦ୍ଧାର ହେଲା ବିକ୍ରି ଶିଶୁ, ପାରାଦୀପ ହସ୍ପିଟାଲରେ ଭର୍ତ୍ତି

ପାରାଦୀପରେ ଶିଶୁ ପୁତ୍ର ବିକ୍ରି ଅଭିଯୋଗ ଘଟଣାରେ କାମ ଦେଲା ପ୍ରଶାସନର ଚେତାବନୀ । ପ୍ରଶାସନର ଚେତାବନୀ ପରେ ଶିଶୁପୁତ୍ର ଉଦ୍ଧାର ହୋଇଛି । ଶିଶୁଟି ଉଦ୍ଧାର ପରେ ପାରାଦୀପ ହସ୍ପିଟାଲରେ ଭର୍ତ୍ତି କରାଯାଇଛି । ଶିଶୁଟିକୁ ଦଲାଲଙ୍କ ସମ୍ପର୍କୀୟ ଭାଇଜାଗରୁ ଆଣି ପାରାଦୀପ ପୋଲିସକୁ ଦେଇଥିବା ସୂଚନା ମିଳିଛି ।

ତେବେ ନବଜାତ କେଉଁଠି, କାହା ପାଖରେ ରହିବ ନିଷ୍ପତ୍ତି ନେବ ସିଡବ୍ଲୁସି । ଏପଟେ ଘଟଣା ପ୍ରଘଟ ପରଠାରୁ ନବଜାତର ମାଆ ଗାଏବ ରହିଛି । ୨୪ ଘଣ୍ଟାରେ ଶିଶୁକୁ ଆଣି ଫେରାଅ ନହେଲେ ବନ୍ଧା ହେବ । ଦଲାଲଙ୍କ ସଂପର୍କୀୟଙ୍କୁ ପ୍ରଶାସନର ଏଭଳି ତାଗିଦ ପରେ ଶିଶୁକୁ ଫେରାଇ ଦେଇଛି ଦଲାଲ ।

ଅଧିକ ପଢ଼ନ୍ତୁ: ଝିଅ ଜନ୍ମ ହେଲା ବୋଲି, ହସ୍ପିଟାଲ୍‌ରୁ ଘରକୁ ଆସିବା ପରେ ମାରିଦେଲା ବାପା

ଏକ ଲକ୍ଷ ଟଙ୍କାରେ ଭାଇଜାଗରେ ଦିନକର ଶିଶୁ ବିକ୍ରି ଘଟଣାରେ ଜଗତସିଂହପୁର ଜିଲ୍ଲା ଶିଶୁ ସୁରକ୍ଷା କମିଟିର ଅଧ୍ୟକ୍ଷା ଶକୁନ୍ତଳା ଚୌଧୁରୀଙ୍କ ନେତୃତ୍ୱରେ ପାରାଦୀପରେ ଛାନଭିନ କରୁଥିବା ୪ ଜଣିଆ ଟିମ୍ ଏବଂ ପାରାଦୀପ ପୋଲିସ ଘଟଣାର ଖୋଳତାଡ଼ ଜାରି ରଖିଛନ୍ତି । ତେବେ ଏନେଇ ସଂପୃକ୍ତ ଶିଶୁର ମାଆ କିମ୍ବା ପୋଲିସର ପ୍ରତିକ୍ରିୟା ମିଳିପାରିନି । ଶିଶୁଟିକୁ ନିଜେ ଦଲାଲ୍ ପାରାଦୀପ ଆଣି ଆସିଥିବା ସୂଚନା ମିଳିଛି ।

ଗତ ରବିବାର ମାମିନା ସର୍ଦ୍ଦାର ନାମ୍ନୀ ଜଣେ ଆଦିବାସୀ ମହିଳା ଅଠରବାଙ୍କି ସରକାରୀ ଡାକ୍ତରଖାନାରେ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ ଏବଂ ସୋମବାର ଉକ୍ତ ଶିଶୁପୁତ୍ରକୁ ଆନ୍ଧ୍ର ଭାଇଜାଗର ଜଣେ ତେଲୁଗୁ ବ୍ୟକ୍ତିଙ୍କୁ ବିକି ଦେଇଥିବା ଅଭିଯୋଗ ହେଉଛି । ନୂଆବଜାରର ଜଣେ ଦଲାଲ ପ୍ରରୋଚନାରେ ଲକ୍ଷେ ଟଙ୍କାରେ ଛୁଆ ବିକ୍ରି କରିଥିବା କଥା ସାମ୍ନାକୁ ଆସିଛି ।

ସୂଚନା ଅନୁସାରେ ମାମିନା ପ୍ରଥମେ ଷଣ୍ଢକୁଦ ବସ୍ତିରେ ରହୁଥିଲେ । ନିଜର ଗର୍ଭ ନଷ୍ଟ କରିବାକୁ ଚାହିଁବାରୁ ମାଙ୍ଗା ନାମ୍ନୀ ଜଣେ ତେଲୁଗୁ ମହିଳା ତାଙ୍କୁ ବାରଣ କରିବା ସହିତ ମାମିନାର ଦେଖାଶୁଣା କରୁଥିଲେ ଓ ସମୟକୁ ସମୟ ଚିକିତ୍ସା କରାଉଥିଲେ । ପିଲା ଜନ୍ମ ହେଲେ ସେ ପିଲାକୁ ରଖିବେ ବୋଲି ଆଦିବାସୀ ମହିଳାକୁ ଭରସା ଦେଇଥିଲେ । ମାମିନାର ଥିବା ଝିଅର ଭବିଷ୍ୟତ ପାଇଁ ମଧ୍ୟ ୩୦ ହଜାର ଟଙ୍କା ଦେବେ ବୋଲି କହିଥିଲେ ।

ଗତ ଶୁକ୍ରବାର ଅଠରବାଙ୍କି ସରକାରୀ ଡାକ୍ତରଖାନାରେ ମାମିନା ଭର୍ତ୍ତି ହୋଇଥିଲେ । ରବିବାର ଏକ ଶିଶୁପୁତ୍ରକୁ ଜନ୍ମ ଦେଇଥିଲେ । ଆଉ ସୋମବାର ଜଣେ ଦଲାଲ ମାଧ୍ୟମରେ ନିଜ କୋଳର ଛୁଆକୁ ଭାଇଜାଗ ପଠାଇ ଦେଇଥିଲେ । ଏ କଥା ଜାଣିବା ପରେ ମାଙ୍ଗା ସ୍ଥାନୀୟ ପରିଷଦ ଓ କିଛି ମହିଳାଙ୍କୁ ସାଙ୍ଗରେ ନେଇ ମାମିନା ପାଖକୁ ଯାଇ ପାଟିତୁଣ୍ଡ କରିଥିଲେ ।

ଅଧିକ ପଢ଼ନ୍ତୁ: ଜନ୍ମ କଲା ଛୁଆକୁ ପୋଷ୍ୟ ସନ୍ତାନ ପାଇଁ ଦେଇଦେଲେ ଦମ୍ପତି, କହିଲେ ଛୁଆ ପାଳିବାକୁ ଆମ ପାଖରେ ସମୟ ନାହିଁ