‘ଯଦି ପୋଷ୍ଟମର୍ଟମ କରିବ, ତେବେ ୮ଶହ ବାହାର କର... ମାଲ୍‌ ମାରିକି ଶବ କାଟିଦେବୁ..’

ଟାଉନ୍‌ ଟାଇଗର ଜିପ୍‌ରେ ଜଣେ ଭଦ୍ର ଲୋକ ବସିଛନ୍ତି । ଆଉ ୮ ଶହ ଟଙ୍କା ଦେବା ପାଇଁ କହୁଛନ୍ତି । ଏମିତି ଦୃଶ୍ୟ ଏବେ ସୋସିଆଲ ମିଡିଆରେ ଗୋଟିଏ ମୋବାଇଲରୁ ଅନ୍ୟ ମୋବାଇଲକୁ ଘୂରି ବୁଲୁଛି । ଆଉ ଏମିତି ଦୃଶ୍ୟ ଦେଖିବା ପରେ ସମସ୍ତଙ୍କ ମନରେ ପ୍ରଶ୍ନ ଆସୁଥିବ ସିଏ ଟଙ୍କା କାହିଁକି ମାଗୁଛନ୍ତି? ଦର୍ଶକବନ୍ଧୁ ଟଙ୍କା ସେ କାହିଁକି ମାଗୁଛନ୍ତି ତାହା ଜାଣିଲେ ଆପଣଙ୍କ ହୋସ୍‌ ଉଡିଯିବ । କାରଣ ଶବ ବ୍ୟବଚ୍ଛେଦ ଲାଗି ସେହି ବ୍ୟକ୍ତି ଜଣକ ମାଗୁଛନ୍ତି ଟଙ୍କା ।

ବାପା ସାମ୍ନାରେ ପୁଅର ଜୀବନ ଚାଲିଗଲା । ଅପମୃତ୍ୟୁ ହୋଇଥିବାରୁ ଡାକ୍ତରଖାନାକୁ ପୋଷ୍ଟମର୍ଟମ କରିବା ଲାଗି ଶବ ବି ଆସିଲା । ହେଲେ ବ୍ୟବଚ୍ଛେଦ ପୂର୍ବରୁ ଚାଲିଲା ମୂଲଚାଲ । ମୟୁରଭଞ୍ଜ ରାଇରଙ୍ଗପୁର ଏ ଭିଡିଓ ସମସ୍ତଙ୍କୁ ବିଚଳିତ କରିଛି । ପୋଲିସ ଉପସ୍ଥିତିରେ ଜଣେ ଅସହାୟ ଗରିବ ବାପାକୁ ନିଜ ପିଲାର ଶବ ବ୍ୟବଚ୍ଛେଦ କରିବା ପାଇଁ ଆଠ ଶହ ଟଙ୍କା ଲାଞ୍ଚ ମାଗାଯିବା ସହିତ ଟଙ୍କା ନ ଦେଲେ ରିପୋର୍ଟ ଦେବି ନାହିଁ, ଅଧା ଟଙ୍କା ଦେଲେ ଅଧା ରିପୋର୍ଟ ଦେବି ବୋଲି ଧମକ ଦେଇଥିଲେ ଡାକ୍ତରଖାନାର କର୍ମଚାରୀ।

#୮ଶହ_ଦିଅ_ମାଲ୍‌_ମାରିକି_ଶବ_କାଟିଦେବୁ
ବାପା ଆଗରେ ଚାଲିଗଲା ପିଲା । ପୋଷ୍ଟମର୍ଟମ ପାଇଁ ମେଡିକାଲ ପହଞ୍ଚିବା ପରେ...ଶବ କାଟିବାକୁ ୮ ଶହ ଟଙ୍କା ମାଗିଲେ ମେଡିକାଲ କର୍ମଚାରୀ । ସିଧାସିଧା କହିଲେ ଟଙ୍କା ଦେବା ପରେ ଆମେ ମାଲ୍‌ ମାରିବୁ, ପରେ କାଟିବୁ । ଏବେ ଭାଇରାଲ ହେଲା ଭିଡିଓ #SpecialStory#Odisha#OTVpic.twitter.com/LnaOFXqVD5

— ଓଟିଭି (@otvkhabar) March 16, 2023

ମୟୁରଭଞ୍ଜ ମଣଦା ଅଞ୍ଚଳର ଜଣେ ପ୍ରସୂତୀଙ୍କ ପ୍ରସବ ବେଦନା ହେବା ପରେ ପରିବାର ଲୋକ ତାଙ୍କୁ ମେଡିକାଲରେ ଭର୍ତ୍ତି କରିଥିଲେ । ହେଲେ ପିଲା ଜନ୍ମ ହେବାର ଦୁଇଦିନ ପରେ ମୃତ୍ୟୁ ହୋଇଥିଲା । ଚିକିତ୍ସା ଅବହେଳା ପାଇଁ ପିଲାର ମୃତ୍ୟୁ ହୋଇଥିବା ନେଇ ଥାନାରେ ଅଭିଯୋଗ ପରେ ମୃତ ଶିଶୁର ଶବ ବ୍ୟବଚ୍ଛେଦ ଲାଗି ମେଡିକାଲରେ ପହଞ୍ଚିଲେ ବାପା-ମାଆ । ହେଲେ ଶବ ବ୍ୟବଚ୍ଛେଦ କରିବାକୁ ହେଲେ ୮ ଶହ ଟଙ୍କା ଦେବାକୁ ହେବ ବୋଲି କହିଥିଲେ ମେଡିକାଲର ଜଣେ କର୍ମଚାରୀ ।

ଏବେ ନୁହେଁ ବହୁପୂର୍ବରୁ ବି ରାଇରଙ୍ଗପୁର ମେଡିକାଲରେ ଲାଂଚ କାରବାର ହେଉଥିବା ଖବର ପ୍ରକାଶ ପାଇବା ପରେ ଜଣେ କର୍ମଚାରୀଙ୍କୁ ନିଲମ୍ବନ କରାଯାଇଥିଲା । ଏବେ ପୁଣି ଥରେ କୁନି ପିଲାର ଶବ ବ୍ୟବଚ୍ଛେଦ ଲାଗି ୮ ଶହ ଟଙ୍କା ଲାଂଚ ମଗାଯାଉଥିବାର ଭିଡିଓ ଭାଇରାଲ ହେବା ପରେ ପୁଣି ଥରେ ବଢିଛି ଚର୍ଚ୍ଚା । ଭାଇରାଲ ଭିଡିଓ ସମ୍ପର୍କରେ ରାଇରଙ୍ଗପୁର ଏଡିଏମଙ୍କୁ ପଚାରିବାରୁ ସେ  କ୍ୟାମେରା ଆଗରେ କିଛି କହିନଥିଲେ ବି ଯିଏ ଲାଂଚ ମାଗିଛନ୍ତି ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ପ୍ରତିଶ୍ରୁତି ଦେଇଛନ୍ତି ।

(ବାରିପଦାରୁ ମାନିକଲାଲ୍‌ ପାଣି)