ଶିକ୍ଷକ ନାଁରେ କଳଙ୍କ। ନାବାଳିକା ଛାତ୍ରୀକୁ ବି ଛାଡ଼ିଲେନି। ୩ ଜଣ ଶିକ୍ଷକ ନାବାଳିକାକୁ ଗଣ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ତାମିଲନାଡୁର କୃଷ୍ଣଗିରିର ପୋଚମପାଲି ହାଇସ୍କୁଲର ଏହି ଘଟଣା ସମଗ୍ର ଅଂଚଳରେ ଚହଳ ପକାଇଛି। ଏନେଇ ପୀଡିତାଙ୍କ ମା’ ଥାନାରେ ଅଭିଯୋଗ କରିବା ପରେ ସବୁ ଘଟଣା ଉପରୁ ପରଦା ହଟିଛି।
ତାମିଲନାଡୁର କୃଷ୍ଣଗିରିର ପୋଚମପାଲି ହାଇସ୍କୁଲରେ ପଢ଼ୁଥିବା ଜଣେ ନାବାଳିକା ଝିଅକୁ ସ୍କୁଲର ତିନି ଜଣ ଶିକ୍ଷକ ଗଣବଳାତ୍କାର କରିଥିବା ଅଭିଯୋଗ ହୋଇଛି। ପୀଡିତାଙ୍କ ମାଆ ତିନି ଜଣ ଶିକ୍ଷକଙ୍କ ବିରୋଧରେ ପୋଲିସରେ ଅଭିଯୋଗ କରିଛନ୍ତି। ଝିଅଟି ଗୋଟିଏ ମାସ ପାଇଁ ସ୍କୁଲ ଯାଉନଥିଲା। ସ୍କୁଲର ପ୍ରଧାନଶିକ୍ଷକ ଏନେଇ ପରିବାର ଲୋକଙ୍କ ସହ ସଂପର୍କ କରିଥିଲେ। ଛାତ୍ରୀଜଣକ କାହିଁକି ସ୍କୁଲକୁ ଆସୁନାହାଁନ୍ତି ବୋଲି ତାଙ୍କ ମା’ଙ୍କୁ ପଚାରିଥିଲେ। ଏହାପରେ ପୀଡିତାଙ୍କ ମା’ ପ୍ରଧାନଶିକ୍ଷକଙ୍କୁ ଏହି ଘଟଣା ବିଷୟରେ ଜଣାଇଥିଲେ।
ପ୍ରଧାନଶିକ୍ଷକ ତୁରନ୍ତ ତାଙ୍କୁ ପୋଲିସରେ ଅଭିଯୋଗ କରିବାକୁ ଏବଂ ଜିଲ୍ଲା ଶିଶୁ ସୁରକ୍ଷା ଅଧିକାରୀଙ୍କୁ ରିପୋର୍ଟ କରିବାକୁ ପରାମର୍ଶ ଦେଇଥିଲେ। ଅଭିଯୋଗ ପରେ, କର୍ତ୍ତୃପକ୍ଷ ଝିଅଟିକୁ ଡାକ୍ତରଖାନାରେ ଭର୍ତ୍ତି କରିଥିଲେ। ବର୍ତ୍ତମାନ ଝିଅଟିର ଚିକିତ୍ସା ଚାଲିଛି। ଏହି ମାମଲାରେ ପୋଲିସ POCSO ଅନୁଯାୟୀ ଏକ ମାମଲା ରୁଜୁ କରିଛି। କୃଷ୍ଣଗିରିର ମହିଳା ପୋଲିସ ଟିମ୍ ସମସ୍ତ ତିନି ଅଭିଯୁକ୍ତଙ୍କୁ ଗିରଫ କରିଛି। ତିନି ଜଣଙ୍କୁ ୧୫ ଦିନର ପୋଲିସ ହେପାଜତକୁ ପଠାଇ ଦିଆଯାଇଛି। ଘଟଣା ଜଣାପଡ଼ିବା ପରେ, ଝିଅଟିର ସମ୍ପର୍କୀୟମାନେ ପ୍ରତିବାଦ କରି ତିନି ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି।