LIVE TV
ଦିନକୁ ଦିନ ଏବେ ଅନ୍ଲାଇନ୍ ଠକେଇ ବଢ଼ିବାରେ ଲାଗିଛି । କେବଳ ଓଡ଼ିଶାରେ ନୁହେଁ ସାରା ଦେଶରେ ଅନ୍ଲାଇନ୍ ଠକେଇ ବଢ଼ୁଛି । ବିଭିନ୍ନ ଆପ୍ ମାଧ୍ୟମରେ ସାଇବର ଲୁଟେରା ଲୋକଙ୍କୁ ଲୁଟୁଥିବା ବେଳେ ମେସେଜ୍ ଓ କଲ ମାଧ୍ୟମରେ ବି ଲୁଟ୍ର ଶିକାର ହେଉଛନ୍ତି ଲୋକ । ଆଉ ଲୁଟ୍ର ଶିକାର ହେବା ପରେ ଲୋକେ ଆତ୍ମହତ୍ୟା କରୁଛନ୍ତି । ଯାହାକୁ ନେଇ ଏବେ ଚିନ୍ତା ବଢ଼ିଛି । ସାଧାରଣତଃ ଆଣ୍ଡରଏଡ୍ ମୋବାଇଲ ଧରୁଥିବା ଲୋକ ଏବେ ଚିନ୍ତାରେ ପଡ଼ିଛନ୍ତି । କେତେବେଳେ କେଉଁଠୁ କଲ ଆସିବ କିମ୍ବା ମୋବାଇଲ୍ରେ କେଉଁ ସୁଇଚ୍ ଚିପି ହୋଇଯିବ, ଆଉ ଆଖି ପିଛୁଳାକେ ସାରା ଜୀବନର ସଞ୍ଚୟ ଉଭାନ ହୋଇଯିବ ।
Also Read
ଏହାରି ଭିତରେ ଏବେ ଏହି ଅନ୍ଲାଇନ୍ ଠକେଇର ଏକ ନୂଆ ଟ୍ରେଣ୍ଡ ଦେଖିବାକୁ ମିଳିଛି । ଗୁଗୁଲ ପ୍ଲେ-ଷ୍ଟୋରରେ ଏଭଳି ଅନେକ ଫ୍ରଡ୍ ଆପ୍ଲିକେସନ୍ ରହିଛି, ଯେଉଁଥିରେ ଲୋକଙ୍କୁ ମାତ୍ର କିଛି ମିନିଟ୍ରେ ଋଣ ମିଳୁଛି । ଆଉ ଏହି ଆପ୍ ମାଧ୍ୟମରେ ଲୋକ ଋଣ ନେଉଛନ୍ତି । ହେଲେ ସେହି ଋଣ ସୁଝିବାକୁ ତାଙ୍କୁ ଅନେକ ପ୍ରାପ୍ୟ ଦେବାକୁ ପଡ଼ୁଥିବା ଦେଖାଯାଇଛି । ଯେତିକି ସହଜରେ ଋଣ ମିଳିପାରୁଛି, ତାଠାରୁ ୧୦ ଗୁଣା କଷ୍ଟ ଦେଇ ଋଣ ଆଦାୟ କରୁଛନ୍ତି ଏହି ଫ୍ରଡ୍ ଆପ୍ଲିକେସନ୍ ପଛରେ ରହିଥିବା ରାକେଟ୍ । ଲୋକଙ୍କୁ ନାନା ପ୍ରକାର ବ୍ଲାକ୍ ମେଲିଂ କରି ଅର୍ଥ ଆଦାୟ କରୁଛନ୍ତି । ଏମିତିକି ସେମାନଙ୍କ ମୁତାବକ ଟଙ୍କା ନଦେଲେ ଋଣ ନେଇଥିବା ଲୋକଙ୍କୁ ବଦନାମ କରିବେ ବୋଲି ଧମକ ଦେଉଛନ୍ତି । ଏଭଳି ବିଭିନ୍ନ ଉପାୟରେ ଲୋକଙ୍କୁ ମାନସିକ ଚାପ ପକାଉଛନ୍ତି । ଯାହାଫଳରେ ଶେଷରେ ଉପାୟ ଶୂନ୍ୟ ହୋଇ ଋଣ ନେଇଥିବା ଲୋକଟି ଆତ୍ମହତ୍ୟା କରୁଛି ।
ତେବେ ଠିକ୍ ଏମିତି ଏକ ଘଟଣା ସାମ୍ନାକୁ ଆସିଛି ହାଇଦ୍ରାବାଦସ୍ଥିତ ରାଜେନ୍ଦ୍ରନଗରରୁ । ଏଠାରେ ପି ସୁନିଲ (୨୯) ନାମକ ଜଣେ ବ୍ୟକ୍ତି, ଲକ୍ଡାଉନ୍ ସମୟରେ ନିଜର ଚାକିରି ହରାଇଥିଲେ । ପରେ ଜୁଲାଇ ମାସରେ ସେ ବାପା ହୋଇଥିଲେ । ଆଉ ଡିସେମ୍ବର ୧୭ରେ ଆତ୍ମହତ୍ୟା କଲେ । ପୋଲିସ ଘଟଣାର ତଦନ୍ତ କରି କହିଲା ଯେ, ସୁନିଲ ଋଣ ଗ୍ରସ୍ତ ଥିଲେ । ଋଣ ବୋଝ ତଳେ ଚାପି ହୋଇ ଅସହାୟ ହୋଇପଡ଼ିଥିଲେ । ପରିବାର ପ୍ରତିପୋଷଣ ସହ ନିଜର ଖର୍ଚ୍ଚ ତୁଲାଇବାକୁ ସେ ଡିଜିଟାଲ ପ୍ଲାଟ୍ଫର୍ମରୁ ଋଣ ନେଇଥିଲେ । ଏହାପରେ ସେ ବାରମ୍ବାର ଅନ୍ଲାଇନ୍ ହାରାସମେଣ୍ଟର ସମ୍ମୁଖୀନ ହେଉଥିଲେ । ତାଙ୍କୁ ଧମକପୂର୍ଣ୍ଣ ଫୋନ୍ କଲ ଆସୁଥିଲା, ହ୍ୱାଟ୍ସ ଆପ୍ରେ ଧମକ ବ୍ଲାକ୍ମେଲିଂ ହେଉଥିଲା, ଏମିତିକି ତାଙ୍କ ପରିବାର ଓ ସାଙ୍ଗସାଥୀମାନଙ୍କୁ କଲ୍ କରି ଏହି ଫ୍ରଡ୍ କମ୍ପାନୀମାନେ ସୁନିଲଙ୍କୁ ଲଜ୍ଜିତ କରିବା ପାଇଁ ବି ପଛାଇନଥିଲେ ।
ଏହାର ଗୋଟିଏ ସପ୍ତାହ ପୂର୍ବରୁ ତେଲେଙ୍ଗାନାରେ ଠିକ୍ ଏହିଭଳି ଦୁଇଟି ମାମଲା ସାମ୍ନାକୁ ଆସିଥିଲା । ଏଡୁ ଶ୍ରବଣ ଯାଦବ (୨୩) ମେଡକ ଜିଲ୍ଲାରେ ରହୁଥିବା ଜଣେ ଚାଷୀ । ସେ ମଧ୍ୟ ଡିଜିଟାଲ ଆପ୍ ମାଧ୍ୟମରେ ଋଣ ନେଇଥିଲେ ଏବଂ ସୁଝି ପାରିନଥିଲେ । ସେହିଭଳି ୨୮ ବର୍ଷିୟ କ୍ରିନି ମୌନିକା । ସେ ଜଣେ ସରକାରୀ ଚାକିରିଆ । ସେ ମଧ୍ୟ ଡିଜିଟାଲ ଆପ୍ ମାଧ୍ୟମରେ ଋଣ ନେଇ ସୁଝିପାରିନଥିଲେ ।
ଗତ ଦୁଇ ମାସ ମଧ୍ୟରେ ସାରା ଦେଶରେ ଏଭଳି ଅନେକ ମାମଲା ସାମ୍ନାକୁ ଆସିଛି । ଡିଜିଟାଲ ଆପ୍ ମାଧ୍ୟମରେ ଋଣ ନେଉଛନ୍ତି ଏବଂ ସୁଝି ନପାରି ଆତ୍ମହତ୍ୟା କରୁଛନ୍ତି ।
