ବ୍ରହ୍ମପୁରରେ ବେଆଇନ ସୁନା କାରବାରର ପର୍ଦ୍ଦାଫାସ; ୨ କେଜି ସୁନା ସହ ୧ କୋଟି ୨୨ ଲକ୍ଷ ଟଙ୍କା ଜବତ

ବ୍ରହ୍ମପୁରରେ ବେଆଇନ ସୁନା କାରବାରର ପର୍ଦ୍ଦାଫାସ । ୨ କେଜି ୨ ଶହ ଗ୍ରାମ୍ ଓଜନର ୨୩ଟି ସୁନା ବିସ୍କେଟ୍ ସହ ନଗଦ ୧ କୋଟି ୨୨ ଲକ୍ଷ ଟଙ୍କା ଜବତ କରିଛି ଅବକାରୀ ବିଭାଗ । ଏହି ମାମଲାରେ ଦୁଇ ଜଣଙ୍କୁ ପୋଲିସ୍ ଅଟକ ରଖିଛି । ଅଭିଯୁକ୍ତମାନେ ହେଲେ ବ୍ରହ୍ମପୁର ଆନନ୍ଦ ଜୁଏଲର୍ସର ମାଲିକ ଆନନ୍ଦ ସୁବୁଦ୍ଧି ଓ ମହାରାଷ୍ଟ୍ର ସାଂଗଲି ଜିଲ୍ଲାର ଦଶରଥ ସୌକାତ ।

ଗତକାଲି ଅପରାହ୍ଣରେ ବ୍ରହ୍ମପୁରରୁ କଟକ ଯାଉଥିବା ଏକ OSRTC ବସ୍‌ରେ ଗଞ୍ଜେଇ ଚାଲାଣ ହେଉଥିବା ଖବର ପାଇଥିଲା ଅବକାରୀ ବିଭାଗ । ଲାଞ୍ଜିପଲୀ ଛକରେ ବସ୍‌କୁ ଅଟକାଇ ଚେକିଂ ବେଳେ ଅଭିଯୁକ୍ତ ଦଶରଥଠାରୁ ଦୁଇଟି ବ୍ୟାଗ୍ ମିଳିଥିଲା । ସେହି ବ୍ୟାଗ୍‌ରେ ନଗଦ ୧ କୋଟି ୨୨ ଲକ୍ଷ ଟଙ୍କା ରଖାଯାଇଥିଲା ।

ଏ ସଂପର୍କରେ ଅଧିକ ଖୋଳତାଡ଼ ପରେ ଦଶରଥ, ଆନନ୍ଦ ଜୁଏଲର୍ସକୁ ସୁନା ବିସ୍କେଟ୍ ଦେଇ ଟଙ୍କା ଆଣିଥିବା ମାନି ଯାଇଥିଲା । ପରେ ବୈଦ୍ୟନାଥପୁର ପୋଲିସ୍ ଉଭୟଙ୍କୁ ଅଟକ ରଖି ପଚରାଉଚରା କରିବା ପରେ ପୁରା ଘଟଣାର ପର୍ଦ୍ଦାଫାସ୍ ହୋଇଥିଲା । ସୁନା ବିସ୍କେଟ୍ କାରବାର ନେଇ ଅଭିଯୁକ୍ତ କୌଣସି ବିଲ୍ ଦେଖାଇପାରିନଥିବାରୁ ଏହାକୁ ସ୍ମଗଲିଂ ସୁନା ବୋଲି ସନ୍ଦେହ କରାଯାଉଛି । ପୋଲିସ୍ ଇନ୍‌କମ୍‌ ଟାକ୍ସ ବିଭାଗକୁ ଏ ସଂପର୍କରେ ଅବଗତ କରାଇଛି ।