LIVE TV
ଉତ୍ତରପ୍ରଦେଶ ମେନପୁରୀ ଜିଲ୍ଲାର କିଶନି ଥାନା ଅଞ୍ଚଳରେ ଗୋଟିଏ ପରିବାରର ୫ ଜଣଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଛି । ବଡ଼ ଭାଇ ହିଁ ପରିବାରର ସମସ୍ତଙ୍କୁ ହତ୍ୟା କରିଥିବା ସୂଚନା ମିଳିଛି । ତେବେ ଏହି କାଣ୍ଡ ଘଟାଇ ସାରିବା ପରେ ନିଜକୁ ନିଜେ ଗୁଳି ଚଳାଇ ଆତ୍ମହତ୍ୟା କରିଛି ଅଭିଯୁକ୍ତ । ଏଥିରେ ଆଉ ଦୁଇ ଜଣ ଆହତ ହୋଇଛନ୍ତି । ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ପୋଷ୍ଟମର୍ଟମ ପାଇଁ ପଠାଇ ଦେଇଛି । ଏହାସହ ପୋଲିସ ଅଧୀକ୍ଷକ ଘଟଣାର ତଦନ୍ତ ଆରମ୍ଭ କରିଛନ୍ତି ।
କିଶନି ଥାନା ଅଞ୍ଚଳର ଗୋକୁଲପୁର ଅରସରା ଗାଁରେ ଏହି ଲୋମଟାଙ୍କୁରା ଘଟଣା ଘଟିଛି । ଗତକାଲି ସନ୍ଧ୍ୟାରେ ଏଠାକାର ବାସିନ୍ଦା ସୋନୁ ଓରଫ ଅରୁଣଙ୍କ ବିବାହ ଶେଷହେବା ପରେ ସମସ୍ତେ ଘରକୁ ଫେରିଥିଲେ । ବିବାହ ପରର ସମସ୍ତ ରୀତିନୀତି ପରେ ଘରର ସମସ୍ତ ସଦସ୍ୟ ଶୋଇପଡିଥିଲେ ।
Also Read
ହେଲେ ରାତି ପ୍ରାୟ ୨ଟାରେ ସୋନୁଙ୍କ ବଡ ଭାଇ ଶିବବୀର ଟାଙ୍ଗିଆରେ ନିଜ ଭାଇ ସୋନୁ, ଭୁଲ୍ଲନ, ସୋନୁଙ୍କ ସ୍ତ୍ରୀ ସୋନୀ, ଭଉଣୀ ଜ୍ୱାଇଁ ସୌରଭ ସୋରାଭ ଏବଂ ତାଙ୍କ ବନ୍ଧୁ ଦୀପକଙ୍କୁ ଅତି ନିର୍ମମ ଭାବରେ ହତ୍ୟା କରିଥିଲେ । ଏହା ପରେ ଶିବବୀର ନିଜକୁ ଗୁଳି କରି ଆତ୍ମହତ୍ୟା କରିଥିଲେ । ଅନ୍ୟପଟେ ଶିବବୀରଙ୍କ ସ୍ତ୍ରୀ ଡଲି ଏବଂ ମାଉସୀ ସୁଷମାଙ୍କୁ ମଧ୍ୟ ଏଥିରେ ଆହତ ହୋଇଛନ୍ତି । ଉଭୟଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ଏସମ୍ପର୍କରେ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚି ପୋଲିସ ଅଧୀକ୍ଷକ ବିନୋଦ କୁମାର ତଦନ୍ତ ଆରମ୍ଭ କରିଛନ୍ତି । ତେବେ ଘଟଣାର କାରଣ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ । ପୋଲିସ୍ ସୂଚନା ଅନୁସାରେ, ଅଭିଯୁକ୍ତ ନୋଏଡାରେ ରହୁଥିବାବେଳେ ଏକ ଘରୋଇ କମ୍ପାନୀରେ କାମ କରୁଥିଲା । ଭାଇର ବିବାହ ପାଇଁ ଘରକୁ ଆସିଥିଲା । ହେଲେ ଏବେ ସୁଦ୍ଧା ହତ୍ୟାକାଣ୍ଡର କାରଣ ଜଣା ପଡିନାହିଁ।
