ଫିଟିଲା ନକଲି ଡାକ୍ତରଙ୍କ ଆଉ ଏକ ଗୁମର; ଚାକିରି ନାଁରେ ଲୋକଙ୍କୁ ଠକୁଥିଲେ

ନକଲି ଡାକ୍ତର ରମେଶ ସ୍ୱାଇଁଙ୍କର ଆଉ ଏକ ଗୁମର । ଗୁରୁଗ୍ରାମରେ ଚାକିରି ଦେବା ନାଁରେ ସେ ଠକେଇ କରି ଆଗରୁ ଗିରଫ ହୋଇଥିଲେ । ଦ୍ୱିତୀୟ ପତ୍ନୀ କମଲା ସ୍ୱାଇଁଙ୍କ ନାମରେ ମଧ୍ୟ ଏହି ଠକେଇ ମାମଲା ଥିଲା । ସେ ଆଗୁଆ ଜାମିନ ଆଣିଥିବା ପୋଲିସ ସୂଚନା ପାଇଛି । ରମେଶଙ୍କ ଦ୍ୱିତୀୟ ପତ୍ନୀ କମଳା ସ୍ୱାଇଁଙ୍କୁ ରିମାଣ୍ଡରେ ଆଣି ଜେରା ବେଳେ ଏହି ତଥ୍ୟ ଜଣାପଡ଼ିଛି ।

ନିଜ ସ୍ୱାମୀଙ୍କ ସବୁ କଳା କାରନାମା ଓ ଠକେଇରେ ମଧ୍ୟ କମଳା ସାମିଲ ଥିବା ଜଣାପଡ଼ିଛି । ରମେଶ ଗିରଫ ହେଲେ ତାଙ୍କୁ ମୁକୁଳାଇବାକୁ ପ୍ରଥମ ପତ୍ନୀ ଶାନ୍ତିଲତାଙ୍କୁ କମଳା ହିଁ ଟଙ୍କା ଦେଉଥିଲେ । ପ୍ରଥମ ପତ୍ନୀ ଶାନ୍ତିଲତା ଦେବୀ ମଧ୍ୟ ରମେଶଙ୍କ ସବୁ ଅପରାଧରେ ସାମିଲ ଥିବା ନେଇ ପୋଲିସ ପକ୍ଷରୁ ସୂଚନା ଦିଆଯାଇଛି ।

ପୂର୍ବରୁ ନକଲି ଡାକ୍ତର ରମେଶ ସ୍ୱାଇଁଙ୍କ ଦ୍ୱିତୀୟ ପତ୍ନୀ କମଳା ସ୍ୱାଇଁଙ୍କୁ ଗିରଫ କରିଥିଲା ପୋଲିସ । ଝାଡ଼ଖଣ୍ଡରୁ କମିଶନରେଟ୍ ପୋଲିସର ଏକ ଟିମ୍ ରମେଶଙ୍କ ଦ୍ୱିତୀୟ ପତ୍ନୀଙ୍କୁ ଗିରଫ କରିଥିଲା । ଡାକ୍ତର ପତ୍ନୀ କମଳା ଗୁଜରାଟର ଜାମନଗରରେ କାମ କରୁଥିଲେ । ରମେଶଙ୍କ କାରନାମା ପ୍ରଘଟ ପରଠୁ ସେ ମଧ୍ୟ ଫେରାର ଥିଲେ । ରାଜ୍ୟରେ ତଥା ରାଜ୍ୟ ବାହାରେ ତାଙ୍କୁ ଖୋଜୁଥିବା ପୋଲିସ ଶେଷରେ ତାଙ୍କୁ ବାନ୍ଧିବାକୁ ସକ୍ଷମ ହୋଇଥିଲା ।