LIVE TV
ସାଂଘାତିକ ଦାଉ ସାଧୁଛନ୍ତି ସାଇବର ଠକ...ଆଖି ପିଛୁଳାକେ ଖାଲି କରିଦେଉଛନ୍ତି ବ୍ୟାଙ୍କ ଆକାଉଣ୍ଟ...ଚୁଟକୀରେ ଚୁନା ଲଗାଇଦେଉଛନ୍ତି ଲକ୍ଷ ଲକ୍ଷ, କୋଟି କୋଟି ଟଙ୍କା । ଭୁବନେଶ୍ବର ସୁନ୍ଦରପଦାରେ ନକଲି କଲ୍ ସେଣ୍ଟର ସ୍ଥାପନ କରି ଲୋକଙ୍କୁ ଲୁଟୁଥିଲେ ସାଇବର ଲୁଟେରା । ଏପରିକି ଆମେରିକା ଯାଏଁ ଭାରତୀୟ ବଂଶୋଦ୍ଭବଙ୍କୁ ଟାର୍ଗେଟ୍ କରି କରୁଥିଲେ ଫୋନ କଲ୍ । ଯାହାଙ୍କୁ ଗତକାଲି ଗିରଫ ପରେ ଆଜି ରିମାଣ୍ଡରେ ଯିବା ପରେ ୬ ଅଭିଯୁକ୍ତଙ୍କଠାରୁ ଏହି ଅନ୍ତର୍ଜାତୀୟ ରାକେଟର ଖୋଳତାଡ଼ କରିବ ପୋଲିସ । ଏଥିପାଇଁ ଭୁବନେଶ୍ବରରେ ସେଣ୍ଟ୍ରାଲ୍ ଆଇବି ବା କେନ୍ଦ୍ରୀୟ ଗୁଇନ୍ଦା ଟିମ୍ ପହଞ୍ଚିସାରିଛି । ଖୁବଶୀଘ୍ର କମିଶନରେଟ୍ ପୋଲିସ ଯିବ ପଶ୍ଚିମବଙ୍ଗ । କାରଣ ଏମାନେ ସମସ୍ତେ ବଙ୍ଗୀୟ ଯୁବକ। ବାଂଲାଦେଶୀ ଅସାଦ୍ଦୁର ଜମାନର ସିମ୍ ବକ୍ସ କ୍ରାଇମ୍ ଷ୍ଟାଇଲରେ ଚଲାଇଥିଲେ ମିନି ଟେଲିଫୋନ୍ ଏକ୍ସଚେଞ୍ଜ।
Also Read
କେବେ ସିମବକ୍ସ ରାକେଟ୍ ତ ଆଉ କେବେ ଫେକ୍ କଲ୍ ସେଣ୍ଟର । ଏଭଳି ନାନା ଫାଶ ପକାଇ ଚୁନା ଲଗାଉଛନ୍ତି ଏହି ସାଇବର ଲୁଟେରା । ନାନା ଆଳ କରି ସଫା କରିଦେଉଛନ୍ତି ବ୍ୟାଙ୍କ ଆକାଉଣ୍ଟ । ଏଇ ଯେମିତି କେନ୍ଦ୍ରାପଡ଼ା ସଦର ଥାନା ଛଘରିଆ ଗାଁରେ ବିଦ୍ୟୁତ୍ ବିଭାଗର କର୍ମଚାରୀ ଦୀପକ ବାରିକ । ଗତବର୍ଷ ଫେବୃୟାରୀରେ ପିଏଫ୍ ଆକାଉଣ୍ଟରୁ ୫ ହଜାର ଟଙ୍କା ଉଠାଣ ପାଇଁ ଗୁଗୁଲରେ ସର୍ଚ୍ଚ କରି EPFO ନାଁରେ ଥିବା ଏକ ଫେକ୍ କଷ୍ଟମରକେୟାର ନମ୍ୱରକୁ କଲ୍ କରିଥିଲେ । ସେହି ନମ୍ବର ଜରିଆରେ ଦୀପକଙ୍କୁ କୁହାଯାଇଥିଲା ଏକ ଆପ୍ ଡାଉନଲୋଡ୍ କରିବାକୁ । ଆଉ ଆପ୍ ଡାଉନଲୋଡ୍ ହେବା କ୍ଷଣି ଦୀପକଙ୍କ ଆକାଉଣ୍ଟରୁ ଗାୟବ ହୋଇଗଲା ୭୭ ହଜାର ଟଙ୍କା । ସେହିପରି ଆଉ ଜଣେ ହେଲେ ଗଞ୍ଜାମ ଜିଲ୍ଲା ବାଉଁଶଲୁଣ୍ଡିର ସୀମାଞ୍ଚଳ ସାହୁ । ତାଙ୍କ ଆକାଉଣ୍ଟରୁ ବି NEFT ମାଧ୍ୟମରେ ଗାୟବ ହୋଇଯାଇଛି ୯ ଲକ୍ଷ ଟଙ୍କା ।
ଲୋକଙ୍କ ସଚେତନତା ଅଭାବରୁ ନୂଆ ନୂଆ ଫଣ୍ଡା ଆପଣାଇ ଏଭଳି ଲୁଟପାଟ୍ ଚଳାଇଛନ୍ତି ସାଇବର ଲୁଟେରା । କ୍ରାଇମବ୍ରାଞ୍ଚର ତଥ୍ୟ କହୁଛି, ଗତ ୪ ବର୍ଷ ଭିତରେ ଅର୍ଥାତ ୨୦୨୧ରୁ ୨୦୨୪ ଜୁନ ମଧ୍ୟରେ ରାଜ୍ୟରେ ୫ ଶହ ୧ କୋଟିରୁ ଅଧିକ ଟଙ୍କାର ଚୁନା ଲଗାଇଛନ୍ତି ସାଇବର ଠକ। ଗତ ଜିଲ୍ଲାପାଳ-ଏସପି ମିଟରେ ମଧ୍ୟ ଏଭଳି ସାଇବର ଅପରାଧକୁ ନେଇ ଗଭୀର ଉଦବେଗ ପ୍ରକାଶ ପାଇଥିଲା । ଯାହାକୁ ରୋକିବା ଏବେ ପୋଲିସ ପାଇଁ ବଡ଼ ଚାଲେଞ୍ଜ ହୋଇଥିବାବେଳେ ଏଥିରୁ ବର୍ତ୍ତିବା ପାଇଁ ଲୋକଙ୍କୁ ସତର୍କ ଓ ସଚେତନ ହେବାକୁ ପରାମର୍ଶ ଦେଇଛନ୍ତି ସାଇବର ଏକ୍ସପର୍ଟ ।
- Reported by:
- MANOJ SWAIN , ATULYA BOUT , Rajesh Kumar Panda
