ଖୁଣ୍ଟୁଣୀ ଥାନା ଅନ୍ତର୍ଗତ ୫୫ ନମ୍ୱର ଜାତୀୟ ରାଜପଥ କଡ଼ରେ ଚାଲୁଥିବା ଚୋରା କୋଇଲା ଡିପୋ ଉପରେ ସ୍ପେଶାଲ୍ ସ୍କ୍ୱାଡ ପକ୍ଷରୁ ଚଢାଉ କରାଯାଇ ୧୪ ଜଣଙ୍କୁ ଧରିଛି ପୋଲିସ୍ । ଦୁଇଟି ମିନି ଟ୍ରକକୁ ମଧ୍ୟ ପୋଲିସ୍ ଜବତ କରିଛି । ଦୀର୍ଘ ଦିନ ଧରି ଖୁଣ୍ଟୁଣୀ ଅଞ୍ଚଳରେ କୋଇଲା ଚୋରା କାରବାର ଚାଲିଥିବା ଅଭିଯୋଗ ହୋଇଆସୁଥିଲା । ହେଲେ ଧରା ପଡୁନଥିଲେ କୋଇଲା ମାଫିଆ ।
କଟକ ଗ୍ରାମାଞ୍ଚଳ ଏସପି ପ୍ରତୀକ ସିଂଙ୍କ ନିକଟରେ ଅଭିଯୋଗ ହେବା ପରେ ସ୍ୱତନ୍ତ୍ର ସ୍କ୍ୱାଡକୁ ଅଚାନକ ଚଡାଉ କରିବାକୁ ସେ ନିର୍ଦ୍ଦେଶ ଦେଇଥିଲେ । ୫୫ ନମ୍ୱର୍ ଜାତୀୟ ରାଜପଥ କଡ଼ରେ ବିଭିନ୍ନ ଟ୍ରକରୁ ଚୋରା କୋଇଲା ଖାଲି କରୁଥିବା ବେଳେ ମାଡ଼ି ବସିଥିଲା ସ୍ପେଶାଲ୍ ସ୍କ୍ୱାଡ । ଦୁଇଟି ମିନି ଟ୍ରକକୁ ଜବତ କରିବା ସହ ଦୁଇ ଚୋରା କୋଇଲା ମାଫିଆଙ୍କୁ ଧରିବାରେ ସକ୍ଷମ ହୋଇଛି । ଏହି ଦୁଇ ମାଫିଆଙ୍କ ସମେତ ୧୪ ଜଣଙ୍କୁ ଖୁଣ୍ଟୁଣୀ ଥାନାରେ ଅଟକ ରଖାଯାଇଛି।
ଅଧିକ ପଢ଼ନ୍ତୁ: ଜଗନ୍ନାଥ ମନ୍ଦିରରୁ ଚୋରି; ନେଇଗଲେ ମହାପ୍ରଭୁଙ୍କ ସୁନା,ରୁପା ମୁକୁଟ ଓ ଦାନବାକ୍ସ
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ପ୍ରତିଦିନ ଶହ ଶହ କୁଇଣ୍ଟାଲ ଚୋରା କୋଇଲା ଖୁଣ୍ଟୁଣୀ ଅଞ୍ଚଳରୁ ବିଭିନ୍ନ ସ୍ଥାନକୁ ସ୍ଥାନାନ୍ତର କରାଯାଇଥାଏ । ମାଫିଆମାନେ ବିଭିନ୍ନ ଆଳରେ କୋଇଲା ଟ୍ରକ୍ ଡ୍ରାଇଭରମାନଙ୍କୁ ପ୍ରଲୋଭନ ଦେଖାଇ ଟ୍ରକରୁ କୋଇଲା ଚୋରି କରିଥାଆନ୍ତି । ଏହି ଚୋରା କୋଇଲାକୁ ନିକଟସ୍ଥ ଜଙ୍ଗଲରେ ଗଚ୍ଛିତ ରଖି ବିକନ୍ତି । କେବଳ ଟ୍ରକ ନୁହେଁ ବେଳେ ବେଳେ ଟ୍ରେନରୁ ମଧ୍ୟ କୋଇଲା ଚୋରି ହେଉଥିବାର ଅଭିଯୋଗ ହେଉଥିଲା । କୋଇଲା ଚୋରିରେ ଏକ ବଡ ଧରଣର ରାକେଟ୍ କାମ କରେ ବୋଲି ପୋଲିସ୍ କହିଛି । ତାଳଚେରରୁ ୫୫ ନମ୍ୱର ଜାତୀୟ ରାଜପଥରେ କଟକ ଓ ଭୁବନେଶ୍ୱର ଆଡକୁ ଆସୁଥିବା କୋଇଲା ବୋଝେଇ ଟ୍ରକଗୁଡିକ ଏହି ମାଫିଆଙ୍କ ଟାର୍ଗେଟରେ ରହୁଥିଲା ।
ପୋଲିସର ସ୍ୱତନ୍ତ୍ର ସ୍କ୍ୱାଡ ଏହି କୋଇଲା ଚୋରାଚାଲାଣ ଉପରେ ଗତ କିଛି ଦିନ ଧରି ନଜର ରଖିଥିଲା । କୋଇଲା ଚୋରି ପରେ ଡିପୋକୁ ନିଆଯାଉଥିଲା ଓ ପରେ ଡିପୋରୁ ବିଭିନ୍ନ ସ୍ଥାନକୁ ପଠାଯାଉଥିଲା। ସ୍ଥାନୀୟ ଲୋକମାନେ ଏହି ଚୋରି ବିଷୟରେ ଜାଣୁଥିଲେ ବି ଚୋରି କରୁଥିବା ମାଫିଆମାନେ ପ୍ରଭାବଶାଳୀ ହୋଇଥିବାରୁ ଲୋକମାନେ ଚୁପ୍ ରହୁଥିଲେ । ୧୪ ଜଣ ଧରାପଡିବା ପରେ ଅଧିକ ତଦନ୍ତ ଜାରି ରଖିଛି ପୋଲିସ୍ । ଅନ୍ୟ କେଉଁମାନେ ଏଥିରେ ସଂପୃକ୍ତ, ସେ ନେଇ ଖୋଳତାଡ କରୁଛି ପୋଲିସ୍ । ତେବେ କାହିଁକି ଆଗରୁ ଚୁପ୍ ବସିଥିଲା ଖୁଣ୍ଟୁଣୀ ପୋଲିସ୍, ତାହା ଏବେ ଚର୍ଚ୍ଚାର ବିଷୟ ପାଲଟିଛି ।