LIVE TV
ମୁଖ୍ୟ ଅଭିଯୁକ୍ତ ଶର୍ମିଷ୍ଠା ରାଉତଙ୍କୁ ଫାଶିଦଣ୍ଡ ଦିଆଯାଉ ବୋଲି ଦାବି କରିଛନ୍ତି ମୃତ କ୍ୟାମେରାମ୍ୟାନ ମାନସଙ୍କ ମାଆ ଜୟନ୍ତୀ ସ୍ୱାଇଁ ଏବଂ ଭାଇ ରାକେଶ କୁମାର ସ୍ୱାଇଁ । ମୋ ପୁଅକୁ କଲବଲ କରି ମାରିଛନ୍ତି, ସେମାନଙ୍କୁ ଫାଶି ଦିଆଯାଉ ବୋଲି କହିଛନ୍ତି ମାନସଙ୍କ ମାଆ । ମୋ ରୋଜଗାରିଆ ପୁଅକୁ ମାରିଦେଲେ, ଆମେ ଚଳିବୁ କେମିତି ବୋଲି ସେ ପ୍ରଶ୍ନ କରିଛନ୍ତି ।
ପୋଲିସ ପାଇଁ ଆଜି ମୋ ପୁଅର ମୃତ୍ୟୁ ଘଟିଲା ବୋଲି କହିଛନ୍ତି ମାନସଙ୍କ ମା ଜୟନ୍ତୀ ସ୍ୱାଇଁ । ପୋଲିସ ଦିନ ଗଡ଼ାଇ ଚାଲିଲା ବୋଲି ସେ ଅଭିଯୋଗ କରିଛନ୍ତି । ଯଦି ପୋଲିସ ତୁରନ୍ତ ପଦକ୍ଷେପ ନେଇଥାନ୍ତା, ମୋ ପୁଅ ଆଜି ବଞ୍ଚି ଥାଆନ୍ତା ବୋଲି କହିଛନ୍ତି ଜୟନ୍ତୀ ସ୍ୱାଇଁ। ମାନସଙ୍କ ଭାଇ ରାକେଶ କହିଛନ୍ତି ଯେ, ଶର୍ମିଷ୍ଠାଙ୍କ ସମେତ ଆଉ ଦୁଇ ଅଭିଯୁକ୍ତଙ୍କୁ ମଧ୍ୟ ଫାସୀ ଦଣ୍ତ ଦିଆଯାଉ । ପୋଲିସଙ୍କ ତଦନ୍ତରେ ସେ ଖୁସି ନାହାନ୍ତି ବୋଲି ଜଣାଇଛନ୍ତି ।
Also Read
ଏପଟେ ଶର୍ମିଷ୍ଠା ଦୋଷ କରିଥିଲେ ଦଣ୍ଡ ଦିଆଯାଉ ବୋଲି କହିଛନ୍ତି ଶର୍ମିଷ୍ଠାଙ୍କ ମାଆ ବାସନ୍ତୀ ରାଉତ । ତେବେ ପୁଅ ନିର୍ଦ୍ଦୋଷ ବୋଲି କହିବା ସହ ତାକୁ ଛାଡ଼ି ଦେବାକୁ ଅପିଲ୍ କରିଛନ୍ତି । ଶର୍ମିଷ୍ଠା ସହ ବର୍ଷେ ହେଲା କୌଣସି ସଂପର୍କ ନଥିବା କହିଛନ୍ତି ମାଆ ।
ଶେଷରେ ଗିରଫ ହୋଇଛନ୍ତି ଶର୍ମିଷ୍ଠା ରାଉତ । କ୍ରାଇମବ୍ରାଞ୍ଚ ଓ ପୋଲିସ୍ର ମିଳିତ ଟିମ୍ ଶର୍ମିଷ୍ଠା ଓ ସହଯୋଗୀ ଝୁନା ଭୋଇଙ୍କୁ ଭଦ୍ରକ ନଳାଙ୍ଗରୁ ଗିରଫ କରିଛି । ଉଭୟଙ୍କୁ ଚାନ୍ଦବାଲି JMFC କୋର୍ଟରେ ହାଜର କରାଯିବ । ସେଠୁ କ୍ରାଇମବ୍ରାଞ୍ଚ ୧୦ ଦିନ ପାଇଁ ରିମାଣ୍ଡରେ ନେବାକୁ ଆବେଦନ କରିବ । ଏହି ମାମଲାରେ ପୂର୍ବରୁ ଗିରଫ ହୋଇଥିବା ପୂର୍ବତନ OIS ନିରଞ୍ଜନ ସେଠୀ, ରାଜ୍ କମୁନିକେସନ୍ର ମାଲିକ ରଞ୍ଜନଙ୍କ ସମେତ ୫ ଜଣଙ୍କୁ ବି ରିମାଣ୍ଡରେ ନେବାକୁ ଆବେଦନ କରାଯିବ ।
ମାନସ ସ୍ୱାଇଁଙ୍କୁ ହତ୍ୟା ପରେ ଫେରାର ଥିଲେ ଶର୍ମଷ୍ଠା ଓ ତାଙ୍କ ସହଯୋଗୀ । ମାନସଙ୍କ ପାଖରେ ଥିବା ଏକ ମେମୋରି ଚିପ୍ ପାଇଁ ଏହି ହତ୍ୟାକାଣ୍ଡ ହୋଇଥିବା ଚର୍ଚ୍ଚା ହେଉଛି । ତେବେ ଏଯାଏଁ ତାହା କ୍ରାଇମବ୍ରାଞ୍ଚ କିମ୍ବା ପୋଲିସ୍ ହାତରେ ଲାଗିନି । ତେଣୁ ସେହି ମେମୋରି ଚିପ୍ ଖୋଜିବା ଏବେ ବଡ଼ ଚ୍ୟାଲେଞ୍ଜ କ୍ରାଇମବ୍ରାଞ୍ଚ ପାଇଁ ହେବ ।
