LIVE TV
ଆଜିକାଲି ପ୍ରତିଯୋଗିତାମୂଳକ ପରୀକ୍ଷାରେ ତୀବ୍ର ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳୁଛି। ମାତ୍ର ଅନେକ ସମୟରେ ପରୀକ୍ଷାର୍ଥୀ ପରିଶ୍ରମ କରିଥିଲେ ସୁଦ୍ଧା ଏଥିରେ ପାସ୍ କରି ପାରୁନାହାନ୍ତି। କିଛି ଲୋକ ଏହାକୁ ବ୍ୟବସାୟ ଭାବିନେଇଛନ୍ତି। ଟଙ୍କା କେଇଟା ପାଇଁ ପରୀକ୍ଷାର୍ଥୀଙ୍କ କ୍ୟାରିୟର ବି ଛାଡୁନାହାନ୍ତି। ତେବେ ଏପରି ଅଭିଯୋଗ ଆସିବା ପରେ ଜଣେ ଶିକ୍ଷକଙ୍କ ସହ ମୋଟ୍ ୩ଜଣଙ୍କୁ ଗିରଫ କରାଯାଇଛି। NEET-UG ପରୀକ୍ଷାରେ ସେମାନେ ୬ପରୀକ୍ଷାର୍ଥୀଙ୍କ ଠାରୁ ୧୦ଲକ୍ଷ ଲେଖାଏଁ ନେଇଥିବା ଅଭିଯୋଗ ହେବା ପରେ ସେମାନଙ୍କୁ ଗିରଫ କରାଯାଇଛି।
Also Read
NEET-UG ପରୀକ୍ଷା ଦାୟିତ୍ୱରେ ଥିବା ଜଣେ ଶିକ୍ଷକଙ୍କୁ ଗିରଫ କରିଛି ଗୁଜରାଟ ପୋଲିସ। ଗୁଜରାଟର ପଞ୍ଚମହଲ ଜିଲ୍ଲାର ଗୋଧରାସ୍ଥିତ ଜଣେ ସ୍କୁଲ ଶିକ୍ଷକ ଏବଂ ଅନ୍ୟ ଦୁଇଜଣଙ୍କୁ ବାନ୍ଧିଛି ପୋଲିସ। ଗତ ରବିବାର ଗୋଧରାର ଏକ ସ୍କୁଲରେ NEET-UG ପରୀକ୍ଷା ଚାଲିଥିଲା। ଏହି ସମୟରେ ଜିଲ୍ଲାପାଳ ଏବିଷୟରେ ଖବର ପାଇଥିଲେ। ଏକ ରାକେଟ୍ ଟଙ୍କା ନେଇ ପିଲାଙ୍କୁ ସାହାଯ୍ୟ କରୁଥିବା ଜିଲ୍ଲାପାଳ ଜାଣିବାକୁ ପାଇଥିଲେ। ପରୀକ୍ଷା କେନ୍ଦ୍ରରେ ଉପ-ଅଧୀକ୍ଷକ ଥିବା ପଦାର୍ଥ ବିଜ୍ଞାନ ଶିକ୍ଷକ ତୁଷାର ଭଟ୍ଟଙ୍କ ସହିତ ଅନ୍ୟ ଦୁଇଜଣ ପର୍ଶୁରାମ ରାୟ ଏବଂ ଆରିଫ ବୋରାଙ୍କ ବିରୋଧରେ ମାମଲା ରୁଜୁ ହୋଇଛି।
ଅଧିକ ପଢ଼ନ୍ତୁ: NEET ପରୀକ୍ଷା ଦେଉଥିଲେ ନକଲି ପରୀକ୍ଷାର୍ଥୀ; ଧରାଇଦେଲା ଫିଙ୍ଗର ଫ୍ରିଣ୍ଟ
ପୋଲିସ କହିଛି ଯେ ତୁଷାର ଭଟ୍ଟଙ୍କ କାରରୁ ନଗଦ ୭ଲକ୍ଷ ଟଙ୍କା ଉଦ୍ଧାର କରାଯାଇଛି। ବୋରା ଜଣେ ପରୀକ୍ଷାର୍ଥୀଙ୍କ ନାଁ ମେରିଟ୍ ତାଲିକାରେ ଆଣିବା ପାଇଁ ଏହି ଟଙ୍କା ଅଗ୍ରୀମ ନେଇଥିଲେ। ଅଭିଯୁକ୍ତ ଏବଂ କିଛି NEET-UG ପରୀକ୍ଷାର୍ଥୀଙ୍କ ମଧ୍ୟରେ ଆଗୁଆ ଏନେଇ କଥାବାର୍ତ୍ତା ହୋଇସାରିଥିଲା। ପ୍ଲାନ ଅନୁଯାୟୀ, ପରୀକ୍ଷାର୍ଥୀ ସେହି ପ୍ରଶ୍ନଗୁଡ଼ିକୁ ଖାଲି ଛାଡିଥିଲେ ଯାହାର ଉତ୍ତର ସେମାନେ ଜାଣିନଥିଲେ। ପରୀକ୍ଷା ଖାତା ସଂଗ୍ରହ ହେବା ପରେ ଏହି ପ୍ରଶ୍ନଗୁଡିକର ଉତ୍ତର ସେମାନେ ଲେଖିଦେବେ ବୋଲି କହିଛନ୍ତି।
ଜିଲ୍ଲା ଶିକ୍ଷା ଅଧିକାରୀଙ୍କ ଅଭିଯୋଗ ଅନୁଯାୟୀ, ତୁଷାର ଭଟ୍ଟ ଜୟ ଜଲାରାମ ବିଦ୍ୟାଳୟରେ ଶିକ୍ଷକ ଭାବରେ କାର୍ଯ୍ୟ କରନ୍ତି ଏବଂ ସହରରେ NEET ପରୀକ୍ଷାରେ ଡେପୁଟି ସେଣ୍ଟର ଅଧୀକ୍ଷକ ଭାବରେ ନିଯୁକ୍ତ ହୋଇଥିଲେ। ପରୀକ୍ଷା ଚାଲିଥିବା ବେଳେ ଜିଲ୍ଲା ଶିକ୍ଷା ଅଧିକାରୀଙ୍କ ଏକ ଟିମ୍ ବିଦ୍ୟାଳୟରେ ପହଞ୍ଚି ଭଟ୍ଟଙ୍କୁ ପଚରାଉଚରା କରିଥିଲେ। ଯେତେବେଳେ ସେମାନେ ତାଙ୍କ ମୋବାଇଲ୍ ଫୋନ୍ ଚେକ୍ କରିଥିଲେ, ସେତେବେଳେ ସେମାନେ ସେମାନଙ୍କ ନାମ, ରୋଲ୍ ନମ୍ବର ଏବଂ ପରୀକ୍ଷା କେନ୍ଦ୍ର ସହିତ ୧୬ ଜଣ ପରୀକ୍ଷାର୍ଥୀଙ୍କ ତାଲିକା ପାଇଥିଲେ। ଅଭିଯୁକ୍ତ ପର୍ଶୁରାମ ରାୟ ଏସବୁ ହ୍ୱାଟସ୍ଆପ୍ ନମ୍ବରରେ ପଠାଇଥିଲେ ବୋଲି ଏଫ୍ଆଇଆରରେ ଉଲ୍ଲେଖ ରହିଛି।
ଏନେଇ ଶିକ୍ଷକ ତୁଷାର ଭଟ୍ଟ କହିଛନ୍ତି, ଏହି ପରୀକ୍ଷାର୍ଥୀମାନେ ତାଙ୍କ ସେଣ୍ଟରରେ ପରୀକ୍ଷା ଦେବେ ବୋଲି ଲିଷ୍ଟ ପଠାଯାଇଥିଲା। ସେମାନଙ୍କ ମଧ୍ୟରୁ ୬ଜଣଙ୍କ ପରୀକ୍ଷା ପ୍ରଶ୍ନପତ୍ର ସମାଧାନ କରିବା ପାଇଁ ସେମାନେ ପ୍ରତ୍ୟେକ ୧୦ଲକ୍ଷ ଟଙ୍କା ଦେବାର ଥିଲା। ଏମାନଙ୍କ ମଧ୍ୟରୁ ଜଣେ ଆଗୁଆ ୭ଲକ୍ଷ ଟଙ୍କା ପ୍ରଦାନ କରିଥିଲେ। ଯାହାକୁ ଅଧିକାରୀମାନେ ଜବତ କରିଛନ୍ତି। ଏଥିସହ ବୁଧବାର ଥାନାରେ ମାମଲା ହେବା ପରେ ତଦନ୍ତ ଜାରି ରହିଛି।
