୨୦୨୧ ଜାନୁଆରୀ ୧୬ରୁ ସ୍ୱାସ୍ଥ୍ୟକର୍ମୀ, ଫେବ୍ରୁଆରୀ ୨ରୁ ଫ୍ରଣ୍ଟଲାଇନ୍ ଓ୍ୱାର୍କର, ମାର୍ଚ୍ଚ ୧ରୁ ୬୦ବର୍ଷରୁ ଉର୍ଦ୍ଧ୍ୱ ଏବଂ ୪୫ରୁ ଅଧିକ ବହୁବିଧ ଆକ୍ରାନ୍ତ । ମହାମାରୀର ମହା ମୁକାବିଲା ପାଇଁ ଗତବର୍ଷ ତମାମ, ବିଭିନ୍ନ ସମୟରେ ଏମିତି ଦେଶରେ ଆଗେଇ ଚାଲିଥିଲା କୋଭିଡ୍ ଟିକାକରଣ ଅଭିଯାନ । ଗତବର୍ଷ ମେ’ ପହିଲାରୁ ୧୮ ବର୍ଷରୁ ଉର୍ଦ୍ଧ୍ୱ ଅର୍ଥାତ୍ ଯୁବ ବର୍ଗଙ୍କୁ କୋଭିଡ୍ କବଚ ପ୍ରଦାନ ଆରମ୍ଭ ହୋଇଯାଇଥିଲେ ବି କିଶୋର ବର୍ଗଙ୍କୁ ଭ୍ୟାକ୍ସିନେସନ ପାଇଁ ପୁରା ବର୍ଷେ ଅପେକ୍ଷା କରିବାକୁ ପଡ଼ିଥିଲା ।
ବହୁ ଗବେଷଣା, ପରୀକ୍ଷା-ନିରୀକ୍ଷା ଓ ପ୍ରତୀକ୍ଷା ପରେ ଏଇବର୍ଷ ପ୍ରାରମ୍ଭ ଅର୍ଥାତ୍ ଚଳିତ ମାସ ୩ ତାରିଖରୁ ଆରମ୍ଭ ହୋଇଛି ୧୫ରୁ ୧୮ ବର୍ଷ ମଧ୍ୟର କିଶୋର ବର୍ଗଙ୍କୁ ଟିକାକରଣ । ଖୁସିର କଥା ମାତ୍ର ୨ ସପ୍ତାହ ଭିତରେ ଏହି ବର୍ଗରେ ୩କୋଟି ୪୦ ଲକ୍ଷ ଡୋଜ୍ ଟିକା ଦିଆ ସରିଲାଣି । ଅଦ୍ୟାବଧି ଦେଶରେ ପ୍ରାୟ ୧୫୭ କୋଟି ଡୋଜ୍ କୋଭିଡ୍ ଟିକାକରଣ ସରିଥିବା ବେଳେ ୯୨ ପ୍ରତିଶତ ପ୍ରାପ୍ତ ବୟସ୍କ କୋଭିଡ୍ର ପ୍ରଥମ ଡୋଜ୍ ଓ ପ୍ରାୟ ୭୦ ପ୍ରତିଶତ ବୟସ୍କ ଦୁଇ ଡୋଜ୍ ଟିକା ନେଇ ସାରିଲେଣି ।
Also Read
ସେହିପରି ଗତ ୧୦ ତାରିଖରୁ ଆରମ୍ଭ ହୋଇଥିବା ବୁଷ୍ଟର ଡୋଜ୍ ବି ପ୍ରାୟ ୪୩ ଲକ୍ଷ ଲୋକଙ୍କୁ ଦିଆ ସରିଲାଣି । ବଡ଼ ଉପଲବ୍ଧିକ୍ରମେ ଗତବର୍ଷ ଅକ୍ଟୋବର ୨୧ରେ ଶହେ କୋଟି ଡୋଜ୍ ମାର୍କ ଛୁଇଁଥିଲା ବେଳେ ଗତ ଜାନୁଆରୀ ୭ରେ ଏହା ଦେଢ଼ ଶହ କୋଟି ଡୋଜ୍ ମାର୍କ ଅତିକ୍ରମ କରିଛି । ଏଣେ ଓଡ଼ିଶାରେ ୫ କୋଟି ୪୨ ଲକ୍ଷରୁ ଅଧିକ ଡୋଜ୍ ଟିକାକରଣ ସରିଲାଣି । ଯାହାମଧ୍ୟରୁ ୩ କୋଟି ୧୧ ଲକ୍ଷରୁ ଅଧିକ ଫାଷ୍ଟ ଡୋଜ୍ ଓ ୨କୋଟି ୨୮ଲକ୍ଷରୁ ଅଧିକା ସେକେଣ୍ଡ ଡୋଜ୍ ।
କୋଭିଡ୍ ଟିକାକରଣର ବର୍ଷ ପୂର୍ତ୍ତି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାର୍ତ୍ତା ଦେଇ, ଟିକାକରଣ ଅଭିଯାନରେ ସାମିଲ ସବୁ ବ୍ୟକ୍ତି ବିଶେଷଙ୍କୁ ସାଲ୍ୟୁଟ୍ କରିଛନ୍ତି । ତାସହ କୋଭିଡ୍ ବିରୋଧୀ ଲଢ଼େଇରେ ଏହା ବଡ଼ ସାମର୍ଥ୍ୟ ସୃଷ୍ଟି କରିଥିବା କହିବା ସହ ଜୀବନ ଓ ଜୀବୀକାକୁ ସୁରକ୍ଷା ଦେବାରେ ସହାୟକ ହୋଇଛି ବୋଲି କହିଛନ୍ତି । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ୍ ମାଣ୍ଡଭିୟ ବି ଟିକାକରଣର ବର୍ଷପୂର୍ତ୍ତି ଅବସରରେ ଅଭିଯାନକୁ ପ୍ରଶଂସା କରିବା ସହ ଆଇସିଏମଆର୍ ଓ ଭାରତ ବାୟୋଟେକ ଉଦ୍ୟମରେ ପ୍ରସ୍ତୁତ କୋଭାକ୍ସିନ ଟିକାକୁ ନେଇ ଜାରି ସ୍ୱତନ୍ତ୍ର ଡାକ ଟିକଟ ସମ୍ପର୍କରେ ନିଜ ଟ୍ୱିଟର ଆକାଉଣ୍ଟରେ ସୂଚନା ଦେଇଛନ୍ତି ।
ମହାମାରୀ ବିରୋଧୀ ଲଢ଼େଇରେ ବଡ଼ ଅସ୍ତ୍ର ସାଜିଛି ଟିକାକରଣ । ଯେଉଁଥିପାଇଁ କେତେ ପ୍ରୟାସ, କେତେ ସତେନତତା ତଥାପି ସବୁ ଲୋକଙ୍କ ମନରେ ଟିକାକୁ ନେଇ ଦୂର ହୋଇନି ଭୟ । ଏଇ ଯେମିତି ବାଲେଶ୍ୱରର ସବିତା ସେଠୀ ମହାମାରୀ ଆରମ୍ଭ ସମୟରେ ସେ ଗର୍ଭବତୀ ଥିଲେ । ଏବେ ମା ହୋଇ ସାରିଲେଣି ତଥାପି ଡରରେ ଟିକା ନେଇନାହାନ୍ତି । ସେମିତି ଉଦଳା ବ୍ଲକ ଆମ୍ବଡିହାରେ ବସବାସ କରୁଥିବା ଲୋଧା ଓ ମାଙ୍କଡ଼ଇା ସଂପ୍ରଦାୟର ୫୦ରୁ ଅଧିକ ସଦସ୍ୟ ଟିକା ନେବେ ନାହିଁ ବୋଲି ଜିଦ୍ ଧରିଛନ୍ତି ।