Accident: କୁହୁଡ଼ି ଯୋଗୁଁ ଦେଖି ପାରିଲେନି ଡ୍ରାଇଭର, ଟ୍ରେଲରକୁ ଧକ୍କା ଦେଲା ପିକଅପ୍ ଭ୍ୟାନ୍

ବାପାଙ୍କ ମୃତ୍ୟୁର ଦିନ କେଇଟା ପରେ ଅଫେରା ରାଇଜକୁ ଚାଲିଗଲା ପୁଅ । ବାପାଙ୍କ ଶୁଦ୍ଧି କ୍ରିୟା ସାରିବା ପରେ ଦୁର୍ଘଟଣା ନେଇଛି ପୁଅର ଜୀବନ । ଆଜି ଭୋରରେ ସୁନ୍ଦରଗଡ଼ ଜିଲ୍ଲା ହେମଗିରି ଥାନା ଗଏକାନପାଲିରେ ସଂକୀର୍ତ୍ତନ ଦଳକୁ ନେଇ ଯାଉଥିବା ଭ୍ୟାନ୍ ଦୁର୍ଘଟଣାରେ ୭ ଜଣଙ୍କର ମୃତ୍ୟୁ ହୋଇଛି ଓ ୪ ଜଣ ଆହତ ହୋଇଛନ୍ତି । ସେମାନେ ଛତିଶଗଡ଼ ଚକ୍ରାବାହଲ ଗାଁରେ ଏକ ଶୁଦ୍ଧି କ୍ରିୟାରୁ ଫେରୁଥିଲେ ।

ଯେଉଁ ମୃତକଙ୍କ ଶୁଦ୍ଧି କ୍ରିୟାରେ ସଂକୀର୍ତ୍ତନ କରିବାକୁ ଯାଇଥିଲେ ତାଙ୍କ ପୁଅ ଏହି ଦୁର୍ଘଟଣାରେ ପ୍ରାଣ ହରାଇଛନ୍ତି । ସେ ନିଜେ ଭ୍ୟାନ୍ ଚଳାଇ ସଂକୀର୍ତ୍ତନ ଦଳକୁ ଛାଡ଼ିବାକୁ ଆସୁଥିଲେ । ଏତିକି ବେଳେ ହେମଗିରି ଥାନା ଗଏକାନପାଲିରେ ଏକ ଟ୍ରେଲରକୁ ପଛପଟୁ ଧକ୍କା ଦେଇଥିଲା ଭ୍ୟାନ୍ । ବାପାଙ୍କ ଶୁଦ୍ଧି କ୍ରିୟା ପରେ ପୁଅର ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି ।

ଉତ୍ୟକ୍ତ ଲୋକ ରାସ୍ତାରୋକ କରିଛନ୍ତି । ତେବେ ଭୋର୍ ସମୟରେ କୁହୁଡି ଜନିତ କାରଣ ହେଉ ବା ଚାଳକଙ୍କ ଆଖି ଲାଗି ଯାଇଥାଉ କି ଯେଉଁ ବି କାରଣ ହେଉ, ୭ ଜଣଙ୍କର ମୃତ୍ୟୁ ହେବା ଫଳରେ ପୂରା ଅଞ୍ଚଳ ଶୋକାକୂଳ ହୋଇ ଯାଇଛି । ତେବେ ଦୁର୍ଘଟଣାର ସଠିକ୍ କାରଣ ବର୍ତ୍ତମାନ ସୁଦ୍ଧା ଜଣା ପଡିନାହିଁ ।

ଅନେକ ସମୟରେ ରାସ୍ତା କଡ଼ରେ ଟ୍ରକ ଗୁଡ଼ିକ ଛିଡ଼ା ହେଉଥିବା ବେଳେ ଛୋଟ ବଡ ଅନେକ ଦୁର୍ଘଟଣା ଘଟୁଛି । ତେବେ ବାପାଙ୍କ ଶୁଦ୍ଧି କ୍ରିୟା ପରେ ପୁଅର ମୃତ୍ୟୁ ସ୍ଥାନୀୟ ଅଞ୍ଚଳରେ ଏକ ଶୋକାକୁଳ ପରିବେଶ ସୃଷ୍ଟି କରିଛି । ରାସ୍ତାରୋକ ଜାରି ରହିଥିବା ବେଳେ ପୋଲିସ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛି ।