• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Sarbeswar

ଆଖି ଆଗରେ ଜଳିଗଲେ କଞ୍ଚା ରକ୍ତ ମାଂସର ଜୀଅନ୍ତା ମଣିଷ.. ଜଣେ କି ଦୁଇ ଜଣ ନୁହେଁ ସରକାରୀ ହିସାବରେ ୨୧୫  ଜଣ। ଆଉ ବେସରକାରୀ ସଂସ୍ଥା ହିସାବରେ ତାଠୁ ଅଧିକା । ସେ ଦିନ ସିନା ଶହ ଶହ ଜୁଇ ଜଳିବା ପରେ ନିଆଁ ଲିଭିଯାଇଥିଲା..ହେଲେ ୨୬ ବର୍ଷ ପରେ ଆଜି ସେ ଦିନ ଘଟଣା ମନେପଡିଲେ ପ୍ରତ୍ୟକ୍ଷଦର୍ଶୀଙ୍କ ଛାତି ଥରିଉଠୁଛି ।

୨୬ ବର୍ଷ ତଳର କାହାଣୀ ମନେ ପଡିଲେ ଏବେ ବି ଥରେ ଛାତି । ସେଦିନ ଥିଲା ୧୯୯୭ ମସିହା ଫେବୃଆରୀ ୨୩ ତାରିଖ । ଦିନ ପ୍ରାୟ ୨ ଟା୩୦ ମିନିଟ, ହଠାତ ବାରିପଦା ସହର ମଧୁବନ ଆକାଶରେ ଖେଳିଗଲା କଳା ଧୂଆଁ.. ନିଆଁ ଲାଗିଗଲା..ନିଆଁ ଲାଗିଗଲା ଚିତ୍କାର କରି ସମସ୍ତେ ପ୍ରାଣ ବିକଳରେ ଦୌଡ଼ିଲେ । ବଞ୍ଚାଅ ବଞ୍ଚାଅ ଚିତ୍କାର ଆଉ କାନ୍ଦବୋବାଳିରେ ଫାଟି ପଡୁଥାଏ ପରିବେଶ ।

ମଧୁବନରେ ଆୟୋଜିତ ହୋଇଥିଲା ଠାକୁର ଶ୍ରୀ ଶ୍ରୀ ନିଗମାନନ୍ଦଙ୍କ ବାର୍ଷିକ ସମ୍ମିଳନୀ ଓ ପୂଜାପାଠ।  ସଭାସ୍ଥଳୀରେ ହଜାର ହଜାର ଭକ୍ତଙ୍କ ଭିଡ଼ ଜମିଥିବା ବେଳେ ସେ ଦିନ ଥିଲା ସମ୍ମିଳନୀର ଶେଷଦିନ ।  ଭକ୍ତଙ୍କ ରହିବା ଓ ଶୋଇବା ପାଇଁ ତିନି ଏକର ଜମିରେ ହୋଇଥିଲା ନଡ଼ା ଓ ଛପରର ଅସ୍ଥାୟୀ ଗୃହ । ତାରି ଭିତରେ ଶୋଇଥିଲେ ଛୁଆ ପିଲାଙ୍କୁ ଧରି ସପରିବାର ସହ ହଜାର ହଜାର ନିଗମାନନ୍ଦଙ୍କ ଭକ୍ତ । କେହି କିଛି ବୁଝିବା ପୂର୍ବରୁ ହାଠାତ ଲାଗିଗଲା ନିଆଁ, ଆଉ କେଇଟା ସେକେଣ୍ଡରେ ସବୁ ଜାଳି ପୋଡ଼ି ଛାରକାର କରିଦେଲା । 

ମର୍ମନ୍ତୁଦ ଘଟଣାରେ ମୃତାହତ ଓ ଆହତଙ୍କ ପରିବାରକୁ ସମବେଦନା ଜଣାଇବା ପାଇଁ ବାରିପଦା ପହଞ୍ଚିଥିଲେ ତତ୍କାଳୀନ ପ୍ରଧାନମନ୍ତ୍ରୀ ଏଚ,ଡି ,ଦେବଗୌଡା, କଂଗ୍ରେସ ବରିଷ୍ଠ ନେତା ଶରତ ପାୱାର, ତତ୍କାଳୀନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକ ଏବଂ ବିଜୁ ପଟ୍ଟନାୟକଙ୍କ ପ୍ରମୁଖ । ଦେଶ ବିଦେଶର ସାମ୍ବାଦିକ ବାରିପଦାରେ ଡେରା ପକାଇଥାନ୍ତି.. ସବୁ ଆଡେ କାନ୍ଦ ଛାତିଫଟା ଶବ୍ଦ ଓ କୁଢ଼ କୁଢ଼ ଶବ। ଆଉ ସେହି ଶବ ଗଦାରୁ ସମସ୍ତେ ନିଜ ଲୋକଟିକୁ ଖୋଜୁଥାନ୍ତି । 

ଭାରତର ସବୁଠାରୁ ବଡ଼ ୧୦ ଫାୟାର୍ ଟ୍ରାଜେଡି ମଧ୍ୟରୁ ବାରିପଦା ଅଘଟଣ ହେଉଛି ଅନ୍ୟତମ..ୟାରି ଭିତରେ ୨୬ ବର୍ଷ ବିତିଯାଇଛି । ଆଜି ବି ବାରିପଦା ର ସେହି ମଧୁବନ ଅଞ୍ଚଳ ସମ୍ପୂର୍ଣ୍ଣ ବଦଳିଯାଇଛି । ସେହିଠାରେ ଠିଆ ହୋଇଛି ରାସ୍ତା ଘାଟ ସାହି ଓ ବଡ଼ ବଡ଼ କୋଠା । ହେଲେ ସେହି ଲୋମହର୍ଷଣ ଘଟଣାକୁ ମନେପକାନ୍ତି ମଧୁବନ ବାସିନ୍ଦା..ମୃତକଙ୍କ ନାମରେ ଦୀପ ପ୍ରଜ୍ୱଳନ କରି ନିରବ ପ୍ରାର୍ଥନା କରନ୍ତି । 

(ରିପୋର୍ଟ- ମାନିକ୍ ଲାଲ୍ ପାଣି, ବାରିପଦା)