ଖସି ପଡ଼ିଲା ୪୦ ଟନ ଲୁହା ବୋଝେଇ ଟ୍ରକ, ଚାଲିଗଲା ୪ ଜୀବନ

ଗୋଟିଏ ପରିବାରର ଚାରି ସଦସ୍ୟଙ୍କ ଦେହାନ୍ତ । ଟ୍ରକ ଚଳେ ଚାପି ହୋଇ ପ୍ରାଣ ହରାଇଛନ୍ତି ଗୋଟିଏ ପରିବାରର ଚାରି ସଦସ୍ୟ । ଏପରି ମର୍ମନ୍ତୁଦ ଦୁର୍ଘଟଣା ଆଦି ସକାଳେ ସକାଳେ ମଧ୍ୟପ୍ରଦେଶର ଗୁନାରେ ଘଟି ଯାଇଛି । ଜାତୀୟ ରାଜପଥରେ ପ୍ରବଳ କୁହୁଡ଼ି ହୋଇଥିବା ଫଳରେ ରାସ୍ତାଘାଟ କିଛି ଦେଖା ଯାଉନଥିଲା ।

ଏଣୁ ଭାରସାମ୍ୟ ହରାଇ ଟ୍ରକଟି କାର ଉପରେ ପଡ଼ି ଯାଇଥିଲା । ଫଳରେ ପରିବାରର ଚାରିଜଣ ସଦସ୍ୟ ପ୍ରାଣ ହରାଇଥିଲେ ଏବଂ ଦୁଇ ଜଣ ଗୁରୁତର ଆହତ ହୋଇଥିଲେ । ଗୁନାସ୍ଥିତ NH ୪୬ ରେ ଘଟିଥିବା ଦୁର୍ଘଟଣାରେ ରାଜଗଡ ଜିଲ୍ଲାର ଦମ୍ପତିଙ୍କ ସମେତ ଦୁଇ ଝିଅଙ୍କର ମୃତ୍ୟୁ ହୋଇ ଯାଇଛି । ଏନେଇ ପୋଲିସ ତଦନ୍ତ ତଦନ୍ତ ରଖିଛି । ଗୁରୁତରଙ୍କୁ ନିକଟସ୍ଥ ଡାକ୍ତରଖାନାକୁ ପଠାଯାଇଛି ।

ପୋଲିସ ତଦନ୍ତ ଅନୁଯାୟୀ, ଟ୍ରକଟି କାରକୁ ଅତିକ୍ରମ କରିବାକୁ ଚେଷ୍ଟା କରୁଥିଲା । କୁହୁଡ଼ି କାରଣରୁ ଏହା ନିୟନ୍ତ୍ରଣ ହରାଇଥିଲା ଏବଂ କାର ଉପରେ ପଡି ଯାଇଥିଲା । ସୂଚନାନୁସାରେ, ଟ୍ରକଟି ୪୦ ଟନରୁ ଅଧିକ ଲୁହା ନେଇ ଯାଉଥିଲା । ଫଳରେ ଟ୍ରକଟି ଯେତେବେଳେ କାର ଉପରେ ଖସି ପଡ଼ିଲା, ଏହା ପୁରାପୁରି ଧ୍ୱଂସ ହୋଇ ଯାଇଥିଲା । କାରର ରେଜିଷ୍ଟ୍ରେସନ ନମ୍ବର ସାହାଯ୍ୟରେ ପୋଲିସ ପରିବାରର ସମ୍ପର୍କୀୟଙ୍କ ସହ ଯୋଗାଯୋଗ କରୁଛି ।

ଅତ୍ୟଧିକ ଓଜନ କାରଣରୁ ଟ୍ରକକୁ ଉଠାଇବାକୁ କ୍ରେନ ଓ ଜେସିବିର ବ୍ୟବହାର ହେଉଛି । ଲୁହାଗୁଡ଼ିକୁ ବାହାର କରିବା ପରେ ହିଁ ଟ୍ରକକୁ ଘୁଞ୍ଚାଇ ପାରିବେ ବୋଲି ପୋଲିସ କହିଛି ।