ହଠାତ୍‌ ଭୁଶୁଡ଼ି ପଡ଼ିଲା ବ୍ରିଜ୍, ୧୦ ଜଣଙ୍କ ମୃତ୍ୟୁ ଆଶଙ୍କା

ଗୁଜରାଟ ସୁରେନ୍ଦ୍ର ନଗରର ବସ୍ତାଦୀ ନିକଟରେ ଭୁଶୁଡ଼ିଲା ବ୍ରିଜ୍ । ଭୋଗବୀ ନଦୀରେ ଥିବା ପୋଲ ଭୁଶୁଡ଼ି ପଡ଼ିଛି । ଏଥିରେ ୧୦ରୁ ଅଧିକ ଲୋକ ମୃତାହତ ହୋଇଥିବାର ଆଶଙ୍କା କରାଯାଉଛି । ଗୋଟିଏ ଡମ୍ପର ଓ ଦୁଇଟି ବାଇକ୍ ବ୍ରିଜ ଉପରେ ଯାଉଥିବା ବେଳେ ହିଁ ବ୍ରିଜ୍‌ଟି ଭୁଶୁଡ଼ି ପଡ଼ିଥିଲା । ତିନିଟି ଯାକ ଗାଡ଼ି ନଦୀରେ ଖସିପଡ଼ିଛି । ସ୍ଥାନୀୟ ଲୋକେ ମୃତାହତଙ୍କୁ ଉଦ୍ଧାର କରି ନିକଟସ୍ଥ ହସପିଟାଲରେ ଭର୍ତ୍ତି କରିଛନ୍ତି ।

ସୂଚନା ଅନୁସାରେ ଗତକାଲି ଏହି ଅଘଟଣ ଘଟିଛି । ଦୁର୍ଘଟଣା ସମୟରେ ପୋଲ ଉପରେ ଗୋଟିଏ ଡମ୍ପର ଓ ଦୁଇଟି ବାଇକ୍ ଯାଉଥିଲା । ସେହି ସମୟରେ ହଠାତ୍‌ ପୋଲଟି ଭୁଶୁଡ଼ି ପଡ଼ିଥିଲା । ଫଳରେ ୩ଟି ଯାକ ଗାଡ଼ି ନଦୀରେ ପଡ଼ିଯାଇଛି । ଏନେଇ ସୂଚନା ପାଇବା ପରେ ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ।

ନଦୀ ଭିତରେ ଖୋଜାକୋଜି କରିବା ପରେ ୪ଜଣଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛନ୍ତି । ହେଲେ ଏବେ ବି ୬ଜଣ ନିଖୋଜ ରହିଛନ୍ତି । ସେପଟେ ଦୁର୍ଘଟଣା ଖବର ଜାଣିବା ପରେ ଘଟଣାସ୍ଥଳରେ ଉଦ୍ଧାରକାରୀ ଦଳ ପହଞ୍ଚି ସମସ୍ତଙ୍କୁ ଉଦ୍ଧାର କରିବାକୁ ଉଦ୍ୟମ କରୁଛି ।

ଅନ୍ୟପଟେ କୁହାଯାଉଛି ଯେ, ପୋଲଟି ବିପଦସଙ୍କୁଳ ଅବସ୍ଥାରେ ରହିଥିଲା । ସେଥିପାଇଁ ପୋଲରେ ଭାରିଯାନ ଯାତାୟାତ କରିବାକୁ ନିଷେଧ କରାଯାଇଥିଲା । ହେଲେ ୪୦ ଟନ୍‌ର ଡମ୍ଫର ସେହି ପୋଲ ଦେଇ ଯିବା ଫଳରେ ଏପରି ଅଘଟଣ ଘଟିଥିବା କୁହାଯାଉଛି । ଭିଡିଓରେ ଭଙ୍ଗା ପୋଲ ଉପରେ ଡମ୍ଫରଟି ରହିଥିବା ଦେଖିବାକୁ ମିଳୁଛି ।