ମର୍ମନ୍ତୁଦ ଦୁର୍ଘଟଣା, ପଛରୁ ପିଟିଲା ହାଇୱା, ୧୬ ଗୁରୁତର

ବଲାଙ୍ଗୀର-ସୋନପୁର ୫୭ ନମ୍ବର ଜାତୀୟ ରାଜପଥ ଝିଙ୍କି ପନ୍ଥେଇ ନିକଟରେ ଗତରାତିରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଏକ ଉଇଙ୍ଗର ଗାଡ଼ିକୁ ପିଟିଲା ହାଇୱା। ଏହି ଦୁର୍ଘଟଣାରେ ୧୬ ଆହତ ହୋଇଥିବା ବେଳେ ୪ ଜଣ ଗୁରୁତର ହୋଇଛନ୍ତି।

ସୁବର୍ଣ୍ଣପୁର ଜିଲ୍ଲା ସାଗରପାଲି ଗାଁରୁ ଏକ ଉଇଙ୍ଗର ଗାଡିରେ ଡ୍ରାଇଭର ସମେତ ୨୦ ଜଣ ପୁରୀକୁ ଯାଉଥିଲେ । ତେବେ ଝିଙ୍କି ରସ୍ତାକଡରେ ଥିବା ପନ୍ଥେଇ ନିକଟରେ ଗାଡିକୁ ରଖି ପୂଜା କରୁଥିବା ସମୟରେ ହଠାତ ପଛପଟୁ ଦ୍ରୁତ ଗତିରେ ଆସୁଥିବା ଏକ ଗାଡି ଧକ୍କାଦେଇଥିଲା ।

ଦୁର୍ଘଟଣା ଏତେ ଯୋରଦାର ଥିଲାଯେ ଉଇଙ୍ଗରଟି ସମ୍ପୁର୍ଣ୍ଣ ଚୁରମାର ହୋଇଯାଇଥିଲା । ଦୁର୍ଘଟଣାରେ ୪ ଜଣ ଗୁରୁତର ହୋଇଥିବାବେଳେ ଡ୍ରାଇଭର ସମେତ ଅନ୍ୟ ୧୬ ଜଣ ଆହତ ହୋଇଥିଲା । ଆଉ କିଛି ଲୋକ ଗାଡି ଭିତରେ ଚାପିହୋଇ ରହିଯାଇଥିଲେ ।

ଖବର ପାଇ ତୁରନ୍ତ ଘଟଣାସ୍ଥଳରେ ଦମକଳବାହିନୀର କର୍ମଚାରୀ ପହଞ୍ଚିଥିଲେ। ସେମାନେ ଗ୍ୟାସ୍ କଟର ସାହାଯ୍ୟରେ ଗାଡ଼ିକୁ କାଟି ଗୁରୁତରଙ୍କୁ ଉଦ୍ଧାର କରିଥିଲେ। ଯାତ୍ରୀଙ୍କ ମଧ୍ୟ ୪ ଜଣ ଶିଶୁଙ୍କ ସମେତ କିଛି ମହିଳା ରହିଥିବା ମଧ୍ୟ ଜଣାଯାଇଛି ।

ତୁରନ୍ତ ଗୁରତର ଏବଂ ଆହତଙ୍କୁ ଉଦ୍ଧାର କରାଯାଇ ସୋନପୁର ମେଡିକାଲକୁ ଅଣାଯାଇଥିଲା । ତେବେ ଅବସ୍ଥା ଗୁରୁତର ଥିବାରୁ ୪ ଜଣଙ୍କୁ ବୁର୍ଲା ମେଡିକାଲକୁ ପଠାଯାଇଥିବା ଜଣାଯାଇଛି । ସେଠାରେ ସେମାନଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାଯାଇଛି।

ଦୁର୍ଘଟଣା ଘଟାଇ ଫେରାର ମାରିଥିବା ହାଇୱା ଗାଡିକୁ ଧରିବାକୁ ଦାବି ହେଇଛି । ପୋଲିସ୍ ଏହି ଘଟଣାର ତଦନ୍ତ ଆରମ୍ଭ କରିଛି।