Delhi Blast Connection: ମୌଲବୀ ଇରଫାନ ଅହମ୍ମଦ କିଏ? ଦିଲ୍ଲୀ ବିସ୍ଫୋରଣ ସହିତ ଜଡିତ ଫରିଦାବାଦ ମଡ୍ୟୁଲର ପ୍ରକୃତ ମାଷ୍ଟରମାଇଣ୍ଡ

ଲାଲକିଲ୍ଲା ନିକଟରେ ବିସ୍ଫୋରଣର ମାତ୍ର କିଛି ଘଣ୍ଟା ପୂର୍ବରୁ ହରିୟାଣା ଏବଂ ଜମ୍ମୁ-କାଶ୍ମୀର ପୋଲିସ ଫରିଦାବାଦ ମଡ୍ୟୁଲର ପର୍ଦ୍ଦାଫାସ କରିଥିଲା । ଅନେକ ଡାକ୍ତରଙ୍କ ସହ ସମ୍ପୃକ୍ତି ଯୋଗୁଁ ଏହାକୁ  "ହ୍ୱାଇଟ୍ କଲର ଟେରରିଂ ମଡ୍ୟୁଲ୍" ମଧ୍ୟ କୁହାଯାଏ। ଏବେ ରିପୋର୍ଟ ଆସିଛି ଯେ ଫରିଦାବାଦ ମଡ୍ୟୁଲର ପ୍ରକୃତ ମାଷ୍ଟରମାଇଣ୍ଡ ହେଉଛି ଜମ୍ମୁ-କାଶ୍ମୀରର ଶୋପିଆନର ବାସିନ୍ଦା ମୌଲବୀ ଇରଫାନ ଅହମ୍ମଦ।

ମୌଲବୀ ଇରଫାନ ଅହମ୍ମଦ କିଏ?

ଗଣମାଧ୍ୟମ ରିପୋର୍ଟ ଅନୁଯାୟୀ, ଫରିଦାବାଦ ଆତଙ୍କବାଦ ମଡ୍ୟୁଲରେ ସାମିଲ ଥିବା ସମସ୍ତ ଡାକ୍ତର ମୌଲବୀ ଇରଫାନଙ୍କ ଦ୍ୱାରା ମୌଳବାଦୀ ହୋଇଥିଲେ। ଗୁଇନ୍ଦା ସୂତ୍ରରୁ ଜଣାପଡ଼ିଛି ଯେ, "ମୌଲବୀ ଇରଫାନ ଅହମ୍ମଦ ଡାକ୍ତରୀ ଛାତ୍ରମାନଙ୍କୁ ମୌଳବାଦୀ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସେ ଶ୍ରୀନଗରର ସରକାରୀ ମେଡିକାଲ କଲେଜ (GMC)ରେ ଜଣେ ପାରାମେଡିକ୍ ଥିଲେ ଏବଂ ସମସ୍ତ ଛାତ୍ରଙ୍କ ସହିତ ନିରନ୍ତର ଯୋଗାଯୋଗରେ ଥିଲେ। ସେ ନୌଗାମ ମସଜିଦର ଇମାମ ମଧ୍ୟ ଥିଲେ।" 

ଫରିଦାବାଦ ମଡ୍ୟୁଲ୍ କିପରି ହୋଇଥିଲା?

ସୂତ୍ରଗୁଡ଼ିକୁ ଉଦ୍ଧୃତ କରି ରିପୋର୍ଟରେ କୁହାଯାଇଛି ଯେ ମୌଲବୀ ଇରଫାନ ଫରିଦାବାଦରେ ଡାକ୍ତରୀ ଛାତ୍ରମାନଙ୍କୁ ମୌଳବାଦୀ କରିବା ପାଇଁ କାମ କରୁଥିଲେ। ସେମାନଙ୍କ ଅନୁସାରେ, "ସେ ଜୈଶ-ଏ-ମହମ୍ମଦ (JeM) ଦ୍ୱାରା ଅନୁପ୍ରାଣିତ ଥିଲେ ଏବଂ ଛାତ୍ରମାନଙ୍କୁ ବିଭିନ୍ନ ଭିଡିଓ ଦେଖାଉଥିଲେ। ସେ VOIP (ଭଏସ୍ ଓଭର ଇଣ୍ଟରନେଟ୍ ପ୍ରୋଟୋକଲ୍) ମାଧ୍ୟମରେ ଆଫଗାନିସ୍ତାନର ଜଣଙ୍କ ସହିତ ମଧ୍ୟ ଯୋଗାଯୋଗରେ ଥିଲେ।" ସୂତ୍ର ଅନୁସାରେ, ତାଙ୍କର କାମ ଥିଲା ଛାତ୍ରମାନଙ୍କୁ ମୌଳବାଦୀ କରିବା । ଡାକ୍ତର ମୁଜାମ୍ମିଲ୍ ଶକିଲ୍ ଏବଂ ଡାକ୍ତର ମହମ୍ମଦ ଉମର୍ ଇରଫାନଙ୍କ କାମକୁ ଆଗକୁ ବଢ଼ାଉ ଥିଲେ। ସୂତ୍ର ଆହୁରି ମଧ୍ୟ କହିଛି, "ଶାହିନ୍ କେବଳ ସାହାଯ୍ୟ କରିଥିଲେ, କିନ୍ତୁ ଇରଫାନ ଏହା ପଛରେ ବ୍ରେନ୍ ଥିଲେ।" 

ଇରଫାନ ଜୈଶ ପାଇଁ କାମ କରୁଥିଲେ

ମୌଲବୀ ଇରଫାନ ଅହମ୍ମଦ ଟେଲିଗ୍ରାମରେ ଅନେକ ଆକାଉଣ୍ଟ୍ ପରିଚାଳନା କରୁଥିଲେ, ଯାହା ମାଧ୍ୟମରେ ସେ ଜୈଶ-ଏ-ମହମ୍ମଦ (JeM) ପାଇଁ ପ୍ରଚାର ପ୍ରସାର କରୁଥିଲେ। ସୂତ୍ର ଅନୁଯାୟୀ, "ସେ ଆଫଗାନ ଯୁଦ୍ଧ ସମୟର ଧର୍ମୋପଦେଶ ମଧ୍ୟ ମନୋନୀତ ଛାତ୍ରମାନଙ୍କୁ ଦେଖାଉଥିଲେ।" ତଦନ୍ତକାରୀ  ଅଧିକାରୀ ସନ୍ଦେହ କରୁଛନ୍ତି ଯେ ସେ ଆଫଗାନିସ୍ତାନର ନାଙ୍ଗରହାର ପ୍ରଦେଶର ଜଣେ ହ୍ୟାଣ୍ଡଲରଙ୍କଠାରୁ ବୈଚାରିକ ଏବଂ ମୌଖିକ ନିର୍ଦ୍ଦେଶ ପାଉଥିଲେ। 

ବର୍ତ୍ତମାନ ଫରିଦାବାଦ ମଡ୍ୟୁଲ୍ କୁହାଯାଉଥିବା ଘଟଣାର ତଦନ୍ତ ଅକ୍ଟୋବର ୨୭ ତାରିଖରେ ଶ୍ରୀନଗରର ନୌଗାମରେ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦକୁ ସମର୍ଥନ କରୁଥିବା ପୋଷ୍ଟର ଦେଖାଯିବା ସହିତ ଆରମ୍ଭ ହୋଇଥିଲା। ଏହି ମାମଲାରେ ପ୍ରଥମେ ତିନି ଜଣଙ୍କୁ ଗିରଫ କରାଯାଇଥିଲା, ଯେଉଁମାନେ ଥରେ ଶ୍ରୀନଗରରେ ପଥର ଫିଙ୍ଗା କାର୍ଯ୍ୟକଳାପରେ ସାମିଲ ଥିଲେ। ସେମାନେ ପୋଲିସକୁ ମୌଲବୀ ଇରଫାନ ଅହମ୍ମଦଙ୍କ ପାଖକୁ ନେଇଯାଇଥିଲେ। ମୌଲବୀଙ୍କଠାରୁ ସୂଚନା ଆଧାରରେ, ପୋଲିସ ଡାକ୍ତର ଆଦିଲ ଅହମ୍ମଦ ରାଥର ଏବଂ ଜମିର ଅହନାଗରଙ୍କୁ ଗିରଫ କରିଥିଲା । ଦୁଇଜଣଯାକ ଇରଫାନଙ୍କ ସହଯୋଗୀ।

ଶ୍ରୀନଗରରେ ସୁରାକ ଠାରୁ ଦିଲ୍ଲୀ ବିସ୍ଫୋରଣ ପର୍ଯ୍ୟନ୍ତ

ସେମାନଙ୍କୁ ପଚରାଉଚରା କରାଯିବା ପରେ ଜମ୍ମୁ ଓ କାଶ୍ମୀର ପୋଲିସ ମୌଲବୀଙ୍କ ଘରୁ ଡାକ୍ତର ମୁଜାମ୍ମିଲ ଶକିଲଙ୍କୁ ଟ୍ରାକ୍ କରିଥିଲା। ମୁଜାମ୍ମିଲ ଫରିଦାବାଦର ଧୌଜରେ ଥିବା ଅଲ୍ ଫଲାହ ବିଶ୍ୱବିଦ୍ୟାଳୟରେ କାମ କରନ୍ତି। ମୌଲବୀ ଦିଲ୍ଲୀ ବୋମା ବିସ୍ଫୋରଣ ପାଇଁ ଦାୟୀ ବୋଲି ସନ୍ଦେହ କରାଯାଉଥିବା ଡାକ୍ତର ମହମ୍ମଦ ଉମରଙ୍କ ସହିତ ମଧ୍ୟ ଜଡିତ ଥିଲେ। ଫରିଦାବାଦ ମଡ୍ୟୁଲ୍ ପର୍ଦ୍ଦାଫାସ ହେବା ପରେ ସେ ଆତଙ୍କିତ ହୋଇ ଏହି ଆକ୍ରମଣ କରିଥିବା ଜଣାପଡ଼ିଛି। ଏହି ସମୟରେ ଉତ୍ତର ପ୍ରଦେଶର ବାସିନ୍ଦା ଡାକ୍ତର ଶାହିନ ସଇଦ୍ ଫରିଦାବାଦ ମଡ୍ୟୁଲର ଆର୍ଥିକ ସହାୟତା ଏବଂ ସହାୟତା ପ୍ରଦାନକାରୀ ଭାବରେ ସାମନାକୁ ଆସିଛନ୍ତି।