Terror Mastermind: ନିରୀହ ଚେହେରା, ଖତରନାକ୍ ମାଇଣ୍ଡ...୨ ବର୍ଷର ଷଡଯନ୍ତ୍ର

ପାକିସ୍ତାନରୁ ମିଳୁଥିଲା ଅର୍ଡର୍ । ବିସ୍ଫୋରକ ଯୋଗାଡ କରୁଥିଲେ । ରାଇଫଲ୍, ପିସ୍ତଲ ଆଣି ରଖୁଥିଲେ । ଭାରତର ବିଭିନ୍ନ ସ୍ଥାନରେ ଆଟାକ୍‌ ପାଇଁ ଚାଲିଥିଲା ବଡ଼ ପ୍ଲାନ୍ । ସାମ୍ନାକୁ ଆସିଲା ମହିଳା ଆତଙ୍କବାଦୀ ଡାକ୍ତର ସାହିନ ସାହିଦର ପୁରା ଜନ୍ମକୁଣ୍ଡଳୀ । କେମିତି ଡାକ୍ତରରୁ ପାଲଟିଥିଲା ଦୁର୍ଦ୍ଦାନ୍ତ ଆତଙ୍କବାଦୀ, କେମିତି ଭାରତରେ ଚଳାଇଥିଲା ମହିଳା ଆତଙ୍କବାଦୀ ୱିଙ୍ଗ୍, ଦିଲ୍ଲୀ ବ୍ଲାଷ୍ଟ ପରେ ଗୋଟି ଗୋଟି କରି ସବୁ ତଥ୍ୟ ଆସୁଛି ପଦାକୁ ।

ଭାରତରେ ଜୈସ୍-ଏ-ମହମ୍ମଦର ମହିଳା ୱିଙ୍ଗ୍ 'ଜମାତ-ଉଲ୍-ମୋମିନାତ'ର ଗଠନ ଦାୟିତ୍ୱ ମିଳିଥିଲା ସାହିନକୁ ।  ଏହି ଆତଙ୍କୀ ସଂଗଠନର ମୁଖ୍ୟ ମାସୁଦ ଆଝାରର ଭଉଣୀ ସାଦିଆ ଆଝାର । ଆଉ ସାହିନ୍ ଥିଲା ଭାରତରେ ଏହି ୱିଙ୍ଗ୍ ର ମହିଳା ହେଡ୍ ।  ମହିଳାମାନଙ୍କୁ ଆତଙ୍କବାଦୀ ଗୋଷ୍ଠୀରେ ସାମିଲ କରୁଥିଲା । ଭାରତରେ ମହିଳା ଆତଙ୍କୀ ଗୋଷ୍ଠୀ ଗଠନ ଥିଲା ତା' ଲକ୍ଷ୍ୟ । ପାକିସ୍ତାନର ଆତଙ୍କୀ ମାସୁଦ ଆଝାର ସହ ସାହିନର ଥିଲା ଲିଙ୍କ୍‌ । ଆଉ ମାସୁଦର ଭଉଣୀ ସାଦିଆର ଅର୍ଡରରେ ସେ କାମ କରୁଥିଲା । ଫରିଦାବାଦରେ ଜେଇଏମ୍‌ ଆତଙ୍କୀ ମଡ୍ୟୁଲର ପର୍ଦ୍ଦାଫାସ୍ ହେବା ପରେ ଗିରଫ ହୋଇଥିଲା ସାହିନ୍ । ତା କାର୍‌ରୁ ଏକ ଆସଲ୍‌ଟ ରାଇଫଲ ମିଳିଥିଲା ।  

ସାହିନ୍‌ର ଘର ଲକ୍ଷ୍ନୌରେ । ମହାରାଷ୍ଟ୍ରର ଜଫର୍ ହୟାତଙ୍କ ସହ ତାର ବିବାହ ହୋଇଥିଲା । ହେଲେ ୨୦୧୫ରେ ସ୍ୱାମୀଠୁ ଛାଡପତ୍ର ପରେ ଫରିଦାବାଦ ପଳାଇ ଆସିଥିଲା ସାହିନ୍ । ସେଠି ଡାକ୍ତର ମୁଜାମିଲ୍ ସହ ତାର ସମ୍ପର୍କ ବଢିଥିଲା । ତା'ପରେ ମାସୁଦର ଭଉଣୀ ସହ ସମ୍ପର୍କରେ ଆସିଥିଲା ସାହିନ୍ । ଦିଲ୍ଲୀ ବ୍ଲାଷ୍ଟ ଘଟଣାରେ ସାହିନ୍ ସମେତ ୫ ଜଣ ଆତଙ୍କୀ ଡାକ୍ତରଙ୍କ ମୁଖା ଖୋଲିଛି । ଏମାନେ ମିଶି ୨ ବର୍ଷ ହେଲା ଭାରତରେ ଆକ୍ରମଣ ପାଇଁ ପ୍ଲାନ୍ କରୁଥିବାର ପ୍ରମାଣ ମିଳିଛି ପୋଲିସକୁ ।

ତେବେ ଭାରତର ଲେଡି ଆତଙ୍କବାଦୀ କିଛି ନୂଆ ନୁହେଁ । ୧୯୯୧ରେ ତତ୍କାଳୀନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟାକାଣ୍ଡର ମୁଖ୍ୟ ଥିଲା ଜଣେ ମହିଳା ଆତଙ୍କୀ । ଏଲଟିଟିଇର ଲେଡି ଆତଙ୍କୀ ଧନୁ । ସେ ଆତ୍ମଘାତୀ ବିସ୍ଫୋରଣରେ ରାଜୀବ ଗାନ୍ଧୀଙ୍କୁ ହତ୍ୟା କରିଥିଲା ।