Bihar Election: ନାମାଙ୍କନ ଦାଖଲ କଲେ ପ୍ରାର୍ଥୀ, ଏହି କାରଣ ଦର୍ଶାଇ ସିଧା ଉଠାଇନେଲା ପୋଲିସ

ବିହାର ରାଜନୀତିରେ ଏକ ବଡ଼ ଝଡ଼ ଦେଖାଦେଇଛି। ଦୁଇ ଜଣ ସିପିଆଇ-ଏମଏଲ ନେତାଙ୍କ ଗିରଫଦାରୀ ପରେ ପୋଲିସ ଏବେ ଜଣେ ଆରଜେଡି ପ୍ରାର୍ଥୀଙ୍କୁ ଗିରଫ କରିଛି। ପ୍ରାର୍ଥୀ ବିଧାନସଭା ନିର୍ବାଚନ ପାଇଁ ନାମାଙ୍କନ ଦାଖଲ କରିବାକୁ ଯାଉଥିବା ସମୟରେ ଏହି ଗିରଫଦାରୀ ହୋଇଥିଲା। ଝାଡ଼ଖଣ୍ଡ ପୋଲିସ କହିଛି ଯେ ସେ ୨୧ ବର୍ଷ ପୂର୍ବେ ୨୦୦୪ ମସିହାରେ ଗଢ଼ୱା ଜିଲ୍ଲାରେ ଘଟିଥିବା ଏକ ବ୍ୟାଙ୍କ ଡକାୟତି ମାମଲାରେ ସେ ଅଭିଯୁକ୍ତ ଥିଲେ ଏବଂ ତାଙ୍କ ବିରୁଦ୍ଧରେ ଏକ ଜାମିନ ବିହୀନ ଗିରଫ ପରୱାନା ଜାରି କରାଯାଇଥିଲା। ଗିରଫ ପୂର୍ବରୁ ପୋଲିସ ପ୍ରାର୍ଥୀଙ୍କୁ ତାଙ୍କର ନାମାଙ୍କନ ପତ୍ର ଦାଖଲ କରିବାକୁ ଅନୁମତି ଦେଇଥିଲା ଏବଂ ତୁରନ୍ତ ତାଙ୍କୁ ଗିରଫ କରିଥିଲା।

ପୋଲିସ ଦ୍ୱାରା ଗିରଫ ହୋଇଥିବା ଆରଜେଡି ପ୍ରାର୍ଥୀ ହେଉଛନ୍ତି ସତେନ୍ଦ୍ର ଶାହ । ସେ ସାସାରାମ ଆସନରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏହି ଗିରଫଦାରୀ ସହିତ ସତେନ୍ଦ୍ର ଶାହ ନାମାଙ୍କନ ଦାଖଲ କରିବା ପରେ ଗିରଫ ହୋଇଥିବା ବିରୋଧୀ ମେଣ୍ଟର ତୃତୀୟ ନେତା ।

ରୋହତାସ ଜିଲ୍ଲାର ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି,  ସୋମବାର ଯେତେବେଳେ ସତେନ୍ଦ୍ର ଶାହ ତାଙ୍କର ନାମାଙ୍କନ ଦାଖଲ କରିବାକୁ ସର୍କଲ ଅଫିସକୁ ଗଲେ, ଝାଡ଼ଖଣ୍ଡ ପୋଲିସ ସେଠାରେ ପହଞ୍ଚିଥିଲା। ପ୍ରାରମ୍ଭରେ ତାଙ୍କୁ ନାମାଙ୍କନ ଦାଖଲ କରିବାକୁ ଅନୁମତି ଦିଆଯାଇଥିଲା, କିନ୍ତୁ ପରେ ତାଙ୍କୁ ଗିରଫ କରାଯାଇଥିଲା। 

ପ୍ରକୃତରେ ୨୦୦୪ ମସିହାରେ ଗଡ଼ୱା ଜିଲ୍ଲାର ଚିରୋଞ୍ଜିଆ ମୋରରେ ଏକ ବ୍ୟାଙ୍କ ଡକାୟତି ହୋଇଥିଲା। ଏହି ମାମଲାରେ ସତେନ୍ଦ୍ର ଶାହ ଅଭିଯୁକ୍ତ ଥିଲେ। ଗଡ଼ୱା ଜିଲ୍ଲାର ସଦର ପୋଲିସ ଷ୍ଟେସନର ଇନଚାର୍ଜ ସୁନୀଲ ତିୱାରୀ କହିଛନ୍ତି, ଏହି ମାମଲାରେ ୨୦୧୮ ମସିହାରେ ସତେନ୍ଦ୍ର ଶାହଙ୍କ ବିରୋଧରେ ସ୍ଥାୟୀ ୱାରେଣ୍ଟ ଜାରି କରାଯାଇଥିଲା। ପୋଲିସ ରେକର୍ଡ ଅନୁଯାୟୀ, ତାଙ୍କ ବିରୁଦ୍ଧରେ ଡକାୟତି ଏବଂ ଅସ୍ତ୍ରଶସ୍ତ୍ର ଆଇନ ଉଲ୍ଲଂଘନ ପାଇଁ ଏକାଧିକ ମାମଲା ରୁଜୁ ହୋଇଛି। 

ନାମାଙ୍କନ ଦାଖଲ ପରେ ପରେ ଗିରଫ ହେବାରେ ତୃତୀୟ ନେତା

ସତ୍ୟେନ୍ଦ୍ର ଶାହ ନାମାଙ୍କନ ଦାଖଲ କରିବା ପରେ ଗିରଫ ହେବାରେ ଇଣ୍ଡିଆ ବ୍ଲକର ପ୍ରଥମ ନେତା ନୁହଁନ୍ତି। ପୂର୍ବରୁ ଭୋର ଏବଂ ଦାରୁଲି ଆସନର ସିପିଆଇ(ଏମ୍ଏଲ୍) ଲିବରେସନ ପ୍ରାର୍ଥୀ ଜିତେନ୍ଦ୍ର ପାଶ୍ୱାନ ଏବଂ ସତ୍ୟଦେବ ରାମଙ୍କୁ ମଧ୍ୟ ନାମାଙ୍କନ ଦାଖଲ କରିବା ପରେ ଗିରଫ କରାଯାଇଥିଲା। 

ସିପିଆଇ(ଏମ୍ଏଲ) ଲିବରେସନ ଏହି ଗିରଫଦାରୀକୁ ନିନ୍ଦା କରି ଏକ ବିବୃତି ଜାରି କରିଛି, ଆମେ ଜିତେନ୍ଦ୍ର ପାଶ୍ୱାନ ଏବଂ କମ୍ରେଡ୍ ସତ୍ୟଦେବ ରାମଙ୍କ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଗିରଫଦାରୀର ଦୃଢ଼ ନିନ୍ଦା କରୁଛୁ। ସେମାନଙ୍କୁ ସେମାନଙ୍କ ନାମାଙ୍କନ ପତ୍ର ଦାଖଲ କରିବା ପରେ ନାମାଙ୍କନ କେନ୍ଦ୍ର ବାହାରେ ଗିରଫ କରାଯାଇଥିଲା। 

୨୪୩ ଆସନ ବିଶିଷ୍ଟ ବିହାର ବିଧାନସଭା ପାଇଁ ନିର୍ବାଚନ ଦୁଇଟି ପର୍ଯ୍ୟାୟରେ ଅନୁଷ୍ଠିତ ହେବ। ପ୍ରଥମ ପର୍ଯ୍ୟାୟ ନଭେମ୍ବର ୬ ଏବଂ ଦ୍ୱିତୀୟ ପର୍ଯ୍ୟାୟ ନଭେମ୍ବର ୧୧ରେ ଅନୁଷ୍ଠିତ ହେବ। ଫଳାଫଳ ନଭେମ୍ବର ୧୪ରେ ଘୋଷଣା କରାଯିବ।