Viral Video: ଖାଉନାହାନ୍ତି ଖାଦ୍ୟ, ଦିନକୁ ପିଉଛନ୍ତି ୮ ଲିଟର ପୋଡା ଇଞ୍ଜିନ ତେଲ

୩୩ ବର୍ଷ ହେଲା ଇଞ୍ଜିନ ଅଏଲ ପିଇ ବଞ୍ଚିଛନ୍ତି। ଖାଦ୍ୟ ଖାଆନ୍ତି ନାହିଁ। ଦିନକୁ ପିଉଛନ୍ତି ୮ ଲିଟର ପୋଡା ଇଞ୍ଚିନ୍ ଅଏଲ। ଇଏ ସେହି ଇଞ୍ଜିନ ଅଏଲ ଯାହାକୁ ଆମେ ଗାଡିରେ ପକାଉ । ଏ କଥା ଶୁଣିଲେ ଯେ କେହି ବି ଆଶ୍ଚର୍ଯ୍ୟ ହେବେ ଏ ମଣିଷ ନା ଗାଡିମୋଟର । ବେଳେବେଳେ ସୋସିଆଲ ମିଡିଆରେ ଏମିତି କିଛି ଘଟଣା ଆମ ସାମ୍ନାକୁ ଆସେ, ଯାହାକୁ ବିଶ୍ୱାସ କରିବା ସହଜ ହୋଇନଥାଏ । ଏହା ବି ସେମିତି ଏକ ଘଟଣା । ଜଣେ ମଣିଷ ୩୩ ବର୍ଷ ହେଲା ଖାଦ୍ୟ ନ ଖାଇ କେବଳ ପୋଡା ଇଞ୍ଜିନ ଅଏଲ ପିଇ ବଞ୍ଚିଛନ୍ତି ।  
ଏହି ବ୍ୟକ୍ତି ଜଣକ ହେଲେ ଅଏଲ କୁମାର । ତାଙ୍କ ଘର ହେଉଛି କର୍ଣ୍ଣାଟକର ଶିବମୋଗାରେ । ତାଙ୍କର ପ୍ରକୃତ ନାଁ 'କୁମାର' ଅଟେ । କିନ୍ତୁ ଲୋକ ତାଙ୍କୁ 'ଅଏଲ କୁମାର' ନାଁରେ ଡାକନ୍ତି । 
ଆଶ୍ଚର୍ଯ୍ୟର କଥା ଯେ, ଏହି ବ୍ୟକ୍ତି ୩୩ ବର୍ଷ ହେଲା ଭାତ, ଡାଲି, ରୁଟି କି ଅନ୍ୟ କୌଣସି ଖାଦ୍ୟ ଖାଇ ନାହାନ୍ତି । କେବଳ ଚା ଓ ଇଞ୍ଜିନ ଅଏଲ ପିଇ ବଞ୍ଚିଛନ୍ତି । ଦିନକୁ ସେ ୭ରୁ ୮ ଲିଟର ଅଏଲ ପିଅନ୍ତି । ତଥାପି ସେ ପୂରା ସୁସ୍ଥ ଅଛନ୍ତି । ତାଙ୍କ ଦେହରେ କୌଣସି ରୋଗ ନାହିଁ । ଯାହାର ରହସ୍ୟ ଡାକ୍ତର ବି ବୁଝି ପାରୁନାହନ୍ତି ।
ତେବେ ଭଗବାନ ଆୟପ୍ପାଙ୍କ କୃପାରୁ ଏହା ସମ୍ଭବ ହୋଇଛି କୁହନ୍ତି ଅଏଲ କୁମାର । ଏଥିପାଇଁ ଅନେକ ଲୋକ ତାଙ୍କୁ 'ଚମତ୍କାରୀ ପୁରୁଷ' ବୋଲି ଭାବନ୍ତି । 
ଜଣେ ଇନଷ୍ଟାଗ୍ରାମ ୟୁଜର ଅଏଲ କୁମାରଙ୍କ ଭିଡିଓ ସୋସିଆଲ ମିଡିଆରେ ସେୟାର କରି ସେ କେବଳ ଇଞ୍ଜିନ ଅଏଲ ପିଇ ବଞ୍ଚୁଥିବା ଦାବି କରିଥିଲେ, ଯାହା ସାଙ୍ଗ ସାଙ୍ଗେ ଭାଇରାଲ ହୋଇ ଯାଇଥିଲା । ଲୋକେ ନାନା ପ୍ରକାର କମେଣ୍ଟ ବର୍ଷା କରିଥିଲେ । କିଏ ୟାକୁ ଚମତ୍କାର କହିଥିଲା ତ କିଏ ପଲ୍ୟୁସନ ସାର୍ଟିଫିକେଟ ଅଛି କି ନାଇଁ ପଚାରିଥିଲା। 
ବିଶେଷ ଦ୍ରଷ୍ଟବ୍ୟ: ଇଞ୍ଜିନ ଅଏଲ ମଣିଷ ଶରୀର ପାଇଁ ଅତି ହାନିକାରକ । ଏହା କୌଣସି ବିଷଠୁ କମ୍ ନୁହେଁ । ଏହାକୁ ପିଇଲେ ଗମ୍ଭୀର ରୋଗ ସହ ମୃତ୍ୟୁ ବି ହୋଇପାରେ । ତେଣୁ ଆପଣ ଆଦୌ ଅଏଲ୍ କୁମାରଙ୍କ ଭଳି ଏପରି ଦୁଃସାହସ କରନ୍ତୁ ନାହିଁ ।