ସୁଧୁରୁଛି ସ୍ଥିତି, ମହାରାଷ୍ଟ୍ର ପରେ କର୍ଣ୍ଣାଟକରେ କରୋନା ନିୟନ୍ତ୍ରଣକୁ ଆସୁଛି

ନୂଆଦିଲ୍ଲୀ: ଦେଶରେ ତଳମୁହାଁ କରୋନା ଗ୍ରାଫ୍ । ମହାରାଷ୍ଟ୍ର ପରେ ଦୈନିକ ସଂକ୍ରମଣରେ ଦ୍ୱିତୀୟ ସର୍ବାଧିକ ରହୁଥିବା କର୍ଣ୍ଣାଟକରେ ବି ଧୀମା ପଡ଼ିଛି ମହାମାରୀର ଗତି । କର୍ଣ୍ଣାଟକରେ ୨ ଲକ୍ଷ ତଳକୁ ଖସିଛି ଆକ୍ଟିଭ୍ କେସ୍ ସଂଖ୍ୟା । କର୍ଣ୍ଣାଟକରେ ଏବେ ଆକ୍ଟିଭ୍ କେସ୍ ରହିଛି ୧ ଲକ୍ଷ ୯୧ ହଜାର ୭୯୬ ।

ସେହିଭଳି ମହାରାଷ୍ଟ୍ରରେ ମଧ୍ୟ ତଳମୁହାଁ ସଂକ୍ରମଣ ହାର । ମହାରାଷ୍ଟ୍ର ସ୍ୱାସ୍ଥ୍ୟ ବିଭାଗ ପକ୍ଷରୁ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ ରାଜ୍ୟରେ ଏବେ ସୁସ୍ଥତା ହାର ରହିଛି ୯୫.୪୮ ପ୍ରତିଶତ । ସେହିପରି ମହାରାଷ୍ଟ୍ରରେ ୧ ଲକ୍ଷ ୫୫ ହଜାର ୪୭୪ ଆକ୍ଟିଭ୍ କେସ ରହିଛି ।

ସେପଟେ ପଞ୍ଜାବରେ ୩ ମାସ ପରେ ହଜାରେ ତଳକୁ ଖସିଛି ଦୈନିକ ସଂକ୍ରମଣ । ଅନ୍ୟପଟେ ଦେଶରେ ଏଯାଏଁ ମୋଟ ୨୫ କୋଟି ଲୋକଙ୍କୁ ଭ୍ୟାକ୍ସିନ୍ ଦିଆ ସରିଲାଣି । ପ୍ରାୟ ୨୦ କୋଟି ଲୋକେ ଭ୍ୟାକ୍ସିନର ସିଙ୍ଗଲ ଡୋଜ୍ ନେଇସାରିଥିବା ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।

ତେବେ ଦେଶରେ କରୋନା ସଂକ୍ରମଣ ହାର କମୁଥିଲେ ମଧ୍ୟ ବିପଦ ଏଯାଏଁ ଟଳିନି ବୋଲି ବିଶେଷଜ୍ଞମାନେ ମତ ଦେଇଛନ୍ତି । ସଚେତନ ନରହିଲେ ତୃତୀୟ ଲହର ଆସିବାର ସମ୍ଭାବନା ରହିଛି ।

କରୋନାର ସମ୍ଭାବ୍ୟ ତୃତୀୟ ଲହରରେ ଶିଶୁମାନେ ଅଧିକ ଆକ୍ରାନ୍ତ ହେବାର ଆଶଙ୍କା ଥିବାରୁ ସେମାନଙ୍କ ଚିକିତ୍ସା ପାଇଁ କେନ୍ଦ୍ର ସରକାର ଏକ ଗାଇଡ୍‌ଲାଇନ୍ ପ୍ରସ୍ତୁତ କରିଛନ୍ତି । ସ୍ୱାସ୍ଥ୍ୟ ବିଭାଗର ଡିରେକ୍ଟୋରେଟ ଜେନେରାଲ ଅପ୍ ହେଲ୍ଥ ସର୍ଭିସ ଦ୍ୱାରା ଜାରି କରାଯାଇଥିବା ଏହି ଗାଇଡଲାଇନ୍‌ରେ କୁହାଯାଇଛି ଯେ, ଲକ୍ଷଣହୀନ ଓ କମ୍ ସଂକ୍ରମଣ କ୍ଷେତ୍ରରେ ଷ୍ଟେରଏଡ୍ ବ୍ୟବହାର କରାଯିବା ଅନୁଚିତ ।

ଏହା ଛଡ଼ା ନିଜେ ନିଜେ କୌଣସି ଔଷଧ କିଣି ଖାଇବାକୁ ବାରଣ କରାଯାଇଛି । ଦେଖି ଚାହିଁ ଉପଯୁକ୍ତ ବିଚାର କରି HRCT ଇମେଜିଂ କରାଯିବା ଉଚିତ । ଶିଶୁଙ୍କ କ୍ଷେତ୍ରରେ ରେମଡେସିଭିର ବ୍ୟବହାରକୁ ସମ୍ପୂର୍ଣ୍ଣ ମନା କରାଯାଇଛି । କାରଣ ଏହାର ବ୍ୟବହାର ନେଇ ସୁରକ୍ଷା ଓ ଉପଯୁକ୍ତ ଡାଟାର ଅଭାବ ରହିଛି । ୧୨ ବର୍ଷରୁ ଅଧିକ ପିଲାଙ୍କ କ୍ଷେତ୍ରରେ ବାପା ମାଆଙ୍କ ତତ୍ୱାବଧାନରେ ୬ ମିନିଟ ବିଶିଷ୍ଟ ଓ୍ୱାକ୍ ଟେଷ୍ଟ କରିବାକୁ ପରାମର୍ଶ ଦିଆଯାଇଛି । ଆକ୍ୟୁଟ ରେସ୍ପିରୋଟୋରି ଡିଷ୍ଟ୍ରେସ୍ ସିଣ୍ଡୋମ୍ ହେଲେ ଉପଯୁକ୍ତ କୋଭିଡ ପରିଚାଳନା କରିବାକୁ ପରାମର୍ଶ ଦିଆଯାଇଛି ।