Plane Crash: ଭୟଙ୍କର ବିମାନ ଦୁର୍ଘଟଣା; ୧ ମାଇଲ ପର୍ଯ୍ୟନ୍ତ ବ୍ୟାପିଲା ନିଆଁ: ଏକାଧିକ ମୃତ

ଆମେରିକାରେ ଭୟଙ୍କର ବିମାନ ଦୁର୍ଘଟଣା ଘଟିଛି।  ଲୁଇସଭିଲ୍ ମହମ୍ମଦ ଅଲି ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ାଣ ଆରମ୍ଭ କରିବାର କିଛି ସମୟ ପରେ ଏକ UPS ମାଲବାହୀ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୭ ଜଣଙ୍କର ମୃତ୍ୟୁ ହୋଇଥିବା ବେଳେ ୧୧ ଜଣ ଆହତ ହୋଇଛନ୍ତି। ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କରିଥିଲେ। 
ଫେଡେରାଲ୍ ଏଭିଏସନ୍ ପ୍ରଶାସନ କହିଛି ଯେ ବିମାନଟି ସନ୍ଧ୍ୟା ପ୍ରାୟ ୫ଟା ୧୫ ସମୟରେ ହୋନୋଲୁଲୁ ଅଭିମୁଖେ ଯାତ୍ରା କରୁଥିବା ସମୟରେ ଖସି ପଡ଼ିଥିଲା। ବିମାନଟି କିଛି ସମୟ ପାଇଁ ଭୂମିରୁ ଉପରକୁ ଉଠି ରନୱେକୁ ଫେରିବା ପରେ ଏକ ବିରାଟ ଅଗ୍ନିଗୋଲାରେ ପରିଣତ ହୋଇଥିଲା।
ଲୁଇସଭିଲ୍ ମେୟର କ୍ରେଗ୍ ଗ୍ରୀନବର୍ଗ କହିଛନ୍ତି ଯେ ବିମାନରେ ବିପୁଳ ପରିମାଣର ଜେଟ୍ ଇନ୍ଧନ ଯୋଗୁଁ ନିଆଁ ଲାଗିଥିଲା। ଗ୍ରୀନବର୍ଗ କହିଛନ୍ତି, ବିମାନରେ ପ୍ରାୟ ୨ ଲକ୍ଷ ୮୦ ହଜାର ପାଉଣ୍ଡ ଇନ୍ଧନ ଥିଲା। ଦୁର୍ଘଟଣା ଏତେ ତୀବ୍ର ଥିଲା ଯେ, ପ୍ରାୟ ୧ ମାଇଲ ପର୍ଯ୍ୟନ୍ତ ନିଆଁ ବ୍ୟାପିଥିଲା।
କେଣ୍ଟୁକି ରାଜ୍ୟପାଳ ଆଣ୍ଡି ବେସିଅର କହିଛନ୍ତି ଯେ ବିମାନ ଦୁର୍ଘଟଣାରେ ତିନି ଜଣ କ୍ରୁ ସଦସ୍ୟଙ୍କର ମୃତ୍ୟୁ ହୋଇଛି ଏବଂ ୧୧ ଜଣ ଆହତ ହୋଇଛନ୍ତି। ମୃତକଙ୍କ ସଂଖ୍ୟା ଆହୁରି ବଢିପାରେ।
UPS ଏକ ପାର୍ସଲ କମ୍ପାନୀ। ଲୁଇସଭିଲ୍ ମହମ୍ମଦ ଅଲି ଅନ୍ତର୍ଜାତୀୟ ବିମାନବନ୍ଦର ହେଉଛି UPS ପାଇଁ ବିଶ୍ୱର ସର୍ବବୃହତ କେନ୍ଦ୍ର। ଏଠାରେ କମ୍ପାନୀର ୱାର୍ଲ୍ଡପୋର୍ଟ ଅବସ୍ଥିତ, ଯାହା ପାଞ୍ଚ ନିୟୁତ ବର୍ଗଫୁଟ ପରିବ୍ୟାପ୍ତ। ଦୁର୍ଘଟଣାଗ୍ରସ୍ତ ବିମାନଟି ଏକ MD-11F ମଡେଲ ଥିଲା, ଯାହା ମୂଳତଃ ମ୍ୟାକଡୋନେଲ ଡଗଲାସ ଦ୍ୱାରା ନିର୍ମିତ ହୋଇଥିଲା ଏବଂ ପରେ ବୋଇଂ ଦ୍ୱାରା ଅଧିଗ୍ରହଣ କରାଯାଇଥିଲା। ଏହି ବିମାନଟି ମୁଖ୍ୟତଃ କାର୍ଗୋ ପାଇଁ ବ୍ୟବହୃତ ହୁଏ ଏବଂ UPS, FedEx ଏବଂ Lufthansa Cargo ଭଳି କମ୍ପାନୀଗୁଡ଼ିକ ଦ୍ୱାରା ଉଡ଼ାଣ କରାଯାଏ। ଦୁର୍ଘଟଣାଗ୍ରସ୍ତ ବିମାନଟି ୧୯୯୧ ମସିହାରେ ନିର୍ମିତ ହୋଇଥିଲା।