Trump Orders Nuclear Tests: ପରମାଣୁ ପରୀକ୍ଷଣ କରିବ ଆମେରିକା: ରୁଷ୍ ଓ ଚୀନକୁ ଦେବ ଟକ୍କର

୩୦ ବର୍ଷ ପରେ ଆମେରିକାର ଏତିହାସିକ ନିଷ୍ପତ୍ତି। ପୁଣି ପରମାଣୁ ପରୀକ୍ଷଣ କରିବ ଆମେରିକା। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ (American President Donald Trump)ପ୍ରତିରକ୍ଷା ବିଭାଗ (ପେଣ୍ଟାଗନ)କୁ ତୁରନ୍ତ ପରମାଣୁ ଅସ୍ତ୍ର ପରୀକ୍ଷଣ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। 
ବୁଧବାର ଦିନ ସୋସିଆଲ ମିଡିଆ ପ୍ଲାଟଫର୍ମ "ଟ୍ରୁଥ୍ ସୋସିଆଲ" ରେ ଏକ ପୋଷ୍ଟରେ ଟ୍ରମ୍ପ ଏହି ଘୋଷଣା କରିଛନ୍ତି। ସେ ଲେଖିଛନ୍ତି ଯେ ଅନ୍ୟ ଦେଶମାନଙ୍କ ପରୀକ୍ଷଣକୁ ଦୃଷ୍ଟିରେ ରଖି, ସେ ପ୍ରତିରକ୍ଷା ବିଭାଗକୁ ସମାନ ଆଧାରରେ ଆମେରିକାର ପରମାଣୁ ଅସ୍ତ୍ର ପରୀକ୍ଷଣ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ପ୍ରକ୍ରିୟା ତୁରନ୍ତ ଆରମ୍ଭ ହେବ।
ଟ୍ରମ୍ପ ସ୍ୱତନ୍ତ୍ର ଭାବରେ ରୁଷ ଏବଂ ଚୀନ୍ ନାମ ନେଇ କହିଛନ୍ତି ଯେ ରୁଷ ଦ୍ୱିତୀୟ ଏବଂ ଚୀନ୍ ତୃତୀୟ ସ୍ଥାନରେ ଅଛି, କିନ୍ତୁ ଆଗାମୀ ପାଞ୍ଚ ବର୍ଷ ମଧ୍ୟରେ ସେମାନେ ସମାନ ହୋଇପାରିବେ। ଦକ୍ଷିଣ କୋରିଆରେ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ତାଙ୍କର ସାକ୍ଷାତର ଗୋଟିଏ ଘଣ୍ଟା ପୂର୍ବରୁ ଟ୍ରମ୍ପ ଏହି ପୋଷ୍ଟ କରିଥିଲେ।
ଟ୍ରମ୍ପ ତାଙ୍କ ପୋଷ୍ଟରେ ଏହା ମଧ୍ୟ ଦାବି କରିଛନ୍ତି ଯେ ଆମେରିକା ବିଶ୍ୱରେ ସର୍ବାଧିକ ସଂଖ୍ୟକ ପରମାଣୁ ଅସ୍ତ୍ର ରଖିଛି। ତଥାପି, ଅନ୍ତର୍ଜାତୀୟ ତଥ୍ୟ ଏହି ଦାବିକୁ ମିଥ୍ୟା ଦର୍ଶାଉଛି। ଆନ୍ତର୍ଜାତୀୟ ପରମାଣୁ ଅସ୍ତ୍ର ବିଲୋପ ଅଭିଯାନ ଅନୁଯାୟୀ, ରୁଷ ପାଖରେ ସର୍ବାଧିକ ସଂଖ୍ୟକ ପରମାଣୁ ଅସ୍ତ୍ର ରହିଛି, ଯାହାର ସଂଖ୍ୟା ୫,୫୦୦ ରୁ ଅଧିକ, ଯେତେବେଳେ ଆମେରିକା ପାଖରେ ପ୍ରାୟ ୫,୦୪୪ ଅଛି।

ଆମେରିକା ୩୩ ବର୍ଷ ପୂର୍ବେ ପରମାଣୁ ପରୀକ୍ଷଣ କରିଥିଲା:-

ଏକ ପୂର୍ଣ୍ଣ ପରମାଣୁ ଅସ୍ତ୍ର ପରୀକ୍ଷଣରେ ଏକ ଜୀବନ୍ତ ପରମାଣୁ ବୋମାର ବିସ୍ଫୋରଣ କରାଯାଇ ଏହାର ବିନାଶକାରୀ ଶକ୍ତି, ବିକିରଣ ପ୍ରଭାବ ଏବଂ ବୈଷୟିକ ଦକ୍ଷତା ମପାଯାଏ। ଏପରି ପରୀକ୍ଷଣ ସାଧାରଣତଃ ଭୂତଳ କିମ୍ବା ଆକାଶରେ କରାଯାଉଥିଲା। ବିକିରଣ ସଂସ୍ପର୍ଶର ବିପଦ ହେତୁ ଏହା ଏକ ପରିବେଶ ପ୍ରତି ବିପଦ ସୃଷ୍ଟି କରୁଥିଲା।
ଆମେରିକା ଶେଷ ଥର ପାଇଁ ୧୯୯୨ ମସିହା ସେପ୍ଟେମ୍ବର ୨୩ ତାରିଖରେ ନେଭାଡାରେ ଏକ ପରମାଣୁ ପରୀକ୍ଷଣ କରିଥିଲା। ସେହି ବର୍ଷ, ତତ୍କାଳୀନ ରାଷ୍ଟ୍ରପତି ଜର୍ଜ ଏଚ୍.ଡବ୍ଲୁ. ବୁଶ ଭୂମିଗତ ପରମାଣୁ ପରୀକ୍ଷଣ ଉପରେ ସ୍ଥଗିତ ଘୋଷଣା କରିଥିଲେ।
୧୯୯୦ ଦଶକ ପରେ ରୁଷ ଏବଂ ଚୀନ୍ ମଧ୍ୟ ଏପରି ପରୀକ୍ଷଣ ବନ୍ଦ କରିଦେଇଥିଲେ। ଏବେ ଟ୍ରମ୍ପ ଏହି ପରୀକ୍ଷଣଗୁଡ଼ିକୁ ପୁନଃଆରମ୍ଭ କରିବାକୁ କହୁଛନ୍ତି।
ରୁଷ ସମ୍ପ୍ରତି ଦୁଇଟି ପରମାଣୁ କ୍ଷେପଣାସ୍ତ୍ର ପରୀକ୍ଷଣ କରିଛି। ଯାହା ପୂର୍ଣ୍ଣାଙ୍ଗ ପରମାଣୁ ଅସ୍ତ୍ର ପରୀକ୍ଷଣଠାରୁ ଭିନ୍ନ। ଏହା ଏକ କ୍ଷେପଣାସ୍ତ୍ର ପ୍ରଣାଳୀ ପରୀକ୍ଷଣ କରେ, କିନ୍ତୁ ପ୍ରକୃତରେ ଏଥିରେ ପରମାଣୁ ବିସ୍ଫୋରଣ ସାମିଲ ନାହିଁ।
ନ୍ୟୁକ୍ଲିୟର ମିସାଇଲ ସିଷ୍ଟମ ପରୀକ୍ଷଣରେ ଡମି କିମ୍ବା ସିମୁଲେଟେଡ୍ ୱାରହେଡ୍ ବ୍ୟବହାର କରି ମିସାଇଲର ଇଞ୍ଜିନ, ପରିସର, ଦିଗନିର୍ଦ୍ଦେଶ ସଠିକତା ଏବଂ ବିତରଣ କ୍ଷମତା ପରୀକ୍ଷା କରାଯାଏ।
ଟ୍ରମ୍ପଙ୍କ ନିର୍ଦ୍ଦେଶରେ ପ୍ରକୃତ ବିସ୍ଫୋରକ ପରୀକ୍ଷଣ ହେବ ନା ବିସ୍ଫୋରଣ ବିନା ପରମାଣୁ ପ୍ରକ୍ରିୟାର ପରୀକ୍ଷଣ ହେବ ତାହା ଆମେରିକା ପ୍ରତିରକ୍ଷା ବିଭାଗ ଏପର୍ଯ୍ୟନ୍ତ ସ୍ପଷ୍ଟ କରିନାହିଁ।
ବିଶେଷଜ୍ଞମାନେ କୁହନ୍ତି ଯେ ଆମେରିମକାର ଏହା ଏକ ପୂର୍ଣ୍ଣାଙ୍ଗ ବିସ୍ଫୋରକ ପରୀକ୍ଷଣ ନୁହେଁ, ବରଂ ଏକ ପ୍ରସ୍ତୁତିମୂଳକ କିମ୍ବା ଅନୁମାନିକ ପରୀକ୍ଷଣ, କାରଣ ଆମେରିକା ବ୍ୟାପକ ପରମାଣୁ ପରୀକ୍ଷଣ ନିଷେଧ ଚୁକ୍ତି (CTBT) ରେ ସ୍ୱାକ୍ଷର କରିଛି। ଯଦିଓ ଏହା ଏପର୍ଯ୍ୟନ୍ତ ଏହାକୁ ସମ୍ପୂର୍ଣ୍ଣ କାର୍ଯ୍ୟକାରୀ କରିନାହିଁ।

ରୁଷ ଏକ ପରମାଣୁ ଶକ୍ତି ସମ୍ପନ୍ନ କ୍ଷେପଣାସ୍ତ୍ର ପରୀକ୍ଷଣ କରିଛି:-

ରୁଷ ଅକ୍ଟୋବର ୨୧ ତାରିଖରେ ଏକ ପରମାଣୁ ଶକ୍ତି ସମ୍ପନ୍ନ କ୍ଷେପଣାସ୍ତ୍ର ପରୀକ୍ଷଣ କରିଥିଲା। ଟ୍ରମ୍ପ ଏହାକୁ ଏକ ଭୁଲ ପଦକ୍ଷେପ ବୋଲି କହିଥିଲେ ଏବଂ ପୁଟିନଙ୍କୁ କ୍ଷେପଣାସ୍ତ୍ର ପରୀକ୍ଷଣ କରିବା ପରିବର୍ତ୍ତେ ଯୁଦ୍ଧ ବନ୍ଦ କରିବାକୁ ଅନୁରୋଧ କରିଥିଲେ।