Jaishankar Meets Rubio: ମାର୍କୋ ରୁବିଓଙ୍କୁ ଭେଟିଲେ ଜୟଶଙ୍କର; ବାଣିଜ୍ୟ, ଶକ୍ତି, ପରମାଣୁ ପ୍ରସଙ୍ଗରେ ଆଲୋଚନା

ଭାରତ ଆମେରିକା ଐତିହାସିକ ଟ୍ରେଡ୍ ଡିଲ୍ ପରେ ଅନ୍ୟ କ୍ଷେତ୍ରରେ ଆର୍ଥିକ ସହଯୋଗ ଉପରେ ଦୁଇ ଦେଶର ଗୁରୁତ୍ବ । ଆଉ ଏହି ଏଜେଣ୍ଡାକୁ ନେଇ ୩ ଦିନିଆ ହାଇପ୍ରୋଫାଇଲ୍ ଆମେରିକା ଗସ୍ତରେ ଯାଇଛନ୍ତି ବିଦେଶ ମନ୍ତ୍ରୀ ଏସ୍. ଜୟଶଙ୍କର । ୱାଂଶିଟନରେ ପହଞ୍ଚିବା ପରେ ସେ ତାଙ୍କ ଆମେରିକୀୟ ପ୍ରତିପକ୍ଷ ମାର୍କୋ ରୁବିଓଙ୍କୁ ଭେଟି ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି । 

ବିଶେଷ କରି କ୍ରିଟିକାଲ ମିନେରାଲ ପ୍ରସଙ୍ଗରେ ସହଯୋଗ ନେଇ ଦୁଇ ନେତାଙ୍କ ମଧ୍ୟରେ କଥାବାର୍ତ୍ତା ହୋଇଛି । ଗୁରୁତ୍ବପୂର୍ଣ୍ଣ କ୍ରିଟିକାଲ ମିନେରାଲର ଆବିଷ୍କାର ଓ ଗବେଷଣା ପ୍ରସଙ୍ଗରେ ଆଜି ଭାରତ ଓ ଆମେରିକା ମଧ୍ୟରେ ପ୍ରଥମ ମନ୍ତ୍ରୀସ୍ତରୀୟ  ଆଲୋଚନା ହେବ । ତେବେ ତା ପୂର୍ବରୁ ଜୟଶଙ୍କର, ରୁବିଓଙ୍କ ସହ ଏ ନେଇ କଥାବାର୍ତ୍ତା କରିଛନ୍ତି । 

ନିଜେ ରୁବିଓ  ମଧ୍ୟ ଏକ୍ସରେ ଏ ସମ୍ପର୍କରେ ସୂଚନା ଦେବା ସହ କ୍ରିଟିକାଲ ମିନେରାଲ କ୍ଷେତ୍ରରେ ଉଭୟ ଦେଶ ପାଇଁ ନୂଆ ଆର୍ଥିକ ସମ୍ଭାବନାର ରାସ୍ତା ଖୋଲିପାରେ ବୋଲି ଉଲ୍ଲେଖ କରିଛନ୍ତି । ଏଥିସହିତ ଭାରତ-ଆମେରିକା ମଧ୍ୟରେ ହୋଇଥିବା ଟ୍ରେଡ୍ ଡିଲ୍ କୁ ଉଭୟେ ସ୍ବାଗତ କରିଥିବା ଲେଖିଛନ୍ତି ରୁବିଓ । 

ସେହିପରି ଜୟଶଙ୍କର ମଧ୍ୟ ଏକ୍ସରେ ରୁବିଓଙ୍କ ସହ କଥାବାର୍ତ୍ତାକୁ ଉଲ୍ଲେଖ କରିବା ସହ ବ୍ୟାବସାୟିକ, ଶକ୍ତି, ପରମାଣୁ, ପ୍ରତିରକ୍ଷା ସହିତ କ୍ରିଟିକାଲ ମିନେରାଲ ଏବଂ ଆଇଟି କ୍ଷେତ୍ରରେ ରଣନୈତିକ ସହଯୋଗ ଉପରେ ଆଲୋଚନା ହୋଇଥିବା ଲେଖିଛନ୍ତି ।