Donald Trump: ଟ୍ରମ୍ପ ଭେନେଜୁଏଲାର କାମଚଳା ରାଷ୍ଟ୍ରପତି! ସୋସିଆଲ ମିଡିଆରେ ଆମେରିକା ରାଷ୍ଟ୍ରପତିଙ୍କ ବଡ ଘୋଷଣା

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ, ଟ୍ରୁଥ୍ ସୋସିଆଲରେ ଏକ ପୋଷ୍ଟରେ ନିଜକୁ "ଭେନେଜୁଏଲାର କାମଚଳା ରାଷ୍ଟ୍ରପତି" ଭାବରେ କହିଛନ୍ତି। ଯାହା ଭେନେଜୁଏଲାରେ ୱାଶିଂଟନର ଭୂମିକା ଉପରେ ଚର୍ଚ୍ଚା ଆରମ୍ଭ ହୋଇଛି।

ଟ୍ରମ୍ପଙ୍କ ଏହି ପୋଷ୍ଟରେ "ଭେନେଜୁଏଲାର କାମଚଳା ରାଷ୍ଟ୍ରପତି, ଜାନୁଆରୀ ୨୦୨୬" ଲେଖାଯାଇଥିଲା। ଏଥିରେ ତାଙ୍କୁ ଆମେରିକାର ୪୫ତମ ଏବଂ ୪୭ତମ ରାଷ୍ଟ୍ରପତି ଭାବରେ ମଧ୍ୟ ତାଲିକାଭୁକ୍ତ କରାଯାଇଥିଲା।

ଆମେରିକା ଭେନେଜୁଏଲାରେ ବଡ଼ ଧରଣର ସାମରିକ କାର୍ଯ୍ୟାନୁଷ୍ଠାନ କରିଥିଲେ। ଭେନେଜୁଏଲାର ରାଷ୍ଟ୍ରପତି ନିକୋଲାସ ମାଦୁରୋ ଏବଂ ତାଙ୍କ ପତ୍ନୀ ସିଲିଆ ଫ୍ଲୋରେସଙ୍କୁ ଗିରଫ କରାଯାଇ ନ୍ୟୁୟର୍କକୁ ସ୍ଥାନାନ୍ତର କରାଯାଇଥିଲା, ଯେଉଁଠାରେ ଉଭୟ ନାର୍କୋ-ଆତଙ୍କବାଦ ଷଡ଼ଯନ୍ତ୍ର ଅଭିଯୋଗରେ ଜେଲରେ ଅଛନ୍ତି।

ମାଦୁରୋଙ୍କ ଅପସାରଣ ପରେ, ଭେନେଜୁଏଲାର ଉପରାଷ୍ଟ୍ରପତି ଏବଂ ତୈଳ ମନ୍ତ୍ରୀ ଡେଲସି ରୋଡ୍ରିଗେଜ ଗତ ସପ୍ତାହରେ ଦେଶର ଅନ୍ତରୀଣ ରାଷ୍ଟ୍ରପତି ଭାବରେ ଆନୁଷ୍ଠାନିକ ଭାବରେ ଶପଥ ଗ୍ରହଣ କରିଥିଲେ।

ଅନ୍ୟପଟେ ଭେନେଜୁଏଲା ପରେ ଟ୍ରମ୍ପଙ୍କ ନିଶାନାରେ କ୍ୟୁବା। ଭେନେଜୁଆଲା ତୈଳ ଭଣ୍ଡାରକୁ ସୁରକ୍ଷା ସହାୟତା ଦେଇଥିବାରୁ କ୍ୟୁବା ଉପରେ କ୍ଷୁବ୍ଧ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍। ଭେନେଜୁଏଲାର ଏକ ବଡ଼ ସହଯୋଗୀ ରାଷ୍ଟ୍ର ହେଉଛି କ୍ୟୁବା। ଭେନେଜୁଏଲାଠୁ ପ୍ରଚୁର ପରିମାଣରେ ତେଲ ଓ ଆର୍ଥିକ ସହାୟତା ଲାଭ କରୁଥିଲା। ପ୍ରତିବଦଳରେ ଭେନେଜୁଏଲାକୁ ସୁରକ୍ଷା ବ୍ୟବସ୍ଥା ଯୋଗାଉଥିଲା। ଆଗକୁ ଆଉ ଏହା ଚଳିବନି ବୋଲି କହିଛନ୍ତି ଟ୍ରମ୍ପ୍।