Sunil Thapa Dies at 68: ଆଉ ନାହାନ୍ତି ପ୍ରିୟଙ୍କା ଚୋପ୍ରାଙ୍କ କୋଚ୍, ୬୮ ବର୍ଷ ବୟସରେ ପରଲୋକ

ବରିଷ୍ଠ ନେପାଳୀ ଚଳଚ୍ଚିତ୍ର ଅଭିନେତା ସୁନୀଲ ଥାପା ଆଉ ନାହାନ୍ତି। ତାଙ୍କର ୬୮ ବର୍ଷ ବୟସରେ ପରଲୋକ ହୋଇଛି। ରିପୋର୍ଟ ଅନୁସାରେ, ସୁନୀଲ ଥାପାଙ୍କ ସ୍ୱାସ୍ଥ୍ୟାବସ୍ଥା ହଠାତ୍ ବିଗିଡ଼ିଯିବାରୁ ତାଙ୍କୁ ଚେତାଶୂନ୍ୟ ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିଲା। ପରେ କାଠମାଣ୍ଡୁର ଥାପାଥାଲିର ନର୍ଭିକ୍ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ସେ ଅନେକ ବଲିଉଡ୍ ଫିଲ୍ମ ଏବଂ ୱେବ୍ ସିରିଜରେ ମଧ୍ୟ ଅଭିନୟ କରିଥିଲେ।

ହସ୍ପିଟାଲ ଅଧ୍ୟକ୍ଷ ରାଜେନ୍ଦ୍ର ବାହାଦୁର ସିଂହ କହିଛନ୍ତି ଯେ ତାଙ୍କୁ ଅଚେତ ଅବସ୍ଥାରେ ହସ୍ପିଟାଲକୁ ଅଣାଯାଇଥିଲା। ସକାଳ ୭:୪୪ରେ କରାଯାଇଥିବା ଇସିଜିରୁ ତାଙ୍କ ମୃତ୍ୟୁ ସୂଚନା ମିଳିଛି। ତାଙ୍କର ମୃତ୍ୟୁର କାରଣ ହୃଦଘାତ ବୋଲି ଡାକ୍ତରମାନେ ସନ୍ଦେହ କରୁଛନ୍ତି। ହସପିଟାଲ୍ ସୂତ୍ରରୁ ଜଣାପଡିଛି ଯେ “ତାଙ୍କୁ ଅଣାଯିବା ସମୟରେ ସେ ଅଚେତ ଥିଲେ। ତୁରନ୍ତ ଏକ ଇସିଜି କରାଯାଇଥିଲା, ଯାହା ତାଙ୍କ ମୃତ୍ୟୁକୁ ନିଶ୍ଚିତ କରିଥିଲା"।

ନେପାଳୀ ସିନେମାର ଜଣେ ପ୍ରବୀଣ ଅଭିନେତା ସୁନୀଲ ଥାପା, କିଛି ଦଶନ୍ଧି ଧରି ନେପାଳୀ, ବଲିଉଡ୍ ଏବଂ ଭୋଜପୁରୀ ଚଳଚ୍ଚିତ୍ରରେ ବ୍ୟାପକ ଭାବରେ କାମ କରିଥିଲେ। ସେ ୩୦୦ରୁ ଅଧିକ ନେପାଳୀ ଚଳଚ୍ଚିତ୍ରରେ ଅଭିନୟ କରିଛନ୍ତି ଏବଂ "ଚିନୋ" ଚଳଚ୍ଚିତ୍ରରେ "ରାତେ କୈଲା" ଭାବରେ ତାଙ୍କର ପ୍ରତୀକାତ୍ମକ ଭୂମିକା ପାଇଁ ସ୍ୱୀକୃତି ପାଇଛନ୍ତି। ଏହି ଭୂମିକା ତାଙ୍କୁ ଶିଳ୍ପର ସବୁଠାରୁ ପ୍ରସିଦ୍ଧ ଖଳନାୟକ ଭାବରେ ପ୍ରତିଷ୍ଠା କରିଥିଲା।

ସୁନୀଲ ଥାପା ଅନେକ ବଲିଉଡ୍ ଫିଲ୍ମ ଏବଂ ୱେବ୍ ସିରିଜରେ ମଧ୍ୟ ଅଭିନୟ କରିଛନ୍ତି। ସେ ବଲିଉଡ୍ ଫିଲ୍ମ "ଦି ଫ୍ୟାମିଲି ମ୍ୟାନ୍" ଏବଂ ପ୍ରିୟଙ୍କା ଚୋପ୍ରାଙ୍କ ସହିତ "ମେରି କମ୍"ରେ କାମ କରିଛନ୍ତି। "ମେରି କମ୍"ରେ ସୁନୀଲ ଥାପା ପ୍ରିୟଙ୍କାଙ୍କ କୋଚ୍ ଭୂମିକାରେ ଅଭିନୟ କରିଥିଲେ। ଫିଲ୍ମ "ମେରି କମ୍" ପାଇଁ ତାଙ୍କୁ ଫିଲ୍ମଫେୟାରରେ ନାମାଙ୍କନ କରାଯାଇଥିଲା। ଏହା ଛଡା ସେ "ଏକ ଦୁଜେ କେ ଲିଏ" ଏବଂ "ଆଜ କି ଆୱାଜ" ଭଳି ବଲିଉଡ ଚଳଚ୍ଚିତ୍ରରେ ମଧ୍ୟ ଅଭିନୟ କରିଛନ୍ତି। ସୁନୀଲ ଥାପା ଅନେକ ଭୋଜପୁରୀ ଚଳଚ୍ଚିତ୍ରରେ ମଧ୍ୟ ଅଭିନୟ କରିଛନ୍ତି।