Jatra Actor Dies: ସତ ହୋଇଗଲା ନାଟକ ...ରାତିରେ ଅଭିନୟ , ସକାଳେ ମୃତ୍ୟୁ

ଗତକାଲିର ନାଟକ ଥିଲା ‘ସବୁ ବାଟ ମୋର ଏଇଠି ଶେଷ’ । ଆଉ ସତରେ ଏଇଠି ସବୁ ବାଟ ତାଙ୍କ ପାଇଁ ଶେଷ ହୋଇଯାଇଛି । ଚୀରନିଦ୍ରାରେ ଶୋଇଯାଇଛନ୍ତି ଯାତ୍ରା ଅଭିନେତା ନରେନ୍ଦ୍ର ଦାସ । ନୂଆପଡ଼ା ଜିଲ୍ଲା ସିନାପାଲି ଥାନା କେନ୍ଦୁମୁଣ୍ଡା ଗାଁରେ ଅପେରା ଅଷ୍ଟଶମ୍ଭୁ ଗଣନାଟ୍ୟ ନାଟକ ପରିବେଶଣ କରୁଥିଲା । ନାଟକର ମୁଖ୍ୟ ଖଳନାୟକ ଥିଲେ ଅଭିନେତା ନରେନ୍ଦ୍ର ଦାସ । ହେଲେ ହଠାତ ନରେନ୍ଦ୍ର ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ସିନାପାଲି CHCକୁ ଅଣାଯାଇଥିଲା  l ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ l

ଆଜି ତୃତୀୟ ରଜନୀରେ ‘ଦଇବ ଦଉଡ଼ି ମଣିଷ ଗାଈ’ ନାଟକରେ ଅଭିନୟ କରିଥା’ନ୍ତେ ନରେନ୍ଦ୍ର । ହେଲେ ନରେନ୍ଦ୍ରଙ୍କ ଅକାଳ ବିୟୋଗ ସମସ୍ତଙ୍କୁ ମ୍ରିୟମାଣ କରିଛି । ସିନାପାଲି ପୋଲିସ ଶବ ଜବତ କରିବା ସହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଛି l ମୃତ ନରେନ୍ଦ୍ରଙ୍କ ଘର ଜଗତସିଂହପୁର ଥାନା କାଦୁଅପଡା ଗାଁରେ । ସେ ୧୦ ବର୍ଷ ହେବ ବିଭିନ୍ନ ଯାତ୍ରା ପାର୍ଟିରେ ଅଭିନୟ କରିଛନ୍ତି । ହେଲେ ହଠାତ୍ ତାଙ୍କର ଏ ବିୟୋଗ ଯାତ୍ରା ଜଗତକୁ ସ୍ତବ୍ଧ କରିଦେଇଛି । 

ଶୋକାକୁଳ କଳାକାର । ମଞ୍ଚ ବି ନୀରବି ଯାଇଛି । କାରଣ ଯାତ୍ରାମଞ୍ଚରୁ ଆଉ ଶୁଣିବାକୁ ମିଳିବନି ନରେନ୍ଦ୍ରଙ୍କ ସେ ଦମଦାର ସଂଳାପ l ଅଭିନେତା ନରେନ୍ଦ୍ର ଦାସଙ୍କ ଏ ଅକସ୍ମାତ୍ ମୃତ୍ୟୁ ଯାତ୍ରା ଜଗତରେ ଆଉ ଏକ ଶୂନ୍ୟସ୍ଥାନ ସୃଷ୍ଟି କରିଛି ।