Hotel Room Turns Deadly: ନିଶାସକ୍ତ ଅବସ୍ଥାରେ ଦୁଷ୍କର୍ମ ଉଦ୍ୟମରୁ ହତ୍ୟା ଅଭିଯୋଗ , ସାଙ୍ଗରେ ଯାଇଥିବା ମହିଳା ଓ ପୁରୁଷ ବନ୍ଧୁ ତଣ୍ଟି ଚିପି କଲେ ହତ୍ୟା

ଶାରୀରିକ ସୁଖ ପାଇଁ ତଣ୍ଟିଚିପି ହତ୍ୟା । ହୋଟେଲ ରୁମରେ କଲବଲ କରି ନେଲେ ଜୀବନ ।  ଜଣେ ଗୋଡ଼କୁ ମାଡ଼ି ବସିଲା । ଆଉ ଜଣେ ସାର୍ଟରେ ତଣ୍ଟିକୁ ଗୁଡ଼ାଇ ଚିପିଚିପି ମାରିଦେଲା । ବାଲେଶ୍ୱର ଜିଲ୍ଲା ସହଦେବ ଖୁଣ୍ଟା ଥାନା ଅଧିନ ଏଇ ହୋଟେଲରୁ ଯୁବକଙ୍କ ହତ୍ୟା ଘଟଣାର ପର୍ଦ୍ଦାଫାସ ହୋଇଛି । ଦୁଇ ଅଭିଯୁକ୍ତଙ୍କୁ ପୋଲିସ ବାନ୍ଧିବା ପରେ ଅଭିଯୁକ୍ତଙ୍କ ଠାରୁ ସବୁ ସତ ଓଗାରିଛନ୍ତି । ପୋଲିସ କହିଛି, ଦୁଇ ଜଣ ବନ୍ଧୁ ଆକାଶ ମହାନ୍ତ ଓ ରାମଚନ୍ଦ୍ର ସିଂ ଜଣେ ମହିଳା ଜେମାମଣି ସିଂଙ୍କୁ ଆଣିଥିଲେ । ହୋଟେଲରେ ସମସ୍ତେ ରହିଥିଲେ । ରାମଚନ୍ଦ୍ର ଜେମାମଣିଙ୍କ ସହ ପ୍ରଥମେ ଶାରୀରିକ ସମ୍ପର୍କ ରଖିଥିଲା । ଆକାଶ ସେହି ମହିଳାଙ୍କ ସହ ସମ୍ପର୍କ ରଖିବାକୁ କହିବାରୁ ଉଭୟ ମନା କରିବା ସହ ତାଙ୍କୁ ହତ୍ୟା କରିଛନ୍ତି। 

ଦେହ ସୁଖ ପାଇଁ ଜୀବନ ନେବା ପରେ ଏବେ ଆଇନ୍ ହାତରେ ଧରାପଡ଼ିଛନ୍ତି । ଆକାଶକୁ ମାରିବା ପରେ ନିଶାଗ୍ରସ୍ତ ରାମଚନ୍ଦ୍ର ଶବ ପାଖରେ ରାତିସାରା ଶୋଇଥିବା ବେଳେ ରାତି ତମାମ ଶବ ନିକଟରେ ବସି ରହିଥିଲା ଜେମାମଣି । ଶେଷରେ ସକାଳୁ ଉଭୟ ଫେରାର ହୋଇଯାଇଥିଲେ ।  ଜେମାମଣି ଜାରକା ପଳାଇଥିବା ବେଳେ ରାମଚନ୍ଦ୍ର ଗାଁକୁ ଏକୁଟିଆ ପଳାଇଥିଲା ।  ଆକାଶ, ଜେମାମଣି ଓ ରାମଚନ୍ଦ୍ର ବେତନଟୀ ଅଞ୍ଚଳର ଗୋଟିଏ ଗାଁର । ୩ ଜଣ ମଧ୍ୟ ବିବାହିତ ବୋଲି ପୋଲିସ କହିଛି।  

ଅଭିଯୁକ୍ତ ରାମଚନ୍ଦ୍ର ଓ ଜେମାମଣିଙ୍କ ଦୁଇଟି ଲେଖାଏଁ ପିଲା ଅଛନ୍ତି । ପ୍ରଥମେ ରାମଚନ୍ଦ୍ର କୁ ପୋଲିସ ଧରି ପଚରାଉଚରା କରିବା ପରେ ଜେମାମଣି ବାବଦରେ ଜାଣିବାକୁ ପାଇଥିଲେ । ଏହାପରେ ସ୍ପେଶାଲ ଟିମ ଗଠନ କରି ଜାରକାରୁ ଜେମାମଣିକୁ ପୋଲିସ ଧରିଛି ଆଉ ଅଧିକ୍ ତଦନ୍ତ ଚଳାଇଛି।