କାଲି ଫଗୁ ଅବିରରେ ରଙ୍ଗିନ ହେବ ଗାଁଠୁ ସହର

ଦୋଳ ବେଦୀରେ ଚଳନ୍ତି ଜଗନ୍ନାଥ ଦୋଳ ଗୋବିନ୍ଦ । ଘଣ୍ଟ ଘଣ୍ଟା, ଖୋଳ କରତାଳ, ନାମ ସଂକୀର୍ତ୍ତନ ଓ ମୃଦଙ୍ଗ ନାଦ ସହ ବର୍ଷୁଛି ଅବିର, ବର୍ଷୁଛି ରଙ୍ଗ । ଭିଜୁଛି ଭକ୍ତ, ଭିଜୁଛନ୍ତି ଭଗବାନ। ପୁରୀ ଶ୍ରୀକ୍ଷେତ୍ରରେ ଆୟୋଜିତ ହୋଇଛି ମହାପ୍ରଭୁଙ୍କ ଦୋଳ ଉତ୍ସବ ନୀତି । ବିମାନରେ ବିରାଜିତ ହୋଇ ଦୋଳବେଦୀକୁ ଯିବା ବାଟରେ ଅବିର ଖେଳରେ ଭକ୍ତଙ୍କ ସହ ଏକାକାର ହୋଇଛନ୍ତି ଭଗବାନ । ରାଜ୍ୟପାଳ ରଘୁବର ଦାସ ବି ମହାପ୍ରଭୁଙ୍କୁ ଦର୍ଶନ କରିବା ପୂର୍ବରୁ ସିଂହଦ୍ୱାର ସାମ୍ନାର ଏ ଅପୂର୍ବ ଦୃଶ୍ୟ ଦେଖି ବିହ୍ୱଳ ହୋଇଛନ୍ତି। ଏଣେ ସିଂହାସନରେ ଶ୍ରୀଜୀଉଙ୍କୁ ସୁନାବେଶରେ ଦର୍ଶନ କରି କୃତ୍ୟ କୃତ୍ୟ ହୋଇଛନ୍ତି ଭକ୍ତ।