ଦେଶରେ ତୃତୀୟ ଲହର ଅଣିବ କି ଡେଲ୍‌ଟା ପ୍ଲସ୍ ଭ୍ୟାରିଆଣ୍ଟ ?

ନୂଆଦିଲ୍ଲୀ: ଦେଶରେ ତୃତୀୟ ଲହର ଅଣିବ କି ଡେଲ୍‌ଟା ପ୍ଲସ୍ ? ଏହାକୁ କରୋନାର ଚିନ୍ତାଜନକ ଭ୍ୟାରିଆଣ୍ଟ୍ ବୋଲି କେନ୍ଦ୍ର ସରକାର ଘୋଷଣା କରିସାରିଥିବା ବେଳେ, ଏବେ ସୁଦ୍ଧା ଭାରତର ମୁଖ୍ୟତଃ ୪ଟି ରାଜ୍ୟରେ ୪୦ଟି ଡେଲ୍ଟା ପ୍ଲସ୍ କେସ୍ ଚିହ୍ନଟ ହୋଇସାରିଲାଣି । ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ୩ଟି ରାଜ୍ୟକୁ ଆଲର୍ଟ ବି କରାଯାଇଛି । ଯଦିଓ ଓଡ଼ିଶାରେ ଏହି କେସ୍ ଚିହ୍ନଟ ହୋଇନାହିଁ, ତଥାପି ଉଭୟ ରାଜ୍ୟ ଓ କେନ୍ଦ୍ର ସରକାର ସଜାଗ ଅଛନ୍ତି ବୋଲି DMET ସିବିକେ ମହାନ୍ତି କହିଛନ୍ତି । ଏହି ଭ୍ୟାରିଆଣ୍ଟ୍ ଅଧିକ ସଂକ୍ରାମକ ହେଲେ ବି, ଏହା ବିରୋଧରେ ଟିକାର ପ୍ରଭାବକୁ ନେଇ ଆଶ୍ୱସ୍ତିକର ସୂଚନା ଦେଇଛନ୍ତି ବିଶେଷଜ୍ଞ ।

ମହାରାଷ୍ଟ୍ର, ମଧ୍ୟପ୍ରଦେଶ, କେରଳ ଓ ତାମିଲନାଡ଼ୁ ମୁଖ୍ୟତଃ ୪ଟି ରାଜ୍ୟରେ କାୟା ମେଲାଉଛି କରୋନାର ଡେଲ୍ଟା ପ୍ଲସ୍ ଭ୍ୟାରିଆଣ୍ଟ୍ ।ଏବେସୁଦ୍ଧା ଦେଶରେ ୪୦ଟି ଡେଲ୍ଟା ପ୍ଲସ୍ ମାମଲା ଚିହ୍ନଟ ହୋଇଛି । ତେବେ ଆଗକୁ ସଂକ୍ରମଣ ଅଧିକ ବଢ଼ିବା ଆଶଙ୍କା କରି ମହାରାଷ୍ଟ୍ର, କେରଳ ଓ ମଧ୍ୟପ୍ରଦେଶକୁ ସତର୍କ କରିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । ଡେଲ୍ଟା ପ୍ଲସ୍ ବ୍ୟାପିଥିବା ଜିଲ୍ଲାଗୁଡ଼ିକରେ କଣ୍ଟେନମେଣ୍ଟ କଟକଣା କଡ଼ାକଡ଼ି କରିବା, ଟେଷ୍ଟିଂ ଓ ଟ୍ରେସିଂ ତ୍ୱରାନ୍ୱିତ କରିବା, ପ୍ରାଥମିକତା ଭିତ୍ତିରେ ଟିକାକରଣ ଏବଂ ଜିନୋମ୍ ସର୍ଭେଲାନ୍ସ ପାଇଁ ପର୍ଯ୍ୟାପ୍ତ ସାମ୍ପଲ୍ ଉଦ୍ଦିଷ୍ଟ ଲ୍ୟାବ୍‌କୁ ପଠାଇବାକୁ କୁହାଯାଇଛି ।

ଏହି ଭ୍ୟାରିଆଣ୍ଟର ସଂକ୍ରମଣ ଓ ଗୁରୁତର ଅସୁସ୍ଥ କରିବାର କ୍ଷମତା ଏବଂ ଟିକା ନେଇଥିବା ବ୍ୟକ୍ତିଙ୍କ ଉପରେ ଏହାର କି ପ୍ରଭାବ ପଡ଼ିପାରେ, ସେନେଇ ଅନୁଧ୍ୟାନ ଚାଲିଛି । ଏନେଇ ସୂଚନା ଦେଇଛନ୍ତି ଡିଏମ୍ଇଟି ସିବିକେ ମହାନ୍ତି ।

କେତେ ଭୟାବହ ଏହି ଡେଲ୍ଟା ପ୍ଲସ୍ ଭ୍ୟାରିଆଣ୍ଟ ? ନିଆଁରେ ଘିଅ ଢାଳିଲା ଭଳି ଏହା କରୋନାର ତୃତୀୟ ଲହରକୁ ଅଧିକ ଭୟାବହ କରିବ କି ? ଡେଲ୍ଟାର ଏହି ନୂଆ ମ୍ୟୁଟେସନ୍‌କୁ କେନ୍ଦ୍ର ସରକାର ଚିନ୍ତାଜନକ ଭ୍ୟାରିଆଣ୍ଟ୍ ବୋଲି ସ୍ପଷ୍ଟ କରିଛନ୍ତି । ଇଣ୍ଡିଆନ୍ ସାର୍ସ କୋଭ୍-ଟୁ ଜିନୋମିକ୍ କନ୍ସର୍ଟିଆ କେନ୍ଦ୍ରକୁ ରିପୋର୍ଟ ଦେଇଛି, ଏହା ଅଧିକ ସଂକ୍ରାମକ ଫୁସ୍‌ଫୁସ୍‌କୁ ଅଧିକ ପ୍ରଭାବିତ କରେ ଏବଂ ଏହା ବିରୋଧରେ ମନୋକ୍ଲୋନାଲ୍ ଆଣ୍ଟିବଡି କାମ କରିନପାରେ । ଏପଟେ ସ୍ୱାସ୍ଥ୍ୟ ବିଶେଷଜ୍ଞ ଚେତାଇଛନ୍ତି, ଆସନ୍ତା ୪-୬ ସପ୍ତାହରେ ଡେଲ୍ଟା ପ୍ଲସ୍ ସଂକ୍ରମଣ ବଢିଲେ ତୃତୀୟ ଲହର ଆଗୁଆ ଆସିଯାଇପାରେ । ତେବେ ପ୍ରଚଳିତ କରୋନା ଟିକା ଡେଲ୍ଟା ଭ୍ୟାରିଆଣ୍ଟ ବିରୋଧରେ କାମ କରୁଥିବାରୁ ଏହା ଡେଲ୍ଟା ପ୍ଲସ୍ ବିରୋଧରେ ମଧ୍ୟ କାମ କରିବ ବୋଲି ଆଶା କରାଯାଉଛି ।