Big Fight In Nuapada: ବିଗୁଲ୍ ବାଜିନି, ରାଜନୀତି ସରଗରମ...କାଲି ନୂଆପଡାରେ ପାଓ୍ୱାର୍ ଶୋ'

ଦିଲ୍ଲୀରେ ସରିଲା କସରତ । ଏବେ ଗ୍ରାଉଣ୍ଡରେ ହେବ ମହା ମୁକାବିଲା । ଆସନ୍ତାକାଲି ନୂଆପଡା ଯାଉଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଆଉ ମୋହନଙ୍କ କାର୍ଯ୍ୟକ୍ରମକୁ କାଉଣ୍ଟର କରି କଂଗ୍ରେସ କରିବ ନ୍ୟାୟ ଯାତ୍ରା । ଯଦିଓ ଉପନିର୍ବାଚନ ପାଇଁ ତାରିଖ ଘୋଷଣା ହୋଇନି ହେଲେ ସରଗରମ ହେଲାଣି ନୂଆପଡା ରାଜନୀତି । ପାର୍ବଣ ପରେ ଏବେ ଗ୍ରାଉଣ୍ଡକୁ ଓହ୍ଲାଇଲେଣି ନେତା ।

ଗତକାଲି ଦିନିକିଆ ଦିଲ୍ଲୀ ଗସ୍ତରେ ଯାଇ ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କୁ ଭେଟିଥିଲେ ମୁଖ୍ୟମନ୍ତ୍ରୀ । ନୂଆପଡାରେ ବିଜେପିର ପ୍ରାର୍ଥୀ ଚୟନ ଓ ରଣନୀତି ନେଇ ସେ ଆଲୋଚନା କରିଥିବା କୁହାଯାଉଛି । ଆଉ ଏହାର ଦିନକ ପରେ ଆସନ୍ତାକାଲି ନୂଆପଡା ଯାଇ ବିଭିନ୍ନ ଉନ୍ନୟନ ମୂଳକ କାମରେ ଶୁଭରମ୍ଭ କରିବେ ମୁଖ୍ୟମନ୍ତ୍ରୀ । ସେପଟେ ଏହାକୁ କାଉଣ୍ଟର କରି କଂଗ୍ରେସ ପିସିସି ସଭାପତି ଭକ୍ତ ଚରଣ ଦାସ ଙ୍କ ନେତୃତ୍ବରେ କୋମନାରୁ ଖରିଆର ରୋଡ଼ ଯାଏଁ ନ୍ୟାୟ ଶୋଭାଯାତ୍ରା ସହ ନ୍ୟାୟ ସଭା କରିବ ।

ନୂଆପଡା ଉପନିର୍ବାଚନ ଶାସକ ଦଳ ପାଇଁ ଏସିଡ ଟେଷ୍ଟ ହୋଇଥିବା ବେଳେ, ବିଜେଡି ଆଉ କଂଗ୍ରେସ ପାଇଁ ସମ୍ମାନର ପ୍ରଶ୍ନ ।  ଆଉ ସେଥିପାଇଁ ତାରିଖ ଘୋଷଣା ହୋଇନଥିଲେ ମଧ୍ୟ ନୂଆପଡାରେ ଏକ୍ସରସାଇଜ ଆରମ୍ଭ କରିଦେଲେଣି ୩ ପ୍ରମୁଖ ରାଜନୈତିକ ଦଳ । କଂଗ୍ରେସ ଘାସିରାମ ମାଝୀଙ୍କୁ ଏକ ପ୍ରକାର ପ୍ରାର୍ଥୀ ଘୋଷଣା କରିଦେଇଥିବା ବେଳେ ଦିବଂଗତ ବିଧାୟକ ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆ ମଧ୍ୟ ବିଜେଡିରୁ ପ୍ରାର୍ଥୀ ହେବା ନେଇ ଦମ୍ଭୋକ୍ତି କରି ମୈଦାନକୁ ଓହ୍ଲେଇ ସାରିଲେଣି ।

ସେପଟେ ବିଜେପି, ଭେଟେରାନ୍ ବସନ୍ତ ପଣ୍ଡା କିମ୍ବା ତାଙ୍କ ପୁଅ ଅଭିନନ୍ଦନ ପଣ୍ଡା ଙ୍କୁ ପ୍ରାର୍ଥୀ କରିବା ନେଇ ଚର୍ଚ୍ଚା ଲାଗି ରହିଥିବା ବେଳେ, ଦଳ କିନ୍ତୁ ଏ ନେଇ ହୋମୱାର୍କ ଆରମ୍ଭ କରିଦେଇଛି । ନିକଟରେ ନୂଆପଡା ଗସ୍ତରେ ଯାଇ ରାଜ୍ୟ ସଭାପତି ଏକ ବଡ ଧରଣର ମିଶ୍ରଣ ପର୍ବ କରିଥିବା ବେଳେ ମନ୍ତ୍ରୀମାନେ ଘନ ଘନ ଗସ୍ତ କରୁଛନ୍ତି ।