ପିକ୍‌ନିକ୍ ଋତୁରେ କାହିଁକି ବଢୁଛି ଦୁର୍ଘଟଣା ? ପଢ଼ନ୍ତୁ ଏହି ରିପୋର୍ଟ

ମୋହନା /ଅନୁଗୋଳ /ଭୁବନେଶ୍ୱର : ପିକ୍‌ନିକ୍ ଋତୁରେ କାହିଁକି ବଢୁଛି ରାସ୍ତା ଦୁର୍ଘଟଣା ? ଜୋସ୍‌ରେ ହୋସ୍ ହରାଉଛନ୍ତି କି ଗାଡ଼ି ଚାଳକ ? ଯାହାର ପରିଣାମ ଭୋଗୁଛନ୍ତି ନିରୀହ ଯାତ୍ରୀ ।

ଗତକାଲି ବିଳମ୍ବିତ ରାତିରେ ଅନୁଗୋଳ ଜରପଡ଼ାରେ ଘଟିଥିବା ମର୍ମନ୍ତୁଦ ଦୁର୍ଘଟଣାରେ ଯାଇଛି ଚାରି ଚାରିଟି ଜୀବନ । ରାୟପୁରରୁ ପୁରୀ ଯିବାବାଟରେ ଦୁର୍ଘଟଣାଗ୍ରସ୍ତ ଗାଡ଼ିରେ ଥିବା ୧୦ଜଣଙ୍କ ମଧ୍ୟରୁ ଆଉ ୬ଜଣ ଗୁରୁତର ଅଛନ୍ତି ।

ଗଞ୍ଜାମ ତପ୍ତପାଣି ଘାଟିରେ ଓଲଟି ପଡ଼ିଥିଲା ରେଭେନ୍ସା ଛାତ୍ରଛାତ୍ରୀଙ୍କ ପିକ୍‌ନିକ୍ ବସ୍। ଦୟନୀୟ ଅବସ୍ଥାରେ ଆହତଙ୍କୁ ଡାକ୍ତରଖାନା ପଠାଯାଉଛି । ଆଉ ଆଜି ଆଠଗଡ଼ କଲରାଗଡ଼ ଛକରେ ଘଟିଛି ମଧ୍ୟ ଦୁର୍ଘଟଣା । ଭୁବନେଶ୍ୱର ପ୍ରଶାନ୍ତିବିହାର ଅଞ୍ଚଳର ମୃତ ଯୁବତୀ ଆନନ୍ଦିନୀ ବିଶୋଇ ନିଜ ବନ୍ଧୁଙ୍କ ସହ ମୋଟର ସାଇକେଲରେ ଅନୁଗୁଳ ଯିବା ବାଟରେ ଦୁର୍ଘଟଣାର ଶିକାର ହୋଇଥିଲେ ।

ଏସବୁ ଘଟଣାରେ କେଉଁଠି କ୍ଷମତା ଠାରୁ ଅଧିକ ଯାତ୍ରୀ ପରିବହନ ଓ ଅନ୍ୟଟି ଅନ୍ୟମନସ୍କ ଗାଡ଼ି ଚାଳନାର ପରିଣତି ବୋଲି ଆଲୋଚନା ହେଉଛି।

ତଥ୍ୟ କହୁଛି ରାଜ୍ୟର ମଙ୍ଗୁଳି ଠାରୁ ସମ୍ବଲପୁର, ସମ୍ବଲପୁରରୁ ରାଉରକେଲା, ସମ୍ବଲପୁରରୁ ସୋହେଲା, ଭୁବନେଶ୍ୱରରୁ ପୁରୀ ଓ ଜଳେଶ୍ୱରରୁ ଇଚ୍ଛାପୁରମ୍ ଦେଇ ଯାଇଥିବା ଜାତୀୟ ରାଜପଥ ଅତ୍ୟଧିକ ଦୁର୍ଘଟଣାପ୍ରବଣ ମଙ୍ଗୁଳି-ସମ୍ବଲପୁର ରାସ୍ତାରେ ୨୦୧୮ରେ ୧୮୦ଜଣଙ୍କ ଜୀବନ ଯାଇଛି ।

ପରିସଂଖ୍ୟାନ ଅନୁସାରେ ଗତବର୍ଷର ସର୍ବାଧିକ ଦୁର୍ଘଟଣା ଜାନୁୟାରୀ ଓ ଡିସେମ୍ବର ମାସରେ ହିଁ ଘଟିଛିା ଅର୍ଥାତ୍ ପିକ୍‌ନିକ୍ ଋତୁରେ ସେହିଭଳି ସାରା ରାଜ୍ୟରେ ଜାନୁୟାରୀରେ ୧୦୫୩ଟି ଦୁର୍ଘଟଣାରେ ୪୬୨ ଜଣଙ୍କ ମୃତ୍ୟୁ ଘଟିଥିବାବେଳେ ଡିସେମ୍ବରରେ ୧୦୭୨ ଦୁର୍ଘଟଣାରେ ପ୍ରାଣ ହରାଇଛନ୍ତି ୪୭୯ଜଣ ।

କଣ ହୋଇପାରେ ପିକ୍‌ନିକ୍ ଋତୁରେ ଦୁର୍ଘଟଣା ବୃଦ୍ଧିର କାରଣ ? ମଦ୍ୟପାନ କରି ଗାଡ଼ି ଚାଳନା, କ୍ଷମତାଠାରୁ ଅଧିକ ଯାତ୍ରୀ ପରିବହନ ଓ ଖୁସିଗପରେ ମସଗୁଲ୍ ହୋଇ ଅସାବଧାନତା ଭାବେ ଗାଡ଼ି ଚଳାଇବା ହିଁ ଏହାର ପ୍ରମୁଖ କାରଣ ବୋଲି କହିଛନ୍ତି ସଡ଼କ ସୁରକ୍ଷା କର୍ମୀ। ତାସହ ଏହି ସମୟରେ ରାସ୍ତାରେ ଗାଡ଼ି ଯାଞ୍ଚକୁ ଅଧିକ କଡ଼ାକଡ଼ି କରିବାକୁ ପରାମର୍ଶ ଦେଇଛନ୍ତି ପରିବହନ ମନ୍ତ୍ରୀ।