'ଶ୍ରୀମନ୍ଦିର ବିକାଶ ପାଇଁ ଜମି ଦେଇଥିବା ବ୍ୟକ୍ତି ବିଶେଷଙ୍କ ନାଁ ରହିବ'

ଭୁବନେଶ୍ୱର : ଶ୍ରୀମନ୍ଦିର ଓ ଶ୍ରୀକ୍ଷେତ୍ରର ବିକାଶ ପାଇଁ ମୁଖ୍ୟମନ୍ତ୍ରୀଙ୍କ ଡ୍ରାଫ୍ଟ ଆର୍କିଟେକ୍ଚର ପ୍ଲାନ୍ ଲୋକାର୍ପଣ ପରେ ଏହାକୁ ସେବାୟତମାନେ ସ୍ୱାଗତ କରିଛନ୍ତି । କିନ୍ତୁ ସୌନ୍ଦର୍ଯ୍ୟକରଣ ପାଇଁ ଆଉ ସେବାୟତମାନଙ୍କ ଘର ନଭାଙ୍ଗିବା ପାଇଁ ବରିଷ୍ଠ ସେବାୟତ ବିନାୟକ ଦାସ ମହାପାତ୍ର ଅନୁରୋଧ କରିଛନ୍ତି ।

ଅନ୍ୟପକ୍ଷରେ ଶ୍ରୀମନ୍ଦିର ପାଇଁ ଜମି ଦେଇଥିବା ଲୋକମାନଙ୍କୁ ସରକାରୀ ଚାକିରି ଯୋଗାଇଦେବାକୁ ବରିଷ୍ଠ ସେବାୟତ ରଜତ ପ୍ରତିହାରୀ ଦାବି କରିଛନ୍ତି ।  ଜଗନ୍ନାଥ ସେନା ଆବାହକ ପ୍ରିୟଦର୍ଶନ ପଟ୍ଟନାୟକ ସ୍ଥାୟୀ ସୌନ୍ଦର୍ଯ୍ୟକରଣ ପାଇଁ ଦାବି କରିଛନ୍ତି । ଗତକାଲି ଶ୍ରୀ ଜଗନ୍ନାଥ ଐତିହ୍ୟ କରିଡର ପାଇଁ ଜମି ଦାନ କରିଥିବା ସମସ୍ତ ବ୍ୟକ୍ତି ଓ ମଠକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଧନ୍ୟବାଦ ଜଣାଇବା ସହ ସେମାନଙ୍କ ନାଁ କରିଡରର ଏକ ସ୍ଥାୟୀ ଫଳକରେ ଖୋଦେଇ ହୋଇ ରହିବ ବୋଲି ଘୋଷଣା କରିଥିଲେ । ଅଧିଗୃହୀତ ସବୁ ଜମି ଜଗନ୍ନାଥଙ୍କ ନାଁରେ ରେକର୍ଡ ରହିବ।

ଏଥିସହ କରିଡର୍ ପ୍ଲାନ୍ ସଂପର୍କରେ ଜାନୁଆରୀ ୧୫ ସୁଦ୍ଧା ଜନସାଧାରଣଙ୍କଠାରୁ ମତାମତ ଲୋଡ଼ିଛନ୍ତି ରାଜ୍ୟ ସରକାର । ମତାମତ ମିଳିବା ପରେ ଫେବୃଆରୀ ୨୦୨୦ ସୁଦ୍ଧା ଐତିହ୍ୟ କରିଡରର ଚୂଡ଼ାନ୍ତ ପ୍ଲାନ୍ ପ୍ରକାଶିତ ହେବ।