Law and Order Under Question: ପୋଲିସକୁ ଅପରାଧୀଙ୍କ ଖୋଲା ଚ୍ୟାଲେଞ୍ଜ; କେତେବେଳେ ଲୁଟୁଛନ୍ତି, କେବେ ହାଣୁଛନ୍ତି

ଭୁଶୁଡ଼ି ପଡ଼ିଛି କି ଭୁବନେଶ୍ୱରର ଆଇନ୍ ଶୃଙ୍ଖଳା ପରିସ୍ଥିତି ? କେତେ ସୁରକ୍ଷିତ ରାଜଧାନୀ ବାସିନ୍ଦାଙ୍କ ଧନ ଜୀବନ ? ରାତିରେ ଦୁବୃର୍ତ୍ତ ଗୋଡ଼େଇ ଗୋଡ଼େଇ ହାଣୁଛନ୍ତି, ଦିନରେ ଯାହାକୁ ପାରୁଛନ୍ତି ତାକୁ ଲୁଟୁଛନ୍ତି । ଆଜି ଦିନକରେ ଦୁଇ ଦୁଇଟି ଲୁଟ୍ ହୋଇଛି । ତା ପୂର୍ବରୁ ଗତକାଲି ରାତିରେ ଏକ କ୍ୟାଫେରେ ଆତଙ୍କରାଜ ସୃଷ୍ଟି କରିଛନ୍ତି ଦୁର୍ବୃର୍ତ୍ତ । ଆଉ ବଢୁଥିବା ଏଭଳି ଅପରାଧକୁ ଦେଖି ଭୟଭୀତ କ୍ୟାପିଟାଲ ବାସିନ୍ଦା ।

ରାଜଧାନୀରେ ଲୁଟେରାଙ୍କ ରାଜ୍ ! ସକାଳେ ଝାମ୍ପି ନେଇ ଚାଲି ଯାଉଛନ୍ତି, ଦ୍ୱିପହରେ ପେପର ସ୍ପ୍ରେ ମାରି ଗହଣା ଦୋକାନରୁ କଳା କନା ବୁଲାଉଛନ୍ତି । ଟିକେ ନଜର ପକାନ୍ତୁ ଏ ୨ଟି CCTV ଭିଜୁଆଲ ଉପରେ । ଗୋଟିଏ ଚନ୍ଦ୍ରଶେଖରପୁର ଥାନା ଶୈଳଶ୍ରୀବିହାର ଅଞ୍ଚଳର । ଅନ୍ୟଟି ତମାଣ୍ଡୋ ଥାନା କଳିଙ୍ଗ ବିହାର ଅଞ୍ଚଳର । କିଭଳି ଭୁବନେଶ୍ବରରେ ମାତିଛନ୍ତି ଲୁଟେରା । 

ସକାଳ ୯ଟାରେ ମର୍ଣ୍ଣିଂ ୱାକ୍ ସାରି ଘରକୁ ଫେରୁଥିଲେ ଶୈଳଶ୍ରୀ ବିହାର ଅଞ୍ଚଳର ୭୬ ବର୍ଷିୟା ବୃଦ୍ଧା ଶକୁନ୍ତଳା ମହାନ୍ତି । ଆଉ ଏହି ସମୟରେ ସ୍କୁଟିରେ ଆସୁଥିବା ଦୁଇଜଣ ମୁଖାପିନ୍ଧା ଲୁଟେରା ଏକୁଟିଆ ଦେଖି ଶକୁନ୍ତଳାଙ୍କ ବେକରୁ ସୁନା ଚେନ୍ ଝାମ୍ପି ନେଇ ଛୁ ମାରିଥିଲେ । ଶକୁନ୍ତଳାଙ୍କ ପୁଅ ପୋଲିସ ବିଭାଗରେ କାମ କରୁଥିବା ଜଣାପଡିଛି । 

ଅପରାହ୍ନରେ କଳିଙ୍ଗବିହାର ଅଞ୍ଚଳରେ ଘଟିଛି ଆଉ ଏକ ଘଟଣା। କଳିଙ୍ଗବିହାର କେ ୪ ଠାରେ ଥିବା ଏ ସୁନା ଅଳଙ୍କାର ଦୋକାନରୁ ପେପର ସ୍ପ୍ରେ ମାରି ଗରାଖ ବେଶରେ ଲୁଟେରା ଲୁଟି ନେଇଛନ୍ତି ୬ ଲକ୍ଷ ଟଙ୍କାର ସୁନା ଗହଣା । ଏ ହେଉଛି ଲୁଟ ବେଳର ସିସିଟିଭି। ଭଉଣୀ ବାହାଘର କଥା କହି ବ୍ରେସଲେଟ ଓ ସୁନା ଚେନ ଦେଖିବା ପରେ ସେଲସମ୍ୟାନଙ୍କ ମୁହଁଙ୍କୁ ସ୍ପ୍ରେ ମାରିଥିଲା ଲୁଟେରା । ଆଉ ତା ପରେ ଘଟଣାସ୍ଥଳରୁ ଫେରାର ହୋଇଥିଲା । 

ଖାଲି ଲୁଟପାଟ ନୁହେଁ, ରାତି ଅଧରେ ଆତଙ୍କ ରାଜ ଖେଳାଉଛନ୍ତି ଦୁର୍ବୃର୍ତ୍ତ । ତମାଣ୍ଡୋ ଥାନା ଭଗବାନପୁରରେ ଥିବା ଏକ କ୍ୟାଫେ ସମ୍ମୁଖର ଏ ଦୃଶ୍ୟ ଉପରେ ନଜର ପକାନ୍ତୁ । ୧୬ ତାରିଖ ରାତି ପ୍ରାୟ ପାଖାପାଖି ୧୨ ଟା ସମୟରେ ୩ ଟି ବାଇକରେ ୬ ଜଣ ଆସୁଛନ୍ତି । କିଛି ବୁଝିବା ପୂର୍ବରୁ କାଫେରେ କାମ କରୁଥିବା ଯୁବକଙ୍କୁ ମାରଣାସ୍ତ୍ରରେ ହାଣି ପକାଉଛନ୍ତି । କାର ଉପରେ ମଧ୍ୟ ରାଗ ସୁଝାଇ ଚାଲିଛନ୍ତି। ପୂର୍ବ ଶତ୍ରୁତାରୁ ଏଭଳି କାଣ୍ଡ କରିଥିବା ଅଭିଯୋଗ ହୋଇଛି । ତେଣେ ରାଜଧାନୀରେ ଲୁଟେରାଙ୍କ ଆତଙ୍କ ସହ ଆତତାୟୀଙ୍କ ଆକ୍ରମଣରେ ଭୟଭୀତ ଲୋକେ । ତେବେ ଉଭୟ ଘଟଣାକୁ ନେଇ କମିଶନରେଟ୍ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।