ଦାନ ମାଝୀଙ୍କ ଛାତି ଆଜି କୁଣ୍ଢେମୋଟ, ଖୁସିରେ ଆତ୍ମବିଭୋର.. ଝିଅ ମାଟ୍ରିକ୍‌ ପାସ୍‌ କରିଛି..

କଳାହାଣ୍ଡି: ଦାନଙ୍କ ଛାତି ଆଜି କୁଣ୍ଢେମୋଟ । ଖୁସିରେ ଆତ୍ମବିଭୋର ଆଉ ଭାବବିହ୍ୱଳ । କାହିଁକି ବା ନହେବେ । ଝିଅ ଯେତେବେଳେ ତାଙ୍କର ମାଟ୍ରିକ୍ ପାସ୍ କରିଛି । ଗାଁ ଏବଂ ପରିବାର ପାଇଁ ଗୌରବ ଅର୍ଜନ କରିଛି ତାଙ୍କ ଝିଅ ।

କଳାହାଣ୍ଡି ଜିଲ୍ଲା ଥୁଆମୂଳ-ରାମପୁର ବ୍ଲକ ମେଲଘରାର ଦାନ ମାଝୀଙ୍କ ବଡ଼ ଝିଅ ଚାନ୍ଦିନୀ । ଚଳିତ ବର୍ଷ ୨୮୦ ମାର୍କ ରଖି ପାସ୍ କରିଛନ୍ତି ମାଟ୍ରିକ୍ । ଯାହା କି ଗାଁରେ ପ୍ରଥମ । କାରଣ ଆଜି ଯାଏଁ ମେଲଘରାର କୌଣସି ଝିଅ ମାଟ୍ରିକ୍ ପାସ୍ କରିନଥିଲେ । ତେଣୁ ଗର୍ବରେ ଆଜି ଦାନ କହୁଛନ୍ତି ଝିଅ ଜନ୍ମ କରି ବେଶ୍ ଖୁସି ।

ଚାନ୍ଦିନୀ ବି ଭାବପ୍ରବଣ ହୋଇଛନ୍ତି ପରୀକ୍ଷା ଫଳକୁ ନେଇ । କାରଣ ପାହାଡ଼ ଘେରା ଗାଁରେ ରହି ମାଟ୍ରିକ ପାସ୍ କରିବେ ବୋଲି ସେ ଆଶା କରିନଥିଲେ । ଏ ହେଉଛନ୍ତି ସେହି ଚାନ୍ଦିନୀ । ୨୦୧୬ରେ ଯିଏ ସରକାରୀ ବ୍ୟବସ୍ଥାର ଦେଖିଥିଲା ନଗ୍ନ ରୂପ । ବାପାଙ୍କ କାନ୍ଧରେ ଓହଳିଥିବା ମାର ଶବ କଡ଼େ କଡ଼େ ଏମିତି ବାଟ ଚାଲିଥିଲା ବାପା ସହ । ହାତରେ ଖଣ୍ଡେ ବ୍ୟାଗ୍ ଧରି ଲୁହ ଝରାଉଥିଲା ଅନବରତ, ବାଟ ଚାଲୁ ଚାଲୁ ଥକି ପଡ଼ିଲେ ବାପା ସହ ଥକ୍କା ମେଣ୍ଟାଉଥିଲା ରାସ୍ତା କଡ଼ରେ । ମୃତଦେହକୁ ନେବା ପାଇଁ ଆମ୍ବୁଲାନ୍ସ ନପାଇ ଭବାନୀପାଟଣାରୁ ମାର ଶବ କାନ୍ଧେଇ ଚାଲୁଥିବା ବାପା ସହ ୧୦ କିଲୋମିଟର ଦୂର ଯାଏଁ ଏମିତି ଚାଲିଥିଲା ଚାନ୍ଦିନୀ ।

ଯେଉଁ ଦୃଶ୍ୟ ଦୋହଲାଇ ଦେଇଥିଲା ସାରା ବିଶ୍ୱକୁ । ଚାଷବାସ କରି ପରିବାର ଚଳାଉଥିବା ଦାନ ମାଝୀ ଘଟଣାକ୍ରମରେ ତୃତୀୟ ବିବାହ କରିଛନ୍ତି । ପୂର୍ବରୁ ୩ଟି କନ୍ୟା ସନ୍ତାନ ଥିଲେ । ତୃତୀୟ ପତ୍ନୀଙ୍କଠାରୁ ଏବେ ପୁଣି ୨ଟି କନ୍ୟା ସନ୍ତାନ । ଏଣେ ଗାଁ ରାସ୍ତା ଯାହା ଥିଲା ସେଇୟା ଅଛି । ଖୁଣ୍ଟ ଅଛି କିନ୍ତୁ ୩ ବର୍ଷ ହେଲା ବିଜୁଳି ନାହିଁ । ତେଣୁ କେବେ ବଦଳିବ ମେଲଘରାର ଭାଗ୍ୟ, ଅନାଇ ରହିଛନ୍ତି ଗ୍ରାମବାସୀ ।