Odisha Weather Update: ଖରାରୁ ମିଳିବ ଆଶ୍ବସ୍ତି; ୧୯ରୁ ରାଜ୍ୟରେ ବର୍ଷା ସମ୍ଭାବନା

ଆସୁଛି ବର୍ଷା, ଖରାରୁ ମିଳିବ ଆଶ୍ବସ୍ତି । ଚଳିତ ମାସ ୧୯ ତାରିଖରୁ ରାଜ୍ୟରେ ତିନି ଦିନ ବର୍ଷା ହୋଇପାରେ । ଏନେଇ ପୂର୍ବାନୁମାନ କରିଛି ଭୁବନେଶ୍ବର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ଆସନ୍ତା ୨୧ ତାରିଖ ଭିତରେ ୯ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି ।

ଏହି ଜିଲ୍ଲାଗୁଡ଼ିକ ହେଲା ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ବର, ଯାଜପୁର, କଟକ, ଢେଙ୍କାନାଳ, କେନ୍ଦୁଝର, ମୟୂରଭଞ୍ଜ । ଏସବୁ ଜିଲ୍ଲାର କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି । ତେବେ ୧୯ ତାରିଖ ମଧ୍ୟରେ ଶୁଖିଲା ପାଗ ଅପରିବର୍ତ୍ତିତ ରହିବ ।

ଅପରପକ୍ଷରେ ଫେବ୍ରୁଆରୀରୁ ଟାଇଁ ଟାଇଁ ଖରା ଅନୁଭୂତ ହେଉଛି । ଫେବ୍ରୁଆରୀରୁ ଚେତାବନୀ ଦେଉଛି ତାତି । ଏମିତିକି ପାରଦ ୩୭ ଡିଗ୍ରୀ ପାର୍ କରିଛି । ଏହାକୁ ନେଇ ରାଜ୍ୟବାସୀଙ୍କ ମଧ୍ୟରେ ଭାଳେଣି ମଧ୍ୟ ପଡ଼ିଗଲାଣି । ଏବେଠୁ ଯଦି ଏତେ ଗରମ ତ ମେ ଜୁନ୍ ରେ ଅବସ୍ଥା କଣ ହେବ ତାକୁ ନେଇ ରାଜ୍ୟବାସୀ ଚିନ୍ତିତ ରହିଛନ୍ତି ।

ଝାରସୁଗୁଡାରେ ବୁଧବାର ପାରଦ ୩୭ ଛୁଇଁଥିବା ବେଳେ ଗତକାଲି ୩୫ ଡେଇଁଥିଲା ରାଜଧାନୀର ତାତି । ଝାରସୁଗୁଡାରେ ୯ , ୧୦ଟା ବେଳକୁ ଦାଉ ଦାଉ ଖରା ହେଉଛି । ୧୨ ଟା ବାଜୁ ବାଜୁ ମାଡି ଆସୁଛି ତାତି । ଗରମରେ ସିଝିଯାଉଛି ମୁହଁ । ତାତି ଏତେ ବଢିଛି ଯେ, ଦିନ ଗୋଟାଏରେ ରାସ୍ତା ଘାଟ ଶୂନଶାନ ।

୩୭ ଡିଗ୍ରୀ ତାତିରେ ଅସ୍ତବ୍ୟସ୍ତ ହୋଇପଡିଛି ଜନଜୀବନ । ଏହାରି ଭିତରେ ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ କରାଯାଇଥିବା ପୂର୍ବାନୁମାନ ରାଜ୍ୟବାସୀଙ୍କୁ ଆଶ୍ୱସ୍ତ କରିଛି ।

ଅଧିକ ପଢ଼ନ୍ତୁ: ବିଜେଡି ବିଧାୟକ ଅରୁଣ ସାହୁଙ୍କୁ ଅସ୍ମିତାର ଅର୍ଥ ବୁଝାଇଲେ ମନ୍ତ୍ରୀ ସୂର୍ଯ୍ୟବଂଶୀ ସୂରଜ