କାହିଁକି ହଳଦିଆ ଓ ସବୁଜ ରଙ୍ଗର ଜର୍ସି ପିନ୍ଧନ୍ତି ଅଷ୍ଟ୍ରେଲିଆ ଟିମ୍, ଜାଣନ୍ତୁ ଏହା ପଛର କାରଣ...

ଆରମ୍ଭ ହୋଇସାରିଛି କ୍ରିକେଟର ମହାକୁମ୍ଭ ’ ଦିନିକିଆ ବିଶ୍ୱକପ୍’ । ଏହା ସମସ୍ତ କ୍ରିକେଟ ଫ୍ୟାନ୍‌ଙ୍କ ପାଇଁ କୌଣସି ପର୍ବଠାରୁ କମ୍‌ ନୁହେଁ। ଚଳିତ ବିଶ୍ୱକପ୍‌ରେ ଆଜିଠାରୁ ଅଷ୍ଟ୍ରେଲିଆ ବିପକ୍ଷରେ ଅଭିଯାନ ଆରମ୍ଭ କରୁଛି ଭାରତ । ତେବେ ଆଜି ଆମେ ଆପଣଙ୍କୁ ମ୍ୟାଚ୍‌ ବିଷୟରେ ନୁହେଁ ବରଂ ଅଷ୍ଟ୍ରେଲିଆ ଦଳର ଜର୍ସି ବିଷୟରେ କହିବାକୁ ଯାଉଛୁ । କ୍ରିକେଟ ପଡ଼ିଆରେ ଆପଣ କୌଣସି ବି ଦଳର ଜର୍ସିକୁ ଦେଖି ଅନୁମାନ କରିପାରନ୍ତି କେଉଁ ଦେଶର ଖେଳାଳି ଖେଳୁଛନ୍ତି। ଆପଣ ଦେଖିଥିବେ ଅଷ୍ଟ୍ରେଲିଆ କ୍ରିକେଟ୍ ଟିମ୍ ପ୍ରାୟ ହଳିଦିଆ ଓ ସବୁଜ ରଙ୍ଗର ଜର୍ସିରେ ନଜର ଆସିଥାନ୍ତି। ତେବେ ଆପଣ ଜାଣିଛନ୍ତି କି ଅଷ୍ଟ୍ରେଲିଆର ଏହି ରଙ୍ଗର ଜର୍ସି ପଛର କାରଣ କ’ଣ ?

ଅଷ୍ଟ୍ରେଲିଆ ଜର୍ସି ପଛର କାରଣ ?

ଅଷ୍ଟ୍ରେଲିଆ ଜର୍ସି ପଛରେ ଥିବା ପୂରା କାହାଣୀ ଏହାର ଜାତୀୟ ଫୁଲ ସହ ଜଡ଼ିତ। ଅଷ୍ଟ୍ରେଲିଆର ଜାତୀୟ ଫୁଲ ହେଉଛି ’ଦି ଗୋଲ୍ଡେନ୍ ୱାଟଲ୍’। ’ଦି ଗୋଲ୍ଡେନ୍ ୱାଟଲ୍’ ଫୁଲର ପତ୍ର ସବୁଜ ରଙ୍ଗ ଓ ଏହାର ଫୁଲ ହଳଦିଆ ରଙ୍ଗର ହୋଇଥାଏ। ଏହି ଆଧାରରେ ଅଷ୍ଟ୍ରେଲିଆ ଦଳର ଜର୍ସି ହଳଦିଆ ଓ ସବୁଜ ରଙ୍ଗର ହୋଇଥାଏ।

କିନ୍ତୁ ୨୦୨୦ରେ ହୋଇଥିବା ଟି-୨୦ ସିରିଜ୍‌ରେ ଅଷ୍ଟ୍ରେଲିଆ ଦଳ ଭିନ୍ନ ରଙ୍ଗର ଜର୍ସି ପିନ୍ଧିଥିଲା। ଏହି ସିରିଜ୍‌ରେ ଅଷ୍ଟ୍ରେଲିଆ ଯେଉଁ ଜର୍ସି ପିନ୍ଧିଥିଲା ସେହି ଜର୍ସି ୧୮୬୮ ମସିହାରେ ଅଷ୍ଟ୍ରେଲିଆ ଦଳ ପିନ୍ଧିଥିଲା । ୧୮୬୮ ମସିହାରେ ଅଷ୍ଟ୍ରେଲିଆ କ୍ରିକେଟ ଟିମ୍ ପ୍ରଥମ ଥର ପାଇଁ ବିଦେଶ ଗସ୍ତ କରିଥିଲା। ତିନି ମାସ ସମୁଦ୍ର ଯାତ୍ରା କରି ଦଳ ଇଂଲଣ୍ଡରେ ପହଞ୍ଚିଥିଲା ଏବଂ ସେଠାରେ ୪୭ଟି ମ୍ୟାଚ୍ ଖେଳିଥିଲା। ସେ ସମୟରେ ଆଣ୍ଟି ଫିଆନ୍ କ୍ଲାର୍କ ଓ କୋର୍ଟନି ହେଗେନ୍ ଏହି ଜର୍ସିକୁ ଡିଜାଇନ୍ କରିଥିଲେ। ୧୫୨ ବର୍ଷ ପୂର୍ବର ନିଜ ଦଳକୁ ସମ୍ମାନ ଦେବା ପାଇଁ ଏହି ଜର୍ସି ପିନ୍ଧିଥିଲା ଅଷ୍ଟ୍ରେଲିଆ ।