୨୦୨୩-୨୪ ଆର୍ଥିକ ବର୍ଷରେ କେଉଁ ଖେଳାଳି ଦେଇଛନ୍ତି ସର୍ବାଧିକ ଆୟକର ? ଜାଣନ୍ତୁ...

କେଉଁ କ୍ରିକେଟ୍‌ ଖେଳାଳି ରୋଜଗାର କରନ୍ତି ସର୍ବାଧିକ ? କାହା ପାଖରେ ରହିଛି ସର୍ବାଧିକ ଟଙ୍କା ? କିଏ ସର୍ବାଧିକ ଟ୍ୟାକ୍ସ ପୈଠ କରନ୍ତି ? ଏକଥା ଯେତେବେଳେ ସାମ୍ନାକୁ ଆସେ ସେତେବେଳେ ସବୁ ଫ୍ୟାନ୍‌ଙ୍କ ମନରେ ଇଚ୍ଛା ଥାଏ ଜାଣିବାକୁ । କାରଣ ୧୯୮୩ ବିଶ୍ବକପ୍‌ ପରେ ଭାରତରେ କ୍ରିକେଟ୍‌କୁ ନେଇ ସବୁବେଳେ ଉତ୍ସାହ ଦେଖିବାକୁ ମିଳେ । ତେବେ ଏହାରି ଭିତରେ ୨୦୨୩-୨୪ ଆର୍ଥିକ ବର୍ଷରେ କ୍ରୀଡାବିତ୍‌ମାନେ ଦେଇଥିବା ଟ୍ୟାକ୍ସ ଉପରେ ଏକ ରିପୋର୍ଟ ପ୍ରକାଶ କରିଛି ଫର୍ଚୁନ ଇଣ୍ଡିଆ । ତେବେ ଆସନ୍ତୁ ଜାଣିବା କେଉଁ ଖେଳାଳି ଦେଇଛନ୍ତି ସର୍ବାଧିକ ଟ୍ୟାକ୍ସ ...

୨୦୨୩-୨୪ ଆର୍ଥିକ ବର୍ଷର ଫର୍ଚୁନ ଇଣ୍ଡିଆର ରିପୋର୍ଟ ଅନୁସାରେ, ବିରାଟ କୋହଲି ଆଗରେ ରହିଛନ୍ତି। ବିରାଟ କୋହଲି ଚଳିତ ଆର୍ଥିକ ବର୍ଷରେ ୬୬ କୋଟି ଟଙ୍କା ଟ୍ୟାକ୍ସ ଦେଇଛନ୍ତି। ସେହିପରି ତାଙ୍କ ପରେ ଦ୍ୱିତୀୟରେ ମହେନ୍ଦ୍ର ସିଂହ ଧୋନି ଓ ସଚିନ ତେନ୍ଦୁଲକର ଅଛନ୍ତି । ଉଭୟ ଯଥାକ୍ରମେ ୩୮ ଓ ୨୮ କୋଟି ଟଙ୍କା ଟ୍ୟାକ୍ସ ଦେଇଛନ୍ତି। 

ସେହିପରି ସୌରଭ ଗାଙ୍ଗୁଲି ୨୩ କୋଟି ଟଙ୍କା ଓ ହାର୍ଦ୍ଦିକ ପାଣ୍ଡ୍ୟା ୧୩ କୋଟି ଟ୍ୟାକ୍ସ ପୈଠ କରି କ୍ରୀଡାବିତଙ୍କ ମଧ୍ୟରେ ଟପ୍-୫ରେ ରହିଛନ୍ତି। 

ସେମିତି ଫର୍ଚୁନ ଇଣ୍ଡିଆର ରିପୋର୍ଟ ଅନୁସାରେ, କଳାକାରଙ୍କ ମଧ୍ୟରେ ଶାହରୁଖ ଖାନ ସର୍ବାଧିକ ୯୨ କୋଟି ଟଙ୍କାର ଟ୍ୟାକ୍ସ ଦେଇଥିବା ବେଳେ ଦ୍ୱିତୀୟରେ ରହିଛନ୍ତି ସାଉଥ୍ ଅଭିନେତା ଥାଲପଥି ବିଜୟ । ସେ ଚଳିତ ଆର୍ଥିକ ବର୍ଷରେ ୮୦ କୋଟି ଟଙ୍କା ଟ୍ୟାକ୍ସ ଭରିଛନ୍ତି। ସେହିପରି ତୃତୀୟ ସ୍ଥାନରେ ରହିଛନ୍ତି ସଲମାନ ଖାନ । ସେ ଚଳିତ ଆର୍ଥିକ ବର୍ଷରେ ୭୫ କୋଟି ଟଙ୍କା ଟ୍ୟାକ୍ସ ଦେଇଛନ୍ତି।