Demand for Bharat Ratna to Virat Kohli: ବିରାଟ କୋହଲିଙ୍କୁ ଭାରତ ରତ୍ନ ଦେବାକୁ ଦାବି କଲେ ଏହି ଷ୍ଟାର କ୍ରିକେଟର

ଭାରତୀୟ କ୍ରୀଡା ଇତିହାସରେ କେବଳ ଜଣେ ଖେଳାଳୀ ହିଁ ଦେଶର ସର୍ବୋଚ୍ଚ ବେସାମରିକ ସମ୍ମାନ ଭାରତ ରତ୍ନ ସମ୍ମାନରେ ସମ୍ମାନିତ ହୋଇଛନ୍ତି । ସେ ହେଉଛନ୍ତି ପୂର୍ବତନ ଷ୍ଟାର କ୍ରିକେଟର ସଚିନ ତେନ୍ଦୁଲକର । ୨୦୧୪ ମସିହାରେ ଭାରତର ତତ୍କାଳୀନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଦ୍ୱାରା ସେ ସମ୍ମାନିତ ହୋଇଥିଲେ । ତାଙ୍କ ପୂର୍ବରୁ କିମ୍ବା ତାଙ୍କ ପରେ କୌଣସି ଖେଳାଳୀ ଏହି ସର୍ବୋଚ୍ଚ ବେସାମରିକ ସମ୍ମାନରେ ସମ୍ମାନିତ ହୋଇ ନାହାନ୍ତି । 

ବର୍ତମାନ ଭାରତର ଆଉ ଜଣେ ପୂର୍ବତନ ଷ୍ଟାର କ୍ରିକେଟର ସୁରେଶ ରାଇନା ବିରାଟ କୋହଲିଙ୍କୁ ଭାରତ ରତ୍ନରେ ସମ୍ମାନିତ କରିବାକୁ ଦାବି କରିଛନ୍ତି । ଭାରତୀୟ କ୍ରିକେଟ ପ୍ରତି କୋହଲିଙ୍କ ଅବଦାନକୁ ଦୃଷ୍ଟିରେ ରଖି ତାଙ୍କୁ ଏହି ସମ୍ମାନ ମିଳିବା ଉଚିତ ବୋଲି ସେ କହିଛନ୍ତି । ‘‘ବିରାଟ କୋହଲି ଯେତେ ଉପଲବ୍ଧି ହାସଲ କରିଛନ୍ତି, ଭାରତ ଓ ଭାରତୀୟ କ୍ରିକେଟ ପାଇଁ ସେ ଯାହା ବି କରିଛନ୍ତି, ସେଥିପାଇଁ ତାଙ୍କୁ ଭାରତ ରତ୍ନ ମିଳିବା ଉଚିତ୍ । ଭାରତ ସରକାର ତାଙ୍କୁ ଭାରତ ରତ୍ନ ଦେବା ଆବଶ୍ୟକ । ’’ ଷ୍ଟାର ସ୍ପୋର୍ଟସ୍‌ର ଏକ ଶୋ'ରେ ଯୋଗ ଦେବା ଅବସରରେ ସେ ଏହା କହିଛନ୍ତି ।

ଅଧିକ ପଢ଼ନ୍ତୁ: ଖୁସି ଖବର; ଆଜିଠୁ ପୁଣି ଖେଳାଯିବ ସ୍ଥଗିତ IPL ମ୍ୟାଚ୍

ସୂଚନା ଯୋଗ୍ୟ, ବିରାଟ କୋହଲି ଗତ କିଛି ଦିନ ପୂର୍ବରୁ ଟେଷ୍ଟ କ୍ରିକେଟରୁ ଅବସର ଘୋଷଣା କରିଛନ୍ତି । କୋହଲି ୧୨୩ଟି ଟେଷ୍ଟ ମ୍ୟାଚ ଖେଳି ୯୨୩୦ ରନ୍ ସଂଗ୍ରହ କରିଥିବା ବେଳେ ସେଥିରେ ୩୦ଟି ଶତକ ହାସଲ କରିଛନ୍ତି । ଗତ ବର୍ଷ ଟି-୨୦ ଅନ୍ତର୍ଜାତୀୟକୁ ଅଲବିଦା କହିଥିବା ବେଳେ ଏବେ କେବଳ ଦିନିକିଆ ହିଁ ଖେଳିବେ । ଟେଷ୍ଟ କ୍ରିକେଟରୁ ଅବସର ଘୋଷଣା କରି ସୋସିଆଲ ମିଡିଆ ସାଇଟ ଇନଷ୍ଟାଗ୍ରାମରେ ଏକ ପୋଷ୍ଟରେ ଲେଖିଥିଲେ ଯେ, ‘‘ମୁଁ ଏବେ ଏହି ଫର୍ମାଟରୁ ଅବସର ନେବାକୁ ଯାଉଛି । ଏହା ସହଜ ନୁହେଁ । କିନ୍ତୁ ମୁଁ ଠିକ୍ ଭାବୁଛି । ମୁଁ ମୋର ସର୍ବୋତ୍ତମ ଦେଇଛି ଏବଂ ଏହା ମୋତେ ଅଧିକ ଦେଇଛି । କୃତଜ୍ଞତା ଭରା ହୃଦୟରେ ବିଦାୟ ନେଉଛି ।’’

କୋହଲିଙ୍କ ବ୍ୟତୀତ ଗତ ଡିସେମ୍ବର ୨୦୨୪ରେ ରବିଚନ୍ଦ୍ରନ ଅଶ୍ୱିନୀ ଓ ଗତ ସପ୍ତାହରେ ରୋହିତ ଶର୍ମା ଟେଷ୍ଟ କ୍ରିକେଟରୁ ବିଦାୟ ନେଇଥିଲେ ।

ଅଧିକ ପଢ଼ନ୍ତୁ: ନୀରଜ ଚୋପ୍ରାଙ୍କ ନୂଆ ରେକର୍ଡ; ଜାଭେଲିନ୍ ଥ୍ରୋରେ ୯୦ ମିଟର ପାର କଲେ