Sports: ପ୍ରତିଭାଶାଳୀ ଓପନର୍ ପୃଥ୍ୱୀ ଶ’ଙ୍କ କ୍ୟାରିଅର୍‌ର ପୁନରୁତ୍ଥାନ ସମ୍ଭବ କି ?

ଏକଦା ତାଙ୍କୁ କିମ୍ବଦନ୍ତୀ କ୍ରିକେଟର୍ ସଚିନ ତେନ୍ଦୁଲକରଙ୍କ ଉତ୍ତରାଧିକାରୀ ଦୃଷ୍ଟିରୁ ବିଚାର କରାଯାଉଥିଲା । କିନ୍ତୁ ଆଜି ତାଙ୍କ କ୍ୟାରିଅର୍ ପ୍ରଶ୍ନଘେରକୁ ଚାଲିଆସିଛି । ଏବେ ତାଙ୍କ ବ୍ୟାଟିଂ ପ୍ରଦର୍ଶନକୁ ନେଇ ନୁହେଁ, ବିଫଳତାକୁ ନେଇ ଚର୍ଚ୍ଚା ହେଉଛି ।

ମୁମ୍ବାଇର ସେହି ପ୍ରତିଭାଶାଳୀ ଯୁବ ଓପନର୍ ପୃଥ୍ୱୀ ଶ’ଙ୍କ କ୍ୟାରିଅର୍ ଏବେ ଦୁର୍ଦ୍ଦିନ ଦେଇ ଗତି କରୁଛି । ନିକଟରେ ଇଣ୍ଡିଆନ୍ ପ୍ରିମିଅର୍ ଲିଗ୍ (ଆଇପିଏଲ୍‌) ପାଇଁ ହୋଇଥିବା ମେଗା ନିଲାମରେ ତାଙ୍କୁ କୌଣସି ଫ୍ରାଞ୍ଚାଇଜ୍ କିଣି ନ ଥିଲେ । ଏହାପରେ ଏହି ୨୫ବର୍ଷୀୟ କ୍ରିକେଟର୍‌ଙ୍କ ଭବିଷ୍ୟତକୁ ନେଇ ଆଲୋଚନା ହୋଇଥିଲା ।

ପୃଥ୍ୱୀଙ୍କ ପ୍ରତିଭାର ଚମକ ଆଉ ଦେଖିବାକୁ ମିଳୁ ନାହିଁ । ତାଙ୍କ ପ୍ରଦର୍ଶନରେ ନିରନ୍ତରତା ନାହିଁ । ଭଲ ଫିଟ୍‌ନେସ୍ ନାହିଁ । ସେ ବିଭିନ୍ନ ସମୟରେ ବିବାଦରେ ବି ଛନ୍ଦି ହେଉଛନ୍ତି ।

ତେବେ କେତେକ ଲୋକ ଭାବୁଛନ୍ତି ଯେ ସେ ଦମ୍‌ଦାର ଢଙ୍ଗରେ ପ୍ରତ୍ୟାବର୍ତ୍ତନ କରିବେ । କିନ୍ତୁ ଏବେ ସେମିତି କିଛି ହେବା ଭଳି ଜଣାପଡ଼ୁ ନାହିଁ ।

ସୟଦ ମୁସ୍ତାକ୍ ଅଲୀ ଟ୍ରଫିରେ ପ୍ରଭାବଶୂନ୍ୟ ପ୍ରଦର୍ଶନ

ଚଳିତ ରଣଜୀ ସିଜନ୍‌ରେ ବିଶେଷକରି ଫିଟ୍‌ନେସ୍‌ଜନିତ କାରଣରୁ ପୃଥ୍ୱୀଙ୍କୁ ମୁମ୍ବାଇ ଟିମ୍‌ରୁ କାଢ଼ି ଦିଆଯାଇଥିଲା । ଅବଶ୍ୟ ଏହାପରେ ନିଜ ଫିଟ୍‌ନେସ୍ ସ୍ତରରେ ସୁଧାର ଆଣିବା ପାଇଁ ସେ ପ୍ରୟାସ କରିଥିଲେ ।

ଇତ୍ୟବସରେ ତାଙ୍କୁ ସୟଦ ମୁସ୍ତାକ୍ ଅଲ୍ଲୀ ଟ୍ରଫି ୨୦୨୪-୨୫ ପାଇଁ ମୁମ୍ବାଇ ଟିମ୍‌ରେ ସାମିଲ୍ କରାଯାଇଥିଲା । କିନ୍ତୁ ପ୍ରଭାବଶୂନ୍ୟ ପ୍ରଦର୍ଶନ ଯୋଗୁଁ ତାଙ୍କ ସମସ୍ୟା ଆହୁରି ବଢ଼ିଯାଇଛି ।

ସୟଦ ମୁସ୍ତାକ୍ ଅଲୀ ଟ୍ରଫିର ଗ୍ରୁପ୍ ପର୍ଯ୍ୟାୟରେ ମୁମ୍ବାଇର ଛଅରୁ ଦୁଇ ମ୍ୟାଚ୍‌ରେ ସେ ଖାତା ବି ଖୋଲିପାରି ନ ଥିଲେ । ଅନ୍ୟ ଚାରି ମ୍ୟାଚ୍ ମଧ୍ୟରୁ ସେ ଗୋଆ ବିପକ୍ଷରେ ୩୩, କେରଳ ବିପକ୍ଷରେ ୨୩, ନାଗାଲାଣ୍ଡ ବିପକ୍ଷରେ ୪୦ ଓ ଆନ୍ଧ୍ର ପ୍ରଦେଶ ବିପକ୍ଷରେ ୩୪ ରନ୍ ସଂଗ୍ରହ କରିଥିଲେ ।

ପୃଥ୍ୱୀଙ୍କ ପ୍ରତିଭାର ଚମକ ଆଉ ଦେଖିବାକୁ ମିଳୁ ନାହିଁ

ରଣଜୀ, ଦଲୀପ ଟ୍ରଫି ଓ ଟେଷ୍ଟ ପଦାର୍ପଣରେ ଶତକ

ପୃଥ୍ୱୀଙ୍କ ପରିବାର ବିହାରର ଗୟାରୁ ଆସି ମୁମ୍ବାଇରେ ଅବସ୍ଥାପିତ ହୋଇଥିଲା । ପୃଥ୍ୱୀ ସ୍କୁଲ୍ କ୍ରିକେଟ୍‌ରୁ ହିଁ ନିଜ ପରିଚୟ ସୃଷ୍ଟି କରିପାରିଥିଲେ । ୨୦୧୩ରେ ହାରିସ୍ ସିଲ୍ଡ ଟୁର୍ଣ୍ଣାମେଣ୍ଟରେ ସେ ୧୪ ବର୍ଷ ବୟସରେ ୫୪୬ ରନ୍ କରି ବିଶ୍ୱ ରେକର୍ଡ ସ୍ଥାପନ କରିଥିଲେ ।

୨୦୧୭ରେ ୧୭ ବର୍ଷ ବୟସରେ ପୃଥ୍ୱୀ ମୁମ୍ବାଇ ପକ୍ଷରୁ ରଣଜୀ ଟ୍ରଫିରେ ପାଦ ଥାପିଥିଲେ । ମ୍ୟାଚ୍‌ର ଦ୍ୱିତୀୟ ଇନିଂସ୍‌ରେ ସେ ଶତକ ହାସଲ କରିଥିଲେ ଏବଂ ‘ମ୍ୟାନ୍ ଅଫ୍ ଦ ମ୍ୟାଚ୍‌’ ବି ବିବେଚିତ ହୋଇଥିଲେ ।

ପୃଥ୍ୱୀ ଦଲୀପ ଟ୍ରଫିରେ ମଧ୍ୟ ନିଜ ପ୍ରଥମ ମ୍ୟାଚ୍‌ରେ ଶତକୀୟ ଇନିଂସ୍ ଖେଳିଥିଲେ । ଉଭୟ ରଣଜୀ ଓ ଦଲୀପ ଟ୍ରଫିର ପଦାର୍ପଣ ମ୍ୟାଚ୍‌ରେ ଶତକ ଲଗାଇ ସେ ସଚିନଙ୍କ ସମକକ୍ଷ ହୋଇପାରିଥିଲେ । ଏହାଛଡ଼ା ତାଙ୍କ ଅଧିନାୟକତ୍ୱରେ ଭାରତର ୧୯ ବର୍ଷରୁ କମ୍ ଟିମ୍ ୨୦୧୮ରେ ବିଶ୍ୱ ଚାମ୍ପିଅନ୍ ହୋଇଥିଲା ।

୨୦୧୮ରେ ରାଜକୋଟ ଠାରେ ପୃଥ୍ୱୀ ୱେଷ୍ଟଇଣ୍ଡିଜ୍ ବିପକ୍ଷରେ ଟେଷ୍ଟ ପଦାର୍ପଣ କରିଥିଲେ । ସେତେବେଳକୁ ତାଙ୍କୁ ମାତ୍ର ୧୮ ବର୍ଷ ବୟସ ହୋଇଥିଲା । ଏହା ସହିତ ସେ ପ୍ରଥମ ଟେଷ୍ଟରେ ହିଁ ଶତକ ହାସଲ କରିଥିଲେ । ସେହି ବର୍ଷ ଆନ୍ତର୍ଜାତିକ କ୍ରିକେଟ୍ ପରିଷଦ ତାଙ୍କୁ ପାଞ୍ଚ ଉଦୀୟମାନ ଖେଳାଳିଙ୍କ ମଧ୍ୟରେ ସାମିଲ୍ କରିଥିଲା ।

କାରିବୀୟ ଟିମ୍ ବିପକ୍ଷ ସେହି ଟେଷ୍ଟ ସିରିଜ୍‌ରେ ସେ ଦୁଇ ମ୍ୟାଚ୍‌ରେ ୨୩୭ ରନ୍ ସଂଗ୍ରହ କରିଥିଲେ । ଏହାପରେ ସେ ୨୦୨୦ ଫେବ୍ରୁଆରୀରେ ଟିମ୍ ପକ୍ଷରୁ ଖେଳିଥିଲେ । ବର୍ଡର-ଗାଭାସ୍କର ଟ୍ରଫି ୨୦୧୮-୧୯ର ପ୍ରଥମ ମ୍ୟାଚ୍ ପୂର୍ବରୁ ଅଭ୍ୟାସ ସମୟରେ ସେ ଆଘାତପ୍ରାପ୍ତ ହେବାରୁ ପୂରା ସିରିଜ୍‌ରୁ ବାଦ୍ ପଡ଼ିଥିଲେ ।

୨୦୨୧ ଜୁଲାଇ ପରଠାରୁ ଖେଳି ନାହାନ୍ତି ଆନ୍ତର୍ଜାତିକ ମ୍ୟାଚ୍

ଗୋଟିଏ ବର୍ଷ ମଧ୍ୟରେ ପୃଥ୍ୱୀ ସଫଳତାର ଶିଖରରୁ ତଳକୁ ଖସିଆସିଥିଲେ । ୨୦୧୯ରେ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ ଡୋପିଂ ଓ ବିଶୃଙ୍ଖଳା ଅଭିଯୋଗରେ ତାଙ୍କୁ ଆଠ ମାସ ପାଇଁ କ୍ରିକେଟ୍‌ରୁ ବାସନ୍ଦ କରିଥିଲା ।

ସୟଦ ମୁସ୍ତାକ୍ ଅଲୀ ଟ୍ରଫି ସମୟରେ ତାଙ୍କ ନମୁନାରୁ ନିଷିଦ୍ଧ ପଦାର୍ଥ ମିଳିଥିଲା । ପରେ ପୃଥ୍ୱୀ କହିଥିଲେ ଯେ କଫ ସିରପ୍ ସେବନ ଯୋଗୁଁ ନିଷିଦ୍ଧ ପଦାର୍ଥ ତାଙ୍କ ଶରୀରରେ ପ୍ରବେଶ କରିଥିଲା ।

୨୦୧୮ରେ ରାଜକୋଟ ଠାରେ ପୃଥ୍ୱୀ ୱେଷ୍ଟଇଣ୍ଡିଜ୍ ବିପକ୍ଷରେ ଟେଷ୍ଟ ପଦାର୍ପଣ କରିଥିଲେ

୨୦୨୦ରେ ନ୍ୟୁଜିଲାଣ୍ଡ ଗସ୍ତ ସମୟରେ ଟେଷ୍ଟ ସିରିଜ୍‌ରେ ଭାରତୀୟ ବ୍ୟାଟର୍‌ଙ୍କ ପ୍ରଦର୍ଶନ ନୈରାଶ୍ୟଜନକ ଥିଲା । ପୃଥ୍ୱୀ ଦୁଇ ମ୍ୟାଚ୍‌ରେ ୯୮ ରନ୍ କରିଥିଲେ । ସେହି ବର୍ଷ ଆଇପିଏଲ୍‌ରେ ମଧ୍ୟ ସେ ବିଫଳ ହୋଇଥିଲେ ।

୨୦୨୦-୨୧ ଅଷ୍ଟ୍ରେଲିଆ ଗସ୍ତ ସମୟରେ ମଧ୍ୟ ସେ ନିରାଶ କରିଥିଲେ । ଆଡିଲେଡ୍‌ରେ ଖେଳାଯାଇଥିବା ପ୍ରଥମ ଟେଷ୍ଟରେ ତାଙ୍କ ସ୍କୋର୍ ଥିଲା ୦ ଓ ୪ ରନ୍ ।

ତାଙ୍କ ବ୍ୟାଟିଂ କୌଶଳ ଉପରେ ବି ପ୍ରଶ୍ନ ଉଠିଥିଲା ଏବଂ ତାଙ୍କୁ ଚୂଡ଼ାନ୍ତ ଏକାଦଶରୁ କାଢ଼ି ଦିଆଯାଇଥିଲା । ଏହା ପରଠାରୁ ଚାରି ବର୍ଷ ହୋଇଗଲାଣି, ସେ ଆଉ ଟେଷ୍ଟ ମ୍ୟାଚ୍ ଖେଳି ନାହାନ୍ତି ।

ପୃଥ୍ୱୀ ନିଜ ଆନ୍ତର୍ଜାତିକ କ୍ୟାରିଅର୍‌ର ଶେଷ ଦିନିକିଆ ଓ ଏକମାତ୍ର ଟି-୨୦ ମ୍ୟାଚ୍ ତିନି ବର୍ଷ ପୂର୍ବେ ୨୦୨୧ ଜୁଲାଇରେ ଖେଳିଥିଲେ ।

ପିଛା ଛାଡ଼ୁନି ବିବାଦ ଓ ବିଫଳତା

୨୦୨୧ରେ ପୃଥ୍ୱୀ ଗୋଆକୁ ଛୁଟି କଟାଇବାକୁ ଯାଇଥିଲେ । ସେଠାରେ ଲକ୍‌ଡାଉନ୍ ଉଲ୍ଲଂଘନ ଅଭିଯୋଗରେ ପୋଲିସ୍ ତାଙ୍କୁ ଅଟକ ରଖି ପଚରାଉଚରା କରିଥିଲା ।

ଆଇପିଏଲ୍ ୨୦୨୨ ପୂର୍ବରୁ ବେଙ୍ଗାଲୁରୁସ୍ଥିତ ଜାତୀୟ କ୍ରିକେଟ୍ ଏକାଡେମୀରେ ହୋଇଥିବା ୟୋ-ୟୋ ଟେଷ୍ଟରେ ସେ ବିଫଳ ହୋଇଥିଲେ । ଏହାଛଡ଼ା ଗତ ବର୍ଷର ପ୍ରାରମ୍ଭରେ ଏକ ପବ୍‌ରେ ସପ୍ନା ଗିଲ୍ ନାମକ ଜଣେ ସୋସିଆଲ୍ ମିଡିଆ ଇନ୍‌ଫ୍ଲୁଏନ୍‌ସର୍‌ଙ୍କ ସହ ତାଙ୍କର ଝଗଡ଼ା ହୋଇଥିଲା ।

ଚଳିତ ରଣଜୀ ସିଜନ୍ ସମୟରେ ମୁମ୍ବାଇ ଟିମ୍‌ରୁ ତାଙ୍କୁ କଢ଼ାଯିବା ପଛର କାରଣ ଫିଟ୍‌ନେସ୍ ଓ ବିଶୃଙ୍ଖଳା ବୋଲି ଚର୍ଚ୍ଚା ହୋଇଥିଲା । ଏହାଛଡ଼ା ସେ ଭଲ ପ୍ରଦର୍ଶନ ମଧ୍ୟ କରିପାରିି ନ ଥିଲେ ।

ଛଅ ବର୍ଷ ପୂର୍ବେ ଆନ୍ତର୍ଜାତିକ କ୍ରିକେଟ୍‌ରେ ପଦାର୍ପଣ କରିଥିବା ପୃଥ୍ୱୀ ଏ ଯାବତ ମାତ୍ର ୫ ଟେଷ୍ଟ, ୬ ଦିନିକିଆ ଓ ଗୋଟିଏ ଟି-୨୦ ଆନ୍ତର୍ଜାତିକ ମ୍ୟାଚ୍ ଖେଳିଛନ୍ତି । ଆଇପିଏଲ୍‌ରେ ମଧ୍ୟ ତାଙ୍କ ପ୍ରଦର୍ଶନ ସେତେ ପ୍ରଭାବଶାଳୀ ନୁହେଁ । ସେ ଏହି ଲିଗ୍‌ରେ ୭୯ ମ୍ୟାଚ୍ ଖେଳି ୧୮୯୨ ରନ୍ ସଂଗ୍ରହ କରିଛନ୍ତି ।

ଘରୋଇ କ୍ରିକେଟ୍‌ରେ ଚମକପ୍ରଦ ପ୍ରଦର୍ଶନ କରିବା ସ୍ଥଳେ ଆନ୍ତର୍ଜାତିକ ଟିମ୍‌କୁ ପୃଥ୍ୱୀଙ୍କ ପ୍ରତ୍ୟାବର୍ତ୍ତନ ସମ୍ଭାବନା ବଢ଼ିବ । ଏହା ସହିତ ଭଲ ଫିଟ୍‌ନେସ୍ ବି ଦରକାର । ଅନ୍ୟଥା ତାଙ୍କ କ୍ୟାରିଅର୍‌ର ପୁନରୁତ୍‌ଥାନ କେମିତି ସମ୍ଭବ ହେବ?

ଇମେଲ୍: biswasports@gmail.com

(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)