LIVE TV
ନିକଟରେ ଶେଷ ହୋଇଥିବା ବର୍ଷର ପ୍ରଥମ ଗ୍ରାଣ୍ଡ୍ସ୍ଲ୍ାମ୍ ‘ଅଷ୍ଟ୍ରେଲିଆନ୍ ଓପନ୍’ରେ ଭାରତୀୟ ଖେଳାଳିମାନଙ୍କ ପ୍ରଦର୍ଶନ ନୈରାଶ୍ୟଜନକ ଥିଲା । ଏକକ (ପୁରୁଷ ଓ ମହିଳା) ବର୍ଗରେ ଦେଶର ଏକମାତ୍ର ଆଶା ସୁମିତ ନାଗଲ୍ ପ୍ରଥମ ରାଉଣ୍ଡରୁ ହିଁ ବିଦାୟ ନେଇଥିଲେ ।
ପୁରୁଷ ଯୁଗଳରେ ରୋହନ ବୋପନ୍ନା, ୟୁକି ଭାମ୍ବରୀ. ଏନ୍. ଶ୍ରୀରାମ ବାଲାଜୀ ଓ ରିତ୍ତ୍ୱିକ ଚୌଧରୀ ବୋଲିପଲ୍ଲୀ ବି ନିରାଶ କରିଥିଲେ । ମିଶ୍ରିତ ଯୁଗଳରେ ବୋପନ୍ନା ଓ ତାଙ୍କ ଚୀନା ଯୋଡ଼ିଦାର ଝାଙ୍ଗ୍ ଶୁଆଇ କ୍ୱାର୍ଟର୍-ଫାଇନାଲ୍ରେ ହାରିଯାଇଥିଲେ ।
Also Read
ଗ୍ରାଣ୍ଡ୍ସ୍ଲାମ୍ରେ କେବେ ମିଳିନି ଏକକ ମୁକୁଟ
ଆଜି ଯାଏଁ ଭାରତର କୌଣସି ଖେଳାଳି ଗ୍ରାଣ୍ଡ୍ସ୍ଲାମ୍ ଟୁର୍ଣ୍ଣାମେଣ୍ଟରେ ଏକକ ମୁକୁଟ ଜିତିପାରି ନାହାନ୍ତି । ତେବେ ଭାରତୀୟ ଖେଳାଳି ସେମି-ଫାଇନାଲ୍ ଓ କ୍ୱାର୍ଟର୍-ଫାଇନାଲ୍ ପର୍ଯ୍ୟନ୍ତ ଯାଇଛନ୍ତି । ୱିମ୍ବଲଡନ୍ରେ ରାମନାଥନ କ୍ରିଷ୍ଣନ କ୍ରମାଗତ ଦୁଇ ଥର (୧୯୬୦ ଓ ୧୯୬୧) ପୁରୁଷ ଏକକର ସେମିଫାଇନାଲ୍ରେ ସ୍ଥାନ ପାଇଥିଲେ । ୧୯୬୧ରେ ସେ କ୍ୱାର୍ଟର୍-ଫାଇନାଲ୍ରେ ୧୨ ଥର ଗ୍ରାଣ୍ଡ୍ସ୍ଲାମ୍ ବିଜେତା ରୟ ଏମର୍ସନ୍ଙ୍କୁ ମାତ୍ ଦେଇଥିଲେ ।
ବିଜୟ ଅମ୍ରିତରାଜ ଗ୍ରାଣ୍ଡ୍ସ୍ଲାମ୍ରେ ଚାରି ଥର ଏକକ କ୍ୱାର୍ଟର୍-ଫାଇନାଲ୍ରେ ପ୍ରବେଶ କରିଥିଲେ । ସେ ୧୯୭୩ ଓ ୧୯୮୧ରେ ୱିମ୍ବଲ୍ଡନ୍ ଏବଂ ୧୯୭୩ ଓ ୧୯୭୪ରେ ୟୁଏସ୍ ଓପନ୍ ଅନ୍ତିମ-୮ରେ ସ୍ଥାନ ପାଇଥିଲେ ।
ଏହାଛଡ଼ା ରାମନାଥନ କ୍ରିଷ୍ଣନଙ୍କ ପୁଅ ରମେଶ କ୍ରିଷ୍ଣନ ଥରେ (୧୯୮୬) ୱିମ୍ବଲ୍ଡନ୍ ଓ ଦୁଇ ଥର (୧୯୮୧ ଓ ୧୯୮୭) ୟୁଏସ୍ ଓପନ୍ରେ କ୍ୱାର୍ଟର୍-ଫାଇନାଲ୍ରେ ପହଞ୍ଚିଥିଲେ ।
କିନ୍ତୁ ୧୯୮୭ ପରଠାରୁ ଆଉ କୌଣସି ଭାରତୀୟ ଖେଳାଳି ଗ୍ରାଣ୍ଡ୍ସ୍ଲାମ୍ର ଏକକ ବର୍ଗରେ ନକ୍ଆଉଟ୍ ପର୍ଯ୍ୟନ୍ତ ଯାଇପାରି ନାହାନ୍ତି । ଯୁବ ଖେଳାଳି ନାଗଲ୍ଙ୍କ ଉପରେ ସମସ୍ତଙ୍କର ଆଶା ଅଛି । ସେ ଅଷ୍ଟ୍ରେଲିଆନ୍ ଓପନ୍ ୨୦୨୫ରେ ସିଧାସଳଖ ପୁରୁଷ ଏକକ ମୁଖ୍ୟ ଡ୍ର’ରେ ସ୍ଥାନ ପାଇଥିଲେ ।
ନାଗଲ୍ ଏବେ ଏଟିପି ଏକକ ମାନ୍ୟତାରେ ଶୀର୍ଷ ଭାରତୀୟ ଭାବେ ୧୦୬ତମ ସ୍ଥାନରେ ରହିଛନ୍ତି । ତାଙ୍କୁ ଛାଡ଼ିଦେଲେ ଟପ୍-୩୦୦ରେ ଜଣେ ବି ଭାରତୀୟ ନାହାନ୍ତି । ମୁକୁନ୍ଦ ଶଶିକୁମାର ୩୬୫ତମ, ରାମକୁମାର ରାମନାଥନ ୪୦୬ତମ ଓ କରଣ ସିଂହ ୪୯୬ତମ ସ୍ଥାନରେ ଅଛନ୍ତି ।
ଯୁଗଳରେ କିଏ ହେବେ ପରବର୍ତ୍ତୀ ସୁପର୍ଷ୍ଟାର୍
ଗ୍ରାଣ୍ଡ୍ସ୍ଲାମ୍ର ଏକକ ବର୍ଗରେ ଭାରତୀୟ ଖେଳାଳି ମୁକୁଟ ଜିତିପାରି ନାହାନ୍ତି, ହେଲେ ଯୁଗଳ ବର୍ଗରେ ଅନେକ ସଫଳତା ମିଳିଛି । ପୁରୁଷ ଯୁଗଳ, ମିଶ୍ରିତ ଯୁଗଳ ଓ ମହିଳା ଯୁଗଳରେ କିଛି ବର୍ଷ ପୂର୍ବ ଯାଏଁ ଭାରତୀୟ ଖେଳାଳି ଗ୍ରାଣ୍ଡ୍ସ୍ଲାମ୍ ଚାମ୍ପିଅନ୍ ହୋଇଆସୁଥିଲେ । କିନ୍ତୁ ଏବେ ଯୁଗଳରେ ବି ସ୍ଥିତି ଗମ୍ଭୀର ହେଲାଣି ।
ଶେଷ ଥର ୨୦୨୪ରେ ବୋପନ୍ନା ତାଙ୍କ ଅଷ୍ଟ୍ରେଲୀୟ ଯୋଡ଼ିଦାର ମାଥ୍ୟୁ ଏବଡେନ୍ଙ୍କ ସହ ଅଷ୍ଟ୍ରେଲିଆନ୍ ଓପନ୍ ପୁରୁଷ ଯୁଗଳ ମୁକୁଟ ଜିତିଥିଲେ । ଭାରତୀୟ ଖେଳାଳି ୧୯୯୭ରୁ ୨୦୨୪ ମଧ୍ୟରେ ମୋଟ୍ ୩୧ ଗ୍ରାଣ୍ଡ୍ସ୍ଲାମ୍ ମୁକୁଟ ଜିତିଛନ୍ତି । ଏଥିରେ ୧୮ ମିଶ୍ରିତ ଯୁଗଳ, ୧୦ ପୁରୁଷ ଯୁଗଳ ଓ ତିନି ମହିଳା ଯୁଗଳ ମୁକୁଟ ରହିଛି ।
ଏହି ସମସ୍ତ ମୁକୁଟ କେବଳ ଚାରି ଖେଳାଳି - ଲିଆଣ୍ଡର ପେସ୍, ମହେଶ ଭୂପତି, ରୋହନ ବୋପନ୍ନା ଓ ସାନିଆ ମିର୍ଜା ହାସଲ କରିଛନ୍ତି । ସେମାନେ କେତେବେଳେ ନିଜ ନିଜ ମଧ୍ୟରେ ଯୋଡ଼ି କରି ତ କେତେବେଳେ ବିଦେଶ ଖେଳାଳିଙ୍କ ସହ ମିଶି ମୁକୁଟ ଜିତିଛନ୍ତି ।
ସେମାନଙ୍କ ମଧ୍ୟରୁ ଏବେ କେବଳ ବୋପନ୍ନା ସକ୍ରିୟ ଅଛନ୍ତି । ସେ ତାଙ୍କ କ୍ୟାରିଅର୍ର ଅନ୍ତିମ ସୋପାନରେ ପହଞ୍ଚିଲେଣି ଅଥଚ କୋର୍ଟରେ ସଂଘର୍ଷ ଜାରି ରଖିଛନ୍ତି । ଏକଦା ସେ ଯୁଗଳ ମାନ୍ୟତାର ଶୀର୍ଷରେ ପହଞ୍ଚିଥିଲେ । ତେବେ ତାଙ୍କ ପରେ କିଏ ହେବେ ଭାରତର ସୁପର୍ଷ୍ଟାର୍?
ଏବେ ଯୁଗଳ ମାନ୍ୟତାରେ ୪୪ବର୍ଷୀୟ ବୋପନ୍ନା ୨୧ତମ ସ୍ଥାନରେ ରହିଛନ୍ତି । ଏହାପରେ ଭାମ୍ବରୀଙ୍କ ସ୍ଥାନ, ଯିଏକି ୪୭ତମ ସ୍ଥାନରେ ଅଛନ୍ତି । ଅନ୍ୟ ଭାରତୀୟଙ୍କ ମଧ୍ୟରେ ବାଲାଜୀ ୬୪ତମ, ରିତ୍ତ୍ୱିକ ୭୯ତମ ଓ ଅର୍ଜୁନ କାଧେ ୮୩ତମ ସ୍ଥାନରେ ରହିଛନ୍ତି ।
ମହିଳା ବର୍ଗରେ ସାନିଆଙ୍କ ପରେ ଶୂନ୍ୟତା
ସାନିଆ ମିର୍ଜା ଟେନିସ୍ ଜଗତରେ ନିଜ ପରିଚୟ ସୃଷ୍ଟି କରିପାରିଥିଲେ । ଦେଶର ନୂଆ ପିଢ଼ିର ମହିଳା ଖେଳାଳିଙ୍କ ପାଇଁ ସେ ଆଦର୍ଶ । ସେ ଯୁଗଳ ବର୍ଗରେ ବିଶ୍ୱର ଏକ ନମ୍ବର ଖେଳାଳି ଥିଲେ । ତାଙ୍କୁ ଛଅ ମେଜର୍ ମୁକୁଟ ମିଳିଛି । ତେବେ ସେ ଅବସର ନେବା ପରେ ଭାରତୀୟ ମହିଳା ଟେନିସ୍ରେ ଏକପ୍ରକାର ଶୂନ୍ୟତା ଦେଖାଦେଇଛି ।
୩୨ବର୍ଷୀୟା ଅଙ୍କିତା ରାଇନାଙ୍କ ଉପରେ ସମସ୍ତଙ୍କ ଆଶା ଥିଲା, ହେଲେ ସେ ଆଶାନୁରୂପ ପ୍ରଦର୍ଶନ କରିପାରି ନାହାନ୍ତି । ମହିଳା ଏକକ ମାନ୍ୟତାରେ ସହଜା ୟମଲାପଲ୍ଲୀ ଭାରତର ଶୀର୍ଷ ଖେଳାଳି ଭାବେ ୨୯୪ତମ ସ୍ଥାନରେ ରହିଛନ୍ତି । ଏହାଛଡ଼ା ଅଙ୍କିତା (୨୯୫ତମ), ଶ୍ରୀବଲ୍ଲୀ ରଶ୍ମିକା ଭାମିଦିପତୀ (୩୩୨ତମ), ବୈଦେହୀ ଚୌଧରୀ (୩୯୮ତମ) ଟପ୍-୫୦୦ ମଧ୍ୟରେ ଅଛନ୍ତି ।
ଟେନିସ୍ ଏକ ବ୍ୟୟବହୁଳ ଖେଳ
ଭାରତରେ ଟେନିସ୍ର ଦୁର୍ଦ୍ଦଶା ପଛର ବଡ଼ କାରଣ ହେଉଛି ଯେ ଏହା ଏକ ବ୍ୟୟବହୁଳ ଖେଳ । ଏହାର ଖର୍ଚ୍ଚ ଉଠାଇବା ସବୁ ଖେଳାଳିଙ୍କ ପକ୍ଷରେ ସମ୍ଭବ ହୋଇ ନ ଥାଏ ।
ଉତ୍ତର-ପୂର୍ବାଞ୍ଚଳ, ଉତ୍ତର ପ୍ରଦେଶ, ବିହାର ଓ ପଞ୍ଜାବ ଭଳି ରାଜ୍ୟରେ ଟେନିସ୍ର ସେତେ ଚାହିଦା ନାହିଁ । ଓଡ଼ିଶାକୁ ବି ଏଥିରେ ଅନ୍ତର୍ଭୁକ୍ତ କରାଯାଇପାରେ ।
ଘର ପାଖ ଗଳିରେ ଆପଣ ବ୍ୟାଡ୍ମିଣ୍ଟନ ଖେଳିପାରିବେ, କିନ୍ତୁ ଟେନିସ୍ ଖେଳିପାରିବେ ନାହିଁ । ଟେନିସ୍ ପାଇଁ ପ୍ରଥମେ ର୍ୟାକେଟ୍ ଓ ବଲ୍ କିଣିବାକୁ ପଡ଼େ । ଏହାପରେ ନିୟମିତ ବ୍ୟବଧାନରେ ର୍ୟାକେଟ୍ର ତାର ବଦଳାଇବାକୁ ହେବ । ଜୋର୍ରେ ଖେଳିଲେ ଗୋଟିଏ ସେସନ୍ ପରେ ବଲ୍ ନଷ୍ଟ ହୋଇଯାଏ । ସାଧାରଣତଃ ମାଗଣାରେ ଖେଳିବା ପାଇଁ ଟେନିସ୍ କୋର୍ଟ ଉପଲବ୍ଧ ନ ଥାଏ । ଟେନିସ୍ କୋଚିଂ ବି ବ୍ୟୟବହୁଳ ।
ଏହାଛଡ଼ା ଦେଶରେ ବେଶୀ ଏଟିପି ଚାଲେଞ୍ଜର୍ ଟୁର୍ଣ୍ଣାମେଣ୍ଟ ଆୟୋଜିତ ହୋଇ ନ ଥାଏ । ଅଭିଜ୍ଞତା ପାଇଁ ଭାରତୀୟ ଖେଳାଳିଙ୍କୁ ଅନ୍ୟ ଦେଶକୁ ଯିବାକୁ ପଡ଼େ । ଏପରି ସ୍ଥିତିରେ ଭବିଷ୍ୟତକୁ ଦୃଷ୍ଟିରେ ରଖି ଦେଶରେ ଏହି ଖେଳକୁ ଲୋକପ୍ରିୟ କରାଇବାର ଆବଶ୍ୟକତା ରହିଛି । ଅଖିଳ ଭାରତୀୟ ଟେନିସ୍ ସଂଘ ଅଧିକ ଗୁଣାତ୍ମକ ଟୁର୍ଣ୍ଣାମେଣ୍ଟ ଆୟୋଜନ କରିବା ଉଚିତ । ପ୍ରତିଭା ଚିହ୍ନଟରେ ଅଧିକ ସକ୍ରିୟତା ଲୋଡ଼ା । ଏହା ସହିତ ଟେନିସ୍ର ବିକାଶ କାର୍ଯ୍ୟରେ ପୁରୁଣା ଖେଳାଳିମାନଙ୍କୁ ବି ସାମିଲ୍ କରାଯିବା ଦରକାର ।
ଇମେଲ୍: biswasports@gmail.com
(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)
