ED summons Shikhar Dhawan: ଶିଖର ଧାୱନଙ୍କ ସମସ୍ୟା ବଢ଼ିଲା! ସମନ କଲା ଇଡି, ଏହି ମାମଲାରେ କରିବ ପଚରାଉଚରା

ପୂର୍ବତନ କ୍ରିକେଟର ଶିଖର ଧାୱନଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ତରଫରୁ ସମନ ଜାରି କରାଯାଇଛି। ଏକ ବେଆଇନ ବେଟିଂ ଆପ୍ ସହ ଜଡ଼ିତ ମନି ଲଣ୍ଡରିଂ ମାମଲାରେ ତଦନ୍ତ ପରିସରଭୁକ୍ତକୁ ଶିଖର ଧାୱନ ଆସିବା ପରେ ତାଙ୍କୁ ଇଡି ପକ୍ଷରୁ ସମନ ଜାରି କରାଯାଇଛି। ଗତ କିଛି ଦିନ ପୂର୍ବରୁ ଏଭଳି ମାମଲାରେ କେନ୍ଦ୍ରୀୟ ଏଜେନ୍ସି ପୂର୍ବତନ କ୍ରିକେଟର ସୁରେଶ ରାଇନାଙ୍କୁ ପ୍ରାୟ ଆଠ ଘଣ୍ଟା ପାଇଁ ଜେରା କରିଥିଲା।

ଏକ ସୂତ୍ରରୁ ଜଣାପଡ଼ିଛି ଯେ, 1xBet ନାମକ ଏକ ବେଆଇନ ବେଟିଂ ଆପ୍ ସହ ଜଡ଼ିତ ମାମଲାରେ ଧାୱନଙ୍କୁ ଗୁରୁବାର ଦିଲ୍ଲୀରେ ଥିବା ଏଜେନ୍ସିର ମୁଖ୍ୟାଳୟରେ ଜେରା ପାଇଁ ହାଜର ହେବାକୁ କୁହାଯାଇଛି। ସେ ହାଜର ହେବା ପରେ, ଇଡି ତାଙ୍କ ବୟାନକୁ ପ୍ରିଭେନସନ ଅଫ ମନି ଲଣ୍ଡରିଂ ଆକ୍ଟ (ପିଏମଏଲଏ) ଅଧୀନରେ ରେକର୍ଡ କରିବ।

ଇଡିର ସୂଚନା ଅନୁସାରେ, ଧାୱନ କିଛି ଏଣ୍ଡୋର୍ସମେଣ୍ଟ ମାଧ୍ୟମରେ ଏହି ଆପ୍ ସହ ଜଡ଼ିତ। ଇଡି ଅଧିକାରୀମାନେ ଜେରା ସମୟରେ ତାଙ୍କର ଏହି ସମ୍ପର୍କକୁ ତଦନ୍ତ କରିବେ।

ଗତ ମାସରେ, ଇଡି ରାଇନାଙ୍କୁ ସମନ କରିଥିଲା ଏବଂ ତାଙ୍କ ବୟାନକୁ ପିଏମଏଲଏର ନିୟମ ଅନୁସାରେ ରେକର୍ଡ କରିଥିଲା। ଜେରା ସମୟରେ, ସେମାନେ ବେଟିଂ ଆପ୍‌ର ମାଲିକମାନେ ତାଙ୍କୁ କିପରି ଯୋଗାଯୋଗ କରିଥିଲେ, ତାଙ୍କୁ କିପରି ଟଙ୍କା ଦିଆଯାଇଥିଲା, କେଉଁଠାରେ ଟଙ୍କା ଦିଆଯାଇଥିଲା ଏବଂ ଅନେକ ଆର୍ଥିକ ନେଣଦେଣ ବିଷୟରେ ପଚାରିଥିଲେ।

ଏଜେନ୍ସି ଏପରି ଅନେକ ବେଆଇନ ବେଟିଂ ଆପ୍ ସମ୍ପର୍କିତ ମାମଲାର ତଦନ୍ତ କରୁଛି। ବେଟିଂ ଆପର ମାଲିକମାନେ ଅନେକ ଲୋକ ଏବଂ ନିବେଶକଙ୍କୁ କୋଟି କୋଟି ଟଙ୍କାରେ ଠକେଇ କରିଛନ୍ତି କିମ୍ବା ବିପୁଳ ପରିମାଣର ଟିକସ ଫାଙ୍କି ଦେଇଛନ୍ତି।