Sports: ଟିମ୍ ଇଣ୍ଡିଆର ‘ଭବିଷ୍ୟତ ତାରକା’ ହୋଇପାରିବେ କି ଯଶ ଦୟାଲ...

ଇଣ୍ଡିଆନ୍ ପ୍ରିମିଅର୍ ଲିଗ୍ (ଆଇପିଏଲ୍‌) ୨୦୨୩ ସିଜନ୍ ସମୟରେ ବାମହାତି ମିଡିଅମ୍ ପେସର୍ ଯଶ ଦୟାଲ ଚର୍ଚ୍ଚାକୁ ଆସିଥିଲେ । କିନ୍ତୁ ବିଡ଼ମ୍ବନାର ବିଷୟ ଥିଲା ଯେ ସେହି ଚର୍ଚ୍ଚା ତାଙ୍କ ଉତ୍ତମ ପ୍ରଦର୍ଶନ କି ସମ୍ଭାବନାମୟ ଭବିଷ୍ୟତକୁ ନେଇ ହୋଇ ନ ଥିଲା, ଦୁର୍ବଳ ବୋଲିଂ ପ୍ରଦର୍ଶନ ଯୋଗୁଁ ସେ ପ୍ରଶ୍ନଘେରକୁ ଚାଲିଆସିଥିଲେ । ଏପରିକି ସେତେବେଳେ ଯଶଙ୍କ ଭବିଷ୍ୟତକୁ ନେଇ ଅନେକେ ସନ୍ଦିହାନ ହୋଇପଡ଼ିଥିଲେ।

୨୦୨୩ ଏପ୍ରିଲ୍ ୯ରେ ଆୟୋଜିତ ଏକ ମ୍ୟାଚ୍‌ରେ ଗୁଜରାଟ ଟାଇଟନ୍ସ ବିପକ୍ଷରେ କୋଲକାତା ନାଇଟ୍ ରାଇଡର୍ସକୁ ବିଜୟ ପାଇଁ ୬ ବଲ୍‌ରେ ୨୯ ରନ୍ ଆବଶ୍ୟକ ଥିଲା । ମନେ ହେଉଥିଲା ହାର୍ଦ୍ଦିକ ପାଣ୍ଡ୍ୟାଙ୍କ ଟିମ୍ ମ୍ୟାଚ୍ ଜିତିଯିବ, ହେଲେ ଯଶ ମ୍ୟାଚ୍ ବଞ୍ଚାଇପାରି ନ ଥିଲେ ଏବଂ ୩୧ ରନ୍ ଦେଇଥିଲେ । ବାମହାତି ବ୍ୟାଟର୍ ରିଙ୍କୁ ସିଂହ ଶେଷ ପାଞ୍ଚ ବଲ୍‌ରେ ପାଞ୍ଚ ଛକା ମାରି ଅପ୍ରତ୍ୟାଶିତ ଭାବେ ନିଜ ଟିମ୍‌କୁ ଜିତାଇଥିଲେ ।

ରିଙ୍କୁ ରାତାରାତି ‘ପରିପୂର୍ଣ୍ଣ ଫିନିଶର୍‌’ର ଆଖ୍ୟା ପାଇଲେ ଆଉ ଯଶ ‘ଅପଯଶ’ ସାଉଁଟିଲେ । ସେହି ମ୍ୟାଚ୍ ପରେ ତାଙ୍କୁ ସିଜନ୍‌ର ଅବଶିଷ୍ଟ ମ୍ୟାଚ୍‌ଗୁଡ଼ିକରେ ଖେଳିବାର ସୁଯୋଗ ମିଳି ନ ଥିଲା ।

ଏହାର ପ୍ରାୟ ୧୬ ମାସ ପରେ ପୁଣି ଥରେ ଯଶଙ୍କୁ ନେଇ ଚର୍ଚ୍ଚା । କିନ୍ତୁ ଏଥରର ଚର୍ଚ୍ଚା ସକାରାତ୍ମକ । ବାଂଲାଦେଶ ବିପକ୍ଷ ଦୁଇ ଟେଷ୍ଟ ବିଶିଷ୍ଟ ସିରିଜ୍‌ର ପ୍ରଥମ ମ୍ୟାଚ୍ ପାଇଁ ତାଙ୍କୁ ନୂଆମୁହଁ ଭାବେ ଭାରତୀୟ ଟିମ୍‌ରେ ସାମିଲ୍ କରାଯାଇଥିଲା । ଅବଶ୍ୟ ସେ ଚୂଡ଼ାନ୍ତ ଏକାଦଶରେ ସ୍ଥାନ ପାଇ ନ ଥିଲେ ।

ତେବେ ପ୍ରଥମ ଚର୍ଚ୍ଚା ଓ ଦ୍ୱିତୀୟ ଚର୍ଚ୍ଚା ମଧ୍ୟରେ ଏମିତି କ’ଣ ଘଟିଲା ଯେ ଯାହାଙ୍କ ଭବିଷ୍ୟତ ଦିନେ ପ୍ରଶ୍ନଘେରରେ ଥିଲା, ତାଙ୍କୁ ଜାତୀୟ ଟିମ୍ ପାଇଁ ଡକରା ଆସିଲା?

ଯୁବ ପେସର୍‌ଙ୍କ ବିସ୍ମୟକର ପ୍ରତିବଦ୍ଧତା:

୨୦୨୩ ସିଜନ୍ ପରେ ଗୁଜରାଟ ଟାଇଟନ୍ସ ଫ୍ରାଞ୍ଚାଇଜ୍ ଯଶ ଦୟାଲ୍‌ଙ୍କୁ ରିଲିଜ୍ କରିଦେଇଥିଲା । ସେତେବେଳେ ସେ ଟିକେ ନିରାଶ ହୋଇଥିଲେ । ଏହାପରେ ମିନି ନିଲାମୀରେ ରୟାଲ୍ ଚାଲେଞ୍ଜର୍ସ ବାଙ୍ଗାଲୋର ତାଙ୍କୁ ଆଶ୍ଚର୍ଯ୍ୟଜନକ ଭାବେ ପାଞ୍ଚ କୋଟି ଟଙ୍କାରେ କିଣିଥିଲା ।

ସେହି ଯନ୍ତ୍ରଣାଦାୟକ ଓଭର୍ ପରେ ଯଶ ହାର୍ ମାନି ନ ଥିଲେ । ମାନସିକ ଭାବେ ନିଜକୁ ଦୃଢ଼ କରିବା ସହ କଠିନ ପରିଶ୍ରମ ବି କରିଥିଲେ ଏବଂ ଶେଷରେ ଫର୍ମକୁ ଫେରିଥିଲେ ।

ଘରୋଇ କ୍ରିକେଟ୍ ହେଉ ବା ଆଇପିଏଲ୍ ୨୦୨୪ - ଯଶ ପ୍ରମାଣିତ କରିଛନ୍ତି ଯେ ତାଙ୍କ ଭିତରେ ପ୍ରତିଭା ଅଛି ଏବଂ ସେ ଜାତୀୟ ଟିମ୍‌ରେ ସ୍ଥାନ ପାଇବା ପାଇଁ ଯୋଗ୍ୟ । ତାଙ୍କର ପ୍ରତିକୂଳ ପରିସ୍ଥିତି ସହ ଲଢ଼ିବାର ଆତ୍ମବିଶ୍ୱାସ ଓ ଲକ୍ଷ୍ୟସ୍ଥଳରେ ପହଞ୍ଚିବା ପାଇଁ ପ୍ରତିବଦ୍ଧତା ଭାରତୀୟ କ୍ରିକେଟ୍ ଜଗତକୁ ବିସ୍ମିତ କରିଛି ।

ଯଶଙ୍କ ପିତା ଚନ୍ଦ୍ରପାଲ ଦୟାଲ୍ ଏକ ସାକ୍ଷାତକାରରେ କହିଛନ୍ତି ଯେ ସେହି ଗୋଟିଏ ଓଭର୍ ତାଙ୍କ ପୁଅକୁ ଅନେକ କିଛି ଶିଖାଇଛି । ଏହାପରେ ଯଶ ବହୁ ଉତ୍‌ଥାନ-ପତନ ଦେଖିଛି । ଏହାଦ୍ୱାରା ସେ ଗୋଟିଏ ବର୍ଷ ମଧ୍ୟରେ ଯାହା ଶିକ୍ଷା ଲାଭ କରିଥିଲା, ତାହା ଶିଖିବା ପାଇଁ ଲୋକଙ୍କୁ ବହୁ ବର୍ଷ ଲାଗିଯାଏ । ସେ କଠିନ ପରିଶ୍ରମ କରିଥିଲା ଏବଂ ପରବର୍ତ୍ତୀ ସିଜନ୍‌ରେ ଆଇପିଏଲ୍‌କୁ ପ୍ରତ୍ୟାବର୍ତ୍ତନ କରି ଉନ୍ନତ ପ୍ରଦର୍ଶନ କରିଥିଲା ।

ଘରୋଇ କ୍ରିକେଟ୍ ଓ ଆଇପିଏଲ୍ ୨୦୨୪ରେ ଉତ୍ତମ ପ୍ରଦର୍ଶନ:

ଆଇପିଏଲ୍ ୨୦୨୩ର ତିକ୍ତ ଅନୁଭୂତିକୁ ଭୁଲାଇ ଯଶ ଦୟାଲ୍ ଘରୋଇ କ୍ରିକେଟ୍‌ରେ ଉତ୍ତମ ପ୍ରଦର୍ଶନ କରିଥିଲେ । ସେ ରଣଜୀ ଟ୍ରଫିର ପୂର୍ବ ସିଜନ୍‌ରେ ଉତ୍ତର ପ୍ରଦେଶ ପକ୍ଷରୁ ଚାରି ମ୍ୟାଚ୍ ଖେଳି ସାତ ୱିକେଟ୍ ନେଇଥିଲେ । ଏହାପରେ ବିଜୟ ହଜାରେ ଟ୍ରଫିରେ ଛଅ ମ୍ୟାଚ୍‌ରେ ନଅ ୱିକେଟ୍ ନେଇଥିଲେ ।

ଏବେ ଚାଲିଥିବା ଦଲୀପ ଟ୍ରଫିରେ ବି ତାଙ୍କୁ ସୁଯୋଗ ମିଳିଥିଲା । ସେ ଇଣ୍ଡିଆ-ବି ପକ୍ଷରୁ ଖେଳି ପ୍ରଥମ ରାଉଣ୍ଡ ମ୍ୟାଚ୍‌ରେ ୪ ୱିକେଟ୍ ନେଇଥିଲେ । ଇଣ୍ଡିଆ-ଏ ବିପକ୍ଷ ଏହି ମ୍ୟାଚ୍‌କୁ ଇଣ୍ଡିଆ-ବି ୭୬ ରନ୍‌ରେ ଜିତିଥିଲା । ଦ୍ୱିତୀୟ ରାଉଣ୍ଡ ମ୍ୟାଚ୍ ପୂର୍ବରୁ ତାଙ୍କୁ ଜାତୀୟ ଟିମ୍‌କୁ ଡକରା ଆସିଥିଲା ।

ଏହା ପୂର୍ବରୁ ଆଇପିଏଲ୍ ୨୦୨୪ ସିଜନ୍‌ରେ ଯଶ ପ୍ରଭାବଶାଳୀ ପ୍ରଦର୍ଶନ କରିଥିଲେ । ସେ ରୟାଲ୍ ଚାଲେଞ୍ଜର୍ସ ବାଙ୍ଗାଲୋର ପକ୍ଷରୁ ୧୪ ମ୍ୟାଚ୍ ଖେଳି ୧୫ ୱିକେଟ୍ ନେଇଥିଲେ । ବିଶେଷକରି ଡିଫେଣ୍ଡିଂ ଚାମ୍ପିଅନ୍ ଚେନ୍ନାଇ ସୁପର୍ କିଙ୍ଗ୍‌ସ ବିପକ୍ଷ ‘କର ବା ମର’ ମ୍ୟାଚ୍‌ରେ ତାଙ୍କ ପ୍ରଦର୍ଶନ ଉଲ୍ଲେଖନୀୟ ଥିଲା । ସେ ରୟାଲ୍ ଚାଲେଞ୍ଜର୍ସକୁ ଜିତାଇ ଫ୍ଲେଅଫ୍‌ରେ ପହଞ୍ଚାଇବା ସହ ଟିମ୍‌ରେ ନିଜ ଉପଯୋଗିତା ସାବ୍ୟସ୍ତ କରିଥିଲେ ।

ସିଏସ୍‌କେ ବିପକ୍ଷ ସେହି ରୋମାଞ୍ଚକ ମ୍ୟାଚ୍‌:

ଚଳିତ ବର୍ଷ ମେ’ ୨୮ରେ ରୟାଲ୍ ଚାଲେଞ୍ଜର୍ସ ବାଙ୍ଗାଲୋର ଓ ଚେନ୍ନାଇ ସୁପର୍ କିଙ୍ଗ୍‌ସ ମଧ୍ୟରେ ଏକ ରୋମାଞ୍ଚକ ମୁକାବିଲା ହୋଇଥିଲା । ଉଭୟ ଟିମ୍ ପାଖରେ ଚତୁର୍ଥ ତଥା ଶେଷ ଟିମ୍ ଭାବେ ଫ୍ଲେଅଫ୍‌କୁ ଯିବା ପାଇଁ ସୁଯୋଗ ଥିଲା । ସୁପର୍ କିଙ୍ଗ୍‌ସକୁ ପ୍ଲେଅଫ୍‌ରେ ପ୍ରବେଶ ପାଇଁ ୬ ବଲ୍‌ରେ ଆବଶ୍ୟକ ଥିଲା ୧୭ ରନ୍ ।

ରୟାଲ୍ ଚାଲେଞ୍ଜର୍ସ ପାଖରେ ଶେଷ ଓଭର୍ ବୋଲିଂ କରିବା ପାଇଁ ଦୁଇ ପେସର୍ - କାମେରନ୍ ଗ୍ରୀନ୍ ଓ ଯଶ ଦୟାଲ୍ ଥିଲେ । କିନ୍ତୁ ଭାରତୀୟ ଯୁବ ପେସର୍‌ଙ୍କ ଉପରେ ଭରସା ବ୍ୟକ୍ତ କରାଯାଇଥିଲା ।

ଯଶଙ୍କ ଆଗରେ ପ୍ରାୟ ବର୍ଷକ ପୂର୍ବର ଆହ୍ୱାନ ଆସି ଛିଡ଼ା ହୋଇଥିଲା । ଏଥର ପ୍ରତିପକ୍ଷ ଟିମ୍ ପାଇଁ ପୂର୍ବାପେକ୍ଷା କମ୍ ରନ୍ ଆବଶ୍ୟକ ଥିଲା । ଷ୍ଟ୍ରାଇକ୍‌ରେ ଥିଲେ ଗୋଟିଏ ସମୟର ଶ୍ରେଷ୍ଠ ଫିନିଶର୍ ମହେନ୍ଦ୍ର ସିଂହ ଧୋନି ଆଉ କ୍ରିଜ୍‌ର ଅନ୍ୟପଟେ ରବୀନ୍ଦ୍ର ଜାଡ଼େଜା ।

ଯଶଙ୍କ ପ୍ରଥମ ବଲ୍‌ରେ ଧୋନି ଛକା ମାରିଥିଲେ, କିନ୍ତୁ ଦ୍ୱିତୀୟ ବଲ୍‌ରେ ସେ କ୍ୟାଚ୍ ଆଉଟ୍ ହୋଇଯାଇଥିଲେ । ଏହାପରେ ଟିମ୍ ପାଖରେ ୪ ବଲ୍‌ରୁ ୧୧ ରନ୍ ଆବଶ୍ୟକ ଥିଲା । କିନ୍ତୁ ଶେଷ ଚାରି ବଲ୍‌ରୁ ମାତ୍ର ୧ ରନ୍ ହୋଇଥିଲା । ଯଶ ସେହି ଓଭର୍‌ରେ ମାତ୍ର ୭ ରନ୍ ଦେଇଥିଲେ ।

ଅପ୍ରତ୍ୟାଶିତ ଢଙ୍ଗରେ ସୁପର୍ କିଙ୍ଗ୍‌ସ ହାତରୁ ମ୍ୟାଚ୍ ଛଡ଼ାଇ ଆଣିଥିବା ଯଶ ସତେ ଯେମିତି ତାଙ୍କ ପୂର୍ବ ଗୌରବ ଫେରିପାଇଥିଲେ । ଆଇପିଏଲ୍ ୨୦୨୩ ସିଜନ୍‌ରେ ଗୋଟିଏ ଓଭର୍‌ରେ ୩୧ ରନ୍ ଦେଇଥିବା ଏହି ଯୁବ ପେସର୍ ୨୦୨୪ ସିଜନ୍‌ର ଏକ ଗୁରୁତ୍ୱପୂର୍ଣ୍ଣ ମ୍ୟାଚ୍‌ରେ ସୁପର୍ କିଙ୍ଗ୍‌ସକୁ ୧୬ ରନ୍ କରିବାକୁ ଦେଇ ନ ଥିଲେ । ଏହା ଥିଲା ଯଶଙ୍କ ପ୍ରତିଭାର ରୂପାନ୍ତରଣ ।

୨୦୧୮ରେ ପ୍ରଥମ-ଶ୍ରେଣୀ କ୍ରିକେଟ୍‌ରେ ପଦାର୍ପଣ କରିବା ଠାରୁ ଯଶ ଏ ଯାବତ ୨୪ ମ୍ୟାଚ୍ ଖେଳି ୨୮.୮୯ ଆଭରେଜ୍‌ରେ ୭୬ ୱିକେଟ୍ ନେଇଛନ୍ତି । ଏହାଛଡ଼ା ସେ ୨୦ ଲିଷ୍ଟ-ଏ ମ୍ୟାଚ୍‌ରେ ୩୨ ୱିକେଟ୍ ପାଇଥିବା ବେଳେ ୫୬ ଟି-୨୦ ମ୍ୟାଚ୍‌ରେ ୫୩ ୱିକେଟ୍ ଅକ୍ତିଆର କରିଛନ୍ତି । ଆଇପିଏଲ୍‌ରେ ସେ ୨୮ ମ୍ୟାଚ୍ ଖେଳିଛନ୍ତି, ଯେଉଁଥିରେ ତାଙ୍କ ନାମରେ ୨୮ ୱିକେଟ୍ ରହିଛି ।

ଭାରତୀୟ ଟେଷ୍ଟ ଟିମ୍‌ରେ ସ୍ଥାନ ପାଇବା ଯଶଙ୍କ ପାଇଁ ବହୁତ ବଡ଼ କଥା । ଖେଳିବାର ସୁଯୋଗ ପାଇବା ସ୍ଥଳେ ଉତ୍ତରପ୍ରଦେଶର ଏହି ବାମହାତି ପେସର୍ ନିଜ ପ୍ରତିଭାର ଯଥାସାଧ୍ୟ ପ୍ରଦର୍ଶନ କରିବାକୁ ପ୍ରୟାସ କରିବେ । ଅବଶ୍ୟ ଦେଶରେ ଅନେକ ପ୍ରତିଭାଶାଳୀ ପେସର୍ ଥିବାରୁ ଯେକୌଣସି ଫର୍ମାଟ୍‌ର ଟିମ୍‌ରେ ସ୍ଥାନ ସୁରକ୍ଷିତ କରିବା ସହଜ ନୁହେଁ ।

ଆତ୍ମବିଶ୍ୱାସୀ ଯଶ ଟିମ୍ ଇଣ୍ଡିଆର ‘ଭବିଷ୍ୟତ ତାରକା’ ହୋଇପାରିବେ । ଜାତୀୟ ଟିମ୍‌ରେ ତାଙ୍କ ଯାତ୍ରା ଆଗକୁ ବଢ଼ିଲେ, ସେ ସୀମିତ ଓଭର୍ ଟିମ୍‌ରେ ବି ସ୍ଥାନ ପାଇପାରିବେ । କିନ୍ତୁ ଏଥିପାଇଁ ପ୍ରଦର୍ଶନରେ ନିରନ୍ତରତା ଓ ଫିଟ୍‌ନେସ୍ ଉଭୟ ଜରୁରୀ । ଏହା ସହିତ ସେହି ପ୍ରତିବଦ୍ଧତାର ବି ଆବଶ୍ୟକତା ରହିଛି, ଯାହା ବଳରେ ସେ ସଫଳ ପ୍ରତ୍ୟାବର୍ତ୍ତନ କରିଥିଲେ।

ଇମେଲ୍: [email protected]

(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)