Viral Video: ବିବାହ ମଝିରେ ବର ମାଗିଲା ଯୌତୁକ; କନ୍ୟା ପ‍କ୍ଷ ଦେଲେ ପାନେ

ସମାଜ ଯେତେ ସଭ୍ୟତା ଆଡକୁ ଯାଉଥିଲେ ମଧ୍ୟ କୋଉଠି ନା କୋଉଠି କୁସଂସ୍କାର ରହିଯାଉଛି। ଯୌତୁକ ଭଳି ଘୃଣ୍ୟ ପ୍ରଥା ଧୀରେ ଧୀରେ ଦେଶରୁ ଶେଷ ହେଉଥିଲେ ମଧ୍ୟ ଆଜି ବି କିଛି ଲୋକ ସେମାନଙ୍କର ନିମ୍ନ ମାନସିକତାରୁ ବାହାରି ପାରି ନାହାଁନ୍ତି। ଆଜି ମଧ୍ୟ ଯୌତୁକ ଦାବି କରି ନିଜର ସମ୍ମାନ ହ୍ରାସ କରୁଥିବା ଦେଖାଯାଏ।

ଏହିପରି ଲୋକମାନଙ୍କ ସହିତ କ’ଣ ହୁଏ ତାହାର ଏକ ସଦ୍ୟତମ ଉଦାହରଣ ସୋସିଆଲ୍ ମିଡିଆରେ ଭାଇରାଲ୍ ହେଉଛି। ଏହି ଭାଇରାଲ୍ ଭିଡିଓରେ ଦେଖିବାକୁ ମିଳେ ଯେ କିପରି ବରକୁ ଲୋକମାନେ ଏକ ଗଛରେ ବାନ୍ଧି ପକେଇଛନ୍ତି।

ଏହି ଘଟଣା ଉତ୍ତରପ୍ରଦେଶର ପ୍ରତାପଗଡର ମାନ୍ଧାତା କୋରବାଲୀର ହରଖପୁର ଗାଁର। ଜୁନ୍ ୧୪ରେ ଘଟିଥିବା ଏହି ଘଟଣାରେ ଜୌନପୁର ଜିଲ୍ଲାର ପୁରଭା ଗ୍ରାମରୁ ଏହି ଶୋଭାଯାତ୍ରା ଆସିଥିଲା। ବରର ଅମରଜିତ ବର୍ମା, ଯିଏ ନିଜ ପରିବାର ଏବଂ ସାଙ୍ଗମାନଙ୍କ ସହିତ ଧୁମଧାମରେ ବରଯାତ୍ରୀ ନେଇ ଆସିଥିଲେ। ଝିଅ ଘର ସେମାନଙ୍କୁ ଭଲ ଭାବେ ସ୍ୱାଗତ କରିଥିଲେ ଏବଂ ବିବାହର ରୀତିନୀତି ମଧ୍ୟ ଆରମ୍ଭ ହୋଇଥିଲା। କିନ୍ତୁ ହଠାର ପୁଅ ବିବାହ ମଝିରେ ଯୌତୁକ ମାଗିଥିଲେ।

ସମସ୍ତେ ଜାଣନ୍ତି ଯେ ଭାରତରେ ଯୌତୁକ ନେବା ଏକ ଆଇନଗତ ଅପରାଧ। କିନ୍ତୁ ଯେତେବେଳେ ବର ଯୌତୁକ ମାଗିଥିଲେ, ସେତେବେଳେ ଝିଅର ବାପାମାଆ ଆଶ୍ଚର୍ଯ୍ୟ ହୋଇଯାଇଥିଲେ। ସେମାନେ ବର ସମେତ ତାଙ୍କ ପରିବାର ସଦସ୍ୟଙ୍କୁ ବୁଝାଇଥିଲେ। ଏହା ପରେ ବି ଯେତେବେଳେ ସେମାନେ ଯୌତୁକ ନେବାକୁ ଜିଦ୍ ଧରିଥିଲେ, ସେତେବେଳେ ଝିଅ ଘର ଲୋକମାନେ ଏପରି ପଦକ୍ଷେପ ନେଇଥିଲେ ଯେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ସେମାନେ ବର ସମେତ ସମସ୍ତ ବରଯାତ୍ରୀଙ୍କୁ ବାନ୍ଧି ପକେଇଥିଲେ।

ଏହି ଘଟଣା ସହ ଜଡିତ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ଯେଉଁଥିରେ ଲୋକମାନେ ବରକୁ ଏକ ଗଛରେ ବାନ୍ଧିପକଉଥିବାର ନଜର ଆସିଛନ୍ତି। ସେ ମଧ୍ୟ ବିବ୍ରତ ଦେଖାଯାଉଛନ୍ତି। @Sisodia19Rahul ନାମକ ଜଣେ ବ୍ୟକ୍ତି ଟ୍ୱିଟରରେ ଏହି ଭିଡିଓ ଟ୍ୱିଟ୍ କରିଛନ୍ତି।

ଖବର ଅନୁଯାୟୀ, ବିବାହ ମଝିରେ କିଛି ପ୍ରସଙ୍ଗରେ ବର ଏବଂ କନ୍ୟା ପକ୍ଷ ମଧ୍ୟରେ ଝଗଡା ହୋଇଥିଲା। ଏହା ଆଉ ଥଣ୍ଡା ପଡି ନଥିଲା। ବର ଯୌତୁକକୁ ନେଇ ଜିଦି କରିବାରୁ କନ୍ୟାପକ୍ଷ ରାଗିଯାଇଥିଲେ ଆଉ ବରକୁ ବାନ୍ଧିପକେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚିବା ପରେ ବରକୁ ମୁକ୍ତ କରାଯାଇଥିଲା। ଖବର ଲେଖାହେବା ବେଳକୁ ପୋଲିସ ବରକୁ ସାଙ୍ଗରେ ନେଇ ପୋଲିସ ଷ୍ଟେସନରେ ଦୁଇ ପ‍କ୍ଷ ମଧ୍ୟରେ ଏହି ସମସ୍ୟାର ସମାଧାନ ପାଇଁ ଉଦ୍ୟମ କରୁଥିଲା।