Fake Video: ୧.୮ କୋଟି ଟଙ୍କାର ପ୍ୟାକେଜ ମିଳିଥିବା ହୋର୍ଡିଂ ଲାଗିଛି, କିନ୍ତୁ ବିକୁଛନ୍ତି ଆଇସକ୍ରିମ...କାରଣ ଜାଣିଲେ ହୋସ ଉଡିଯିବ

ଗ୍ରେଟର ନୋଏଡାର ଏକ ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେଉଛି। ଏଥିରେ ଏକ ନାମୀ କଲେଜର ଜଣେ ଛାତ୍ରଙ୍କୁ ୧.୮ କୋଟି ଟଙ୍କାର ପ୍ୟାକେଜ ମିଳିଥିବାର ହୋର୍ଡିଂ ଦେଖାଯାଇଛି ଏବଂ ଦାବି କରାଯାଇଛି ଯେ ବିଜ୍ଞାପନରେ ଥିବା ଫଟୋର ବ୍ୟକ୍ତି ଜଣେ ଆଇସକ୍ରିମ ବିକ୍ରେତା ଏବଂ ତାଙ୍କର କୌଣସି ଚାକିରି ହୋଇନାହିଁ।

ଭାଇରାଲ ଭିଡିଓରେ ଏକ ଫୁଟଓଭର ବ୍ରିଜ୍‌ରେ କଲେଜର ହୋର୍ଡିଂ ଲାଗିଥିବା ଦେଖାଯାଇଛି। ଏହି ହୋର୍ଡିଂରେ ଜଣେ ଛାତ୍ରଙ୍କୁ ୧.୮ କୋଟି ଟଙ୍କାର ପ୍ୟାକେଜ ମିଳିଥିବା ଲେଖାଯାଇଛି। ବିଜ୍ଞାପନରେ ଦେଖାଯାଉଥିବା ଛାତ୍ରଙ୍କ ପରି ଦେଖାଯାଉଥିବା ଜଣେ ବ୍ୟକ୍ତି ଭାଇରାଲ ଭିଡିଓରେ ଦାବି କରୁଛନ୍ତି ଯେ ସେ ଆଇସକ୍ରିମ ବିକ୍ରି କରନ୍ତି ଏବଂ କଲେଜ କର୍ତ୍ତୃପକ୍ଷ ତାଙ୍କ ଫଟୋ ଉଠାଇ ନେଇଥିଲେ। ସେମାନେ କହିଥିଲେ ଯେ ଟଙ୍କା ଦେବେ, କିନ୍ତୁ କିଛି ଦେଇନାହାନ୍ତି।

ଏକ ରିପୋର୍ଟରେ କୁହାଯାଇଛି ଆଇସକ୍ରିମ ବିକ୍ରେତା ଯୁବକଙ୍କ ନାମ ଶୈଲେନ୍ଦ୍ର । ସେ ଇଟାୱାର ବାସିନ୍ଦା। ତାଙ୍କର ଏହି କଲେଜ ସହ କୌଣସି ସମ୍ପର୍କ ନାହିଁ। ତାଙ୍କ ଜଣେ ବନ୍ଧୁ ମଜାରେ ଏହି ଭିଡିଓ ତିଆରି କରିଥିଲେ। ତାଙ୍କୁ ଆଦୌ ଆଶା ନଥିଲା ଯେ ଏହା ଏତେ ଭାଇରାଲ ହେବ। ବନ୍ଧୁ ସୋସିଆଲ ମିଡିଆରେ ଫଲୋଅର୍ସ ବଢ଼ାଇବା ପାଇଁ ମଜାରେ ଏହି ଭିଡିଓ ତିଆରି କରିଥିଲେ।

ଏହି ଭିଡିଓ ସମ୍ପର୍କରେ ଯେତେବେଳେ କଲେଜର ଡାଇରେକ୍ଟର ଜେନେରାଲ ଅଙ୍କୁର ଜୌହରୀଙ୍କୁ ପଚରାଯାଇଥିଲା ସେ ଅଭିଯୋଗ କରିଥିଲେ ଯେ ଆମ କଲେଜକୁ ବଦନାମ କରିବା ପାଇଁ କିଛି ବ୍ୟକ୍ତି ଜଣେ ଆଇସକ୍ରିମ ବିକ୍ରେତାଙ୍କ ସହ ମିଶି ନକଲି ଭିଡିଓ ତିଆରି କରିଛନ୍ତି। ହୋର୍ଡିଂରେ ଦେଖାଯାଉଥିବା ଯୁବକ ଆମର ଜଣେ ପ୍ରତିଭାବାନ ଛାତ୍ର। ସେ ଲଣ୍ଡନର ଏକ ଭଲ କମ୍ପାନୀରେ ଉଚ୍ଚ ପ୍ୟାକେଜରେ କାମ କରୁଛନ୍ତି। ଆମେ ପୁଲିସ ପ୍ରଶାସନଙ୍କୁ ଅନୁରୋଧ କରୁଛୁ ଯେ ଏପରି ଭିଡିଓ ତିଆରି କରୁଥିବା ବ୍ୟକ୍ତିଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବେ ।

ଏହି ମାମଲା ସମ୍ପର୍କରେ ଗ୍ରେଟର ନୋଏଡାର ନଲେଜ ପାର୍କ ଥାନା ପୁଲିସ କହିଛନ୍ତି ଭାଇରାଲ ଭିଡିଓରେ ଦେଖାଯାଉଥିବା ଆଇସକ୍ରିମ ବିକ୍ରେତାଙ୍କୁ ଡକାଯାଇଥିଲା। ସେ କହିଥିଲେ ଯେ ତାଙ୍କ ବନ୍ଧୁମାନେ ମଜାରେ ଏହି ଭିଡିଓ ତିଆରି କରିଥିଲେ। ଯୁବକ ଏହି ଘଟଣା ପାଇଁ କ୍ଷମା ମାଗି ନେଇଛନ୍ତି। ତା’ପରେ ତାଙ୍କୁ ସତର୍କ କରି ଛାଡ଼ି ଦିଆଯାଇଛି।