Viral Video: ଖାଇବା ବିଲ ଅଧିକ ଆସିଥିଲା, ଦେବାକୁ ପଡ଼ିବ ବୋଲି ହଙ୍ଗାମା କଲେ...କହିଲେ ଧର୍ମ ଭ୍ରଷ୍ଟ କରୁଛନ୍ତି

ଉତ୍ତରପ୍ରଦେଶର ଗୋରଖପୁରରେ କିଛି ସାଙ୍ଗ ଏକ ରେଷ୍ଟୁରାଣ୍ଟରେ ଖାଇବାକୁ ପହଞ୍ଚିଥିଲେ। କିଛି ସାଙ୍ଗ ଭେଜ ଖାଦ୍ୟ ଅର୍ଡର କରିଥିଲେ, ତ ଆଉ କେତେକ ନନଭେଜ । ଖାଇବା ପରେ ଜଣେ ଭେଜ ଖାଦ୍ୟ ଖାଉଥିବା ସାଙ୍ଗ ଦାବି କଲେ ଯେ ତାଙ୍କ ଥାଳିରୁ ହାଡ଼ ବାହାରିଛି। ଏହା ଦ୍ୱାରା ଶ୍ରାବଣ ମାସରେ ତାଙ୍କର ଧର୍ମ ଭ୍ରଷ୍ଟ ହୋଇଛି।

ଏହା ପରେ ସବୁ ସାଙ୍ଗ ମିଶି ହଙ୍ଗାମା ଆରମ୍ଭ କରି ଦେଲେ। ରେଷ୍ଟୁରାଣ୍ଟ ମାଲିକ ପୁଲିସକୁ ଡାକିଲେ। CCTV କ୍ୟାମେରା ଯାଞ୍ଚ କରାଯାଇଥିଲା ଏବଂ ସମ୍ପୂର୍ଣ୍ଣ ଘଟଣା ସାମ୍ନାକୁ ଆସିଲା।

ରିପୋର୍ଟ ଅନୁସାରେ, ଗୋରଖପୁରର ଶାସ୍ତ୍ରୀ ଚୌକରେ ଏକ ରେଷ୍ଟୁରାଣ୍ଟ ଅଛି । ଯେଉଁଠାରେ ପ୍ରତିଦିନ ଶହ ଶହ ଲୋକ ଖାଦ୍ୟ ଖାଇବାକୁ ଆସନ୍ତି। ଗୁରୁବାର ୩୧ ଜୁଲାଇ ରାତିରେ, ପ୍ରାୟ ୧୨ ଜଣ ଯୁବକ ରେଷ୍ଟୁରାଣ୍ଟରେ ଖାଦ୍ୟ ଖାଇବାକୁ ପହଞ୍ଚିଥିଲେ। ଏମାନଙ୍କ ମଧ୍ୟରୁ ଜଣେ ଯୁବକ ଭେଜ ଥାଳିରେ ହାଡ଼ ମିଳିବାର ଦାବି କରି ହଙ୍ଗାମା ଆରମ୍ଭ କରି ଦେଇଥିଲେ।

ସେ ଅଭିଯୋଗ କରିଥିଲେ ଯେ ଏହି ରେଷ୍ଟୁରାଣ୍ଟରେ ଭେଜ ଥାଳିରେ ହାଡ଼ ମିଶାଇ ଦିଆଯାଉଛି । ଶ୍ରାବଣ ମାସରେ ଧର୍ମ ଭ୍ରଷ୍ଟ କରିବାର ଚେଷ୍ଟା କରାଯାଉଛି। ତାଙ୍କ ଜଣେ ବନ୍ଧୁ ନିଜ ଫୋନରେ ଏହି ଘଟଣାର ଭିଡିଓ ରେକର୍ଡ କରିବା ଆରମ୍ଭ କରି ଦେଇଥିଲେ। ଭିଡିଓରେ କହୁଥିବାର ଶୁଣାଯାଉଛି ଭେଜରେ ହାଡ଼ ବାହାରିଛି। ଏଠାରେ କୌଣସି ପରିଚ୍ଛନ୍ନତା ନାହିଁ। ମ୍ୟାନେଜରଙ୍କୁ ଡାକନ୍ତୁ। ଧର୍ମ ଭ୍ରଷ୍ଟ କରୁଛନ୍ତି...

ଉତ୍ତେଜନା ବଢ଼ିବା ଦେଖି ରେଷ୍ଟୁରାଣ୍ଟ ମାଲିକ ରବିକର ସିଂହ ସେମାନଙ୍କୁ ବୁଝାଇବାକୁ ଚେଷ୍ଟା କରିଥିଲେ। ସେ କହିଥିଲେ ଯେ ତାଙ୍କ ରେଷ୍ଟୁରାଣ୍ଟରେ ଶାକାହାରୀ ଓ ମାଂସାହାରୀ ଖାଦ୍ୟ ଅଲଗା ଅଲଗା ଭାବେ ପ୍ରସ୍ତୁତ ହୁଏ। ଆଜି ପର୍ଯ୍ୟନ୍ତ କୌଣସି ଗ୍ରାହକ ଏଭଳି ଅଭିଯୋଗ କରି ନାହାଁନ୍ତି, ତେବେ ଆଜି କେମିତି।

ଯୁବକମାନେ ହଙ୍ଗାମା ଜାରି ରଖିଥିଲେ। ଅନ୍ୟପଟେ ରେଷ୍ଟୁରାଣ୍ଟ ମାଲିକ ପୁଲିସକୁ ଡାକିଥିଲେ। ଘଟଣାସ୍ଥଳରେ ପହଞ୍ଚିଥିବା ପୁଲିସ ରେଷ୍ଟୁରାଣ୍ଟରେ ଲାଗିଥିବା CCTV କ୍ୟାମେରା ଯାଞ୍ଚ କରିଥିଲେ, ଯେଉଁଥିରେ ଯୁବକମାନଙ୍କର କାରନାମା ସାମ୍ନାକୁ ଆସିଥିଲା ଏବଂ ସେମାନଙ୍କୁ ଧକ୍କା ମାରି ରେଷ୍ଟୁରାଣ୍ଟରୁ ବାହାର କରାଯାଇଥିଲା।

ରେଷ୍ଟୁରାଣ୍ଟ ସଂଚାଳକ ରବିକର ସିଂହ ଏକ CCTV ଭିଡିଓ ଜାରି କରିଛନ୍ତି। ଯେଉଁଥିରେ ଦେଖାଯାଉଛି ଯେ ଜଣେ ବ୍ୟକ୍ତି ନିଜେ ନନଭେଜ ଥାଳିରୁ ହାଡ଼ ଉଠାଇ ଭେଜ ଥାଳିରେ ରଖୁଛନ୍ତି। ଭିଡିଓରେ ସ୍ପଷ୍ଟ ଦେଖାଯାଉଛି ଯେ ଜଣେ ଯୁବକ, ମଝିରେ ବସିଥିବା ତାଙ୍କ ବନ୍ଧୁଙ୍କୁ ହାଡ଼ର ଟୁକୁଡ଼ା ଦେଉଛନ୍ତି, ଯିଏ ଶାକାହାରୀ ଖାଉଥିବା ବନ୍ଧୁଙ୍କ ଥାଳିରେ ତାହା ରଖି ଦେଉଛନ୍ତି।

ରେଷ୍ଟୁରାଣ୍ଟ ସଂଚାଳକ କହିଛନ୍ତି ଯେ ବିଲ ଅଧିକ ଆସିଥିଲା। ଟଙ୍କା ଦେବାକୁ ନ ପଡୁ ସେଥିପାଇଁ ଯୁବକମାନେ ହଙ୍ଗାମା ଆରମ୍ଭ କରି ଦେଇଥିଲେ। ରବିକର ସିଂହ କହିଛନ୍ତି ଯେ ସେ ବହୁ ବର୍ଷ ଧରି ରେଷ୍ଟୁରାଣ୍ଟ ଚଳାଇ ଆସୁଛନ୍ତି। କିନ୍ତୁ ଏଭଳି ଘଟଣା ପ୍ରଥମ ଥର ପାଇଁ ଘଟିଛି। କିଛି ଲୋକ ତାଙ୍କର ଓ ତାଙ୍କ ରେଷ୍ଟୁରାଣ୍ଟର ପ୍ରତିଷ୍ଠା ଖରାପ କରିବାକୁ ଚାହୁଁଛନ୍ତି।

ରବିକର ସିଂହ କହିଛନ୍ତି ଯେ ସେ ଏବେ ଏହି ମାମଲାରେ ପୁଲିସକୁ ଲିଖିତ ଅଭିଯୋଗ ଦେବେ। ଯାହାଦ୍ୱାରା ଏଭଳି ମିଛ ଅଭିଯୋଗ ଲଗାଇଥିବା ବ୍ୟକ୍ତିଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ହୋଇପାରିବ।