ପ୍ରାୟ ସବୁ ଜିଲ୍ଲାରେ ବିଜେଡି-ବିଜେଡି ଲଢ଼େଇ, ନେତା କରୁଛନ୍ତି ସମାନ୍ତରାଳ ସଂଗଠନ !

ବିଜେଡି ବନାମ ବିଜେଡି ଲଢେଇକୁ ନେଇ ଦଳରେ ଟେନସନ୍ । ନିର୍ବାଚନ ପୂର୍ବରୁ ବିଜେଡିରେ ଦେଖାଦେଲାଣି ସମାନ୍ତରାଳ ସଙ୍ଗଠନ । ବନ୍ଧୁମିଳନ ନାଁରେ ହେଉଛି ସଭା ସମିତି । ବିଧାୟକଙ୍କ ବିରୋଧରେ ଗର୍ଜନ କରୁଛନ୍ତି ଦଳୀୟ ନେତା । ଯେମିତିକି ଜଗତସିଂହପୁର ନିର୍ବାଚନ ମଣ୍ଡଳୀ। ଏଠି ବିଜେଡି ବିଧାୟକ ପ୍ରଶାନ୍ତ ମୁଦୁଲି ଓ ପୂର୍ବତନ ଜିଲ୍ଲା ବିଜେଡି ସଭାପତି ଅମରେନ୍ଦ୍ର ଦାସଙ୍କ ମଧ୍ୟରେ ଛକାପଞ୍ଝା ସ୍ଥିତି । ପ୍ରଶାନ୍ତ ମୁଦୁଲିଙ୍କ ବିରୋଧରେ ଗର୍ଜିବା ସହ ପରଦେଶୀ ବିଦେଶୀ ବୋଲି ଅଭିଯୋଗ ଆଣିଛନ୍ତି ଅମରେନ୍ଦ୍ର । ଏତିକିରେ ଚୁପ୍ ନରହି କହିଛନ୍ତି, ଭୟରେ ତାଙ୍କୁ ବିଧାୟକ ପ୍ରଶାନ୍ତ ମୁଦୁଲି ଦଳୀୟ ସଭାସମିତିକୁ ଡାକନ୍ତି ନାହିଁ ।

ଅମରେନ୍ଦ୍ରଙ୍କ ଅଭିଯୋଗ ଉପରେ ପ୍ରଶାନ୍ତଙ୍କ ପ୍ରତିକ୍ରିୟା ମିଳି ନଥିବାବେଳେ ଜିଲ୍ଲା ସଭାପତି ରବି ନାରାୟଣ ଜେନା କହିଛନ୍ତି ବିଜେଡି ସୁପ୍ରିମୋ ଯାହା ନିର୍ଦ୍ଦେଶ ଦେବେ ତାକୁ ସମସ୍ତେ ମାନିବେ ।

ବାଲିକୁଦା-ଏରସମା ନିର୍ବାଚନ ମଣ୍ଡଳୀରେ ମଧ୍ୟ ସମାନ ସ୍ଥିତି। ପୂର୍ବତନ ମନ୍ତ୍ରୀ ତଥା ବିଜେଡି ବିଧାୟକ ରଘୁନନ୍ଦନ ଦାସଙ୍କ ବିରୋଧରେ ମେଳି କରୁଛନ୍ତି ବିଜେଡିର ଯୁବ ନେତା ସଂଜୀବ ବିଶ୍ୱାଳ । ବନ୍ଧୁମିଳନ ନାଁରେ ସଂଜୀବ ଦଳର ଅସନ୍ତୁଷ୍ଟ ନେତା, କର୍ମୀମାନଙ୍କୁ ନେଇ ବିଭିନ୍ନ ସ୍ଥାନରେ ସଭାସମିତି କରୁଛନ୍ତି । ତରାସାହି ପଂଚାୟତରେ ସଭା କରି ରଘୁନନ୍ଦନଙ୍କ ବିରୋଧରେ ବିଷୋଦଗାର କରିଛନ୍ତି । ଆଉ ଟିକେଟ୍ ପାଇଲେ ନିର୍ବାଚନରେ ଲଢ଼ିବେ ବୋଲି ଖୋଲାଖୋଲି କହିଛନ୍ତି ।

ସେପଟେ ରଘୁନନ୍ଦନ କହିଛନ୍ତି ସେ ନିର୍ବାଚନ ମଣ୍ଡଳୀ ସେବାରେ ଲାଗିଛନ୍ତି। ସେପଟେ ଜିଲ୍ଲାର ଅନ୍ୟତମ ନିର୍ବାଚନ ମଣ୍ଡଳୀ ତର୍ତ୍ତୋଲରେ ଜଗତସିଂହପୁର ବିଜେଡି ସାଂସଦ ରାଜଶ୍ରୀ ମଲ୍ଲିକ ଓ ବିଧାୟକ ବିଜୟ ଶଙ୍କର ଦାସଙ୍କ ମଧ୍ୟରେ ଶୀତଳ ଯୁଦ୍ଧ ଚାଲିଛି । ଅନ୍ୟପଟେ ପାରଦୀପରେ ବିଧାୟକ ସମ୍ବିତ ରାଉତରାୟ ଓ ପୌରାଧ୍ୟକ୍ଷ ବସନ୍ତ ବିଶ୍ୱାଳଙ୍କ ମଧ୍ୟରେ ଛକାପଞ୍ଝା ସ୍ଥିତି କଥା କାହାକୁ ଅଛପା ନାହିଁ ।

ବାଲେଶ୍ୱର ଜିଲ୍ଲାର ଅଧିକାଂଶ ନିର୍ବାଚନ ମଣ୍ଡଳୀରେ ମଧ୍ୟ ବିଜେଡିରେ ଗୋଷ୍ଠୀକନ୍ଦଳ ସ୍ଥିତି। ଗତ ନିର୍ବାଚନରେ ନୀଳଗିରିର ବିଜେଡି ବିଧାୟକ ପ୍ରାର୍ଥୀ ସନ୍ତୋଷ ଖଟୁଆଙ୍କୁ କିଛିଦିନ ତଳେ ବାହାନଗା ବ୍ଲକ ପଥରପେଣ୍ଠ ପଂଚାୟତରେ ଠେଲାପେଲା କରିଥିଲେ ଦଳୀୟ କର୍ମୀ । ଏହି ଭିଡଓ ଭାଇରାଲ୍ ହେବା ପରେ ତେଜିଛି ରାଜନୀତି । ବିଜେଡି ଜିଲ୍ଲା ପର୍ଯ୍ୟବେକ୍ଷକ ପ୍ରତାପ ଦେବଙ୍କ ଉପସ୍ଥିତିରେ ବିଜେଡି ନେତା ଶରତ ରାଜ ଗୋଷ୍ଠୀ ଠେଲାପେଲା କରିଥିବା ଅଭିଯୋଗ ହୋଇଛି। ସେପଟେ ବିଜେଡିର ପୂର୍ବତନ ଜିଲ୍ଲା ସଭାପତି ରବୀନ୍ଦ୍ର ଜେନା ଓ ଅନ୍ୟ ବିଧାୟକମାନଙ୍କ ମଧ୍ୟରେ ମଧ୍ୟ ସଂପର୍କ ସେତେଟା ଭଲ ନଥିବା କୁହାଯାଉଛି ।

ସାଧାରଣ ନିର୍ବାଚନକୁ ଆଉ କମ୍ ସମୟ ଥିବାରୁ ବିଜେଡି ପାଇଁ ଦଳରେ ବିଦ୍ରୋହ ଏବେ ସବୁଠାରୁ ବଡ଼ ଚିନ୍ତା ହୋଇଛି। ଏହାକୁ ଠିକ୍  ରେ ମ୍ୟାନେଜ୍ କରିନପାରିଲେ ଦଳ ପାଇଁ ବଡ଼ ସମସ୍ୟା ଦେଖାଦେବ।